حاسه بتأنيب ضمير .. ساعدوني

السلام عليكم ورحمة الله وبركاته ..

اخباركم حبيباتي واخواتي ف الله ..
معليش مالي ب المقدمات بدخل ب الموضوع .. واتمنى انكم تنورون لي ب نصايحكم الحلوه ربي يسعدكم ..وإليكم قصتي ..
بنات انا لما كنت بنت يعني قبل م انخطب ..كنت إنسانه طايشه يعني زي اي بنت تحب الطلعات والضحك والفله ومو هامني شئ .. سن مراهقه يعني وعدت ولله الحمد .. الله يغفر لنا م فات ..
بعد مرور فتره تقدموا لي 3 اشخاص ف فتره وحده .. المهم اثنين منهم م ارتحت لهم والثالث استخرت وارتحت له .. وتمت الخطوبه ولله الحمد .. وكنت اتواصل مع خطيبي ب المكالمات مره ارتحت له .. بعدين لاحظت انه يدقق ف كلامي كثير وينبهني .. انا كنت اعتبر ان تصرفاتي سليمه وعاجبتني .. بس لما كان ينصحني كانت نصايحه مرررره تأثر فيني المهم في فترة الخطوبه جلست تقريبا سنتين والسنتين هذي كلها مشاكل كان في واحد يخرب يشوه سمعتنا عندهم ويشوه سمعتهم عندنا وابوي ضاق من الوضع زي اللي كان ناوي يكنسل الموضوع بس انا رحت وقفت في وجه امي وقلت ي امي انا ارتحت لهذا الشخص ولاتحاولون تمنعوني منه .. المهم انا خلاص مليت من المشاكل بس م يأست ومافقدت الامل ب العكس تقربت من ربي اكثر وتركت امر الخطوبه كلها على جنب وخلاص لجأت لربي بديت انشغل بنفسي سجلت ف تحفيظ وحضرت دورات ف القران وغيره وتركت امور الدنيا كلها ع جنب من اغاني وزواجات وغيبه ونميمه وخلاص صفيت نفسي وحافظت على صلواتي والوتر كنت م اتركه ابد حتى لو اكون برى البيت .. وتركت صديقات السوء الله يصلحني وإياهم ورجعت لصديقاتي الصالحات .. الله يسعدهم
وصرت ادور ف الدين وابحث واقراء واسمع محاضرات وكنت مره اتأثر .. وكنت م احب اخالط مجالس فيها غيبه ونميمه لو حضرت انصحهم واوقفهم عند حدهم .. لدرجة انهم ماصاروا يجيبون سيرة احد لما اكون جالسه معاهم .. المهم بعدها بفتره بعد اللذه والسعاده والفرح اللي عشته بقرب ربي .. الحمد لله تم زواجي من الشخص نفسه .. وتزوجت ولله الحمد .. بسسسس :(
م ادري ايش اقول .. من هنا تبداء معاناتي
زواجي تمنيته يكون اسلامي بس كان اخوان 2 ف يوم واحد انا وسلفتي ما قدرت اتحكم ف هذا الشئ بس سويت زفتي بدون موسيقى بس الزواج مشى ب كل حالته والمسجل م ضبط يعني كل شئ مكركب واحسن انا فرحني هالشئ .. وجيت سكنت عند اهل زوجي صرت لما اجلس معاهم ويجيبو سيرة احد اوقفهم عند حدهم اقول وانصحهم وما اسمح لهم يحشون او يجيبون سيرة احد عندي او اقوم من عندهم خلاص عرفوا طبعي طبعا هذا الوقت كنت شبه محافظه على صلواتي والوتر.. بعدها احس بديت انتكس اااااه بس بديت ابعد عن ربي كثيييير زوجي مو كانه هو خطيبي اللي كان ينصحني واتأثر .. صار ينصحني واقوله اسكت نصايحك ماتأثر فيني .. اوقات اقوله خلني اغمض عيوني وانت تكلم لعل وعسى يأثر فيني نفس ايام الخطوبه يقول لا اسمعيني وطالعي فيني .. طبعا بعد زواجي بشهرين تعبت كثييييير كرهت الحياة كرهت كل شئ صرت اوسوس ورحت عند الشيخ يقراء علي والحمد لله رجعت لحالتي الطبيعيه ..

بنات اللي ابغى اوصله لكم ..
اني اصبحت فتاة مقصصصصصصره جدا ف حق ربها بديت اهمل ف صلواتي وتركت السنن اللي م كنت اتركها ف ايام خطوبتي والوتر اصليه ف السنه مرره او مرتين بديت انتكس تغيرت كثير .. حماتي من النوع اللي تتكلم عني عند سلفتي وعندي تتكلم عن سلفتي وماتتجراء تتكلم احد في وجهها .. نبهتها من البدايه قلت اي شي تقولينه لي انا اوصل لها واي شئ تقولينه لها هي توصل لي طبعا مجرد تنبيه ماكنت اسوي كذا بس م تركت طبعها الى يومك هذا هي كذا… بعدها انا فعلا صرت كذا اوصل لها وتوصل لي .. بعدين لما اراجع واحاسب نفسي اقول ي الله انا اغتبت او نممت ويجيني تأنيب ضمير واستغفر واتوب اني م اعيدها ثاني مره ولما يصير سالفه ثانيه ارجع مول ماكنت اوصل لها وتوصل لي .. بنات انا حاسه بخوف *** اني كنت اعبد ربي لحاجه بعد ما عطاني ظللت ااااااه بس .. احيانا سلفتي تروح بيت اهلها خلاص اكون بعيده عن الغيبه والنميمه احس اني مبسوطه .. بس لما ترجع يرجع كل شئ يعني اقول اني تبت والعب على نفسي انا بصراحه م ابغى ربي يعاقبني او يعاقب زوجي بسبتي احيانا اقول لزوجي تكفى خذ لي بيت لوحدي مع اني مو مره قد المسؤوليه بس ابغى ابعد عن هالشي ما ابغى اقوله هذا السبب .. احيانا هو يقولي اذا انا قلت لك شي مثلا نصايح قولي انا م اقدر اسوي كذا وكذا وراح ندور حل بس انا م ابغى اقوله .. والله كلما ابغى استغفر اقول ربي م بيغفر لي انا لعابه خليني على م انا عليه ما ادري وش اسوي عشان ابعد عن البيئة اللي فيها حش ونميمه وشكوك تعبت نفستي والخوف مررره معدم نفسيتي كارهه الدنيا احس اني لما تصير مشكله م الجاء لربي اقول انا لعابه ومصلحجيه بخذ مصلحتي من ربي وابعد عنه .. واروح اشكي لامي او لسلفتي وانتف واحش ف اهل زوجي واذكر شرهم ما اذكر خيرهم بس بعدين اندم .. م ادري وش اسوي والله .. يا رب اهدني .. احس اني كذابه ومنافقه .. بنات تكفون وش اسوي عشان ابعد من هالجو والجاء لربي بصدق واترك هذا الشي الغيبه والنميمه ..

تكفون حاسه نفسي محتاجه لمواعظ بعد م تركت التحفيظ والجو الايماني اللي كنت عايشه فيه .. حاسه ب النفاق يمشي ف عروقي مهما سويت اااه بس وش اسوي خايفه اخسر رضا ربي مع اني عارفه ان الدنيا فانيه ولافيه شي يبقى لي .. وش اسووووي

الله يجزاكم الجنه.. ويجعل كل حرف تكتبونه في ميزان حسناتكم