حافز ، جداره ، وظائف ما تناسب تخصصاتنا (ماعرفت اختار موضوع مناسب )

مرحبا اخواتي

اتمنى منكم تتقبلون كلامي بصدر رحب وانتم بحسبت اخواتي وهذي بعض النصائح
في هذا المنتدى مريت على كذا موضوع يتكلم عن جدارة وحافز ... الخ من انظمة الاعانات
حبيت اقول لكم على كذا شغله
اولا الحياة صعبه ... بما انها صعبه تحتاج الى (تضحيات ، تنازلات ، مغامره )
بعض البنات ترفض الوظيفه المقدمه من حافز
السبب
لانها ما تناسب شهادتها ... مو اقبل الوظيفه افضل من جلوسي في البيت ... يمكن هالوظيفه تضيف لي شيء في شخصيتي ... يمكن احتك بناس طموحه تشجعني ، ناس فلاويه توسع صدري ...بنات لا تحقرون شي ... ممكن العمل في مصنع حلويات يوصلك لشي ما توقعتيه ابداا... اليوم في المعمل وبكره مشرفه وبعده في الادارة وبعده في مجلس الادارة وتفهمين شغل المصنع من أ الى ي
وتقدمين على صندوق المئوية وتسوين لك مصنع ... البعض بيضحك على كلامي والبعض بيفكر فيه ... اقروا كتب المؤلف جون سي ماكسويل ... مافيه شي مستحيل ولا في شي يجي بسهوله ... (تنازلات ، تضحيات ، مغامره)
وسبب اخرى لرفض الوظيفه (الوقت)
اغلب الدوائر والقطاعات الخاصه والحكوميه الوقت الرسمي لها من 8 ص الى 5 م
هذا هو الوقت الرسمي من 8 ساعات الى 9 ساعات يوميا لان فيه ساعه كامله للغداء يعني وقت العمل 8 ساعات فقط
المدارس يطلعون بعد الظهر
مهنة التعليم (المعلم ، المعلمة ) ذيلا اللي يطلعون بدري
باقي الوظائف على 4 او 5 العصر
يعني رفض الوقت ابدااا مو عذر من وين يجبون لنا وظايف عبارة عن 3 ساعات او 6 ساعات في اليوم
من تحت الارض مثلا
خلونا واقعيين .... بليييز
رفض الوقت ماهو عذر ابدااا الا للمتزوجه اللي عندها اطفال ولا عندها حد يمسكهم


الفرصه ما تتكرر
وبعدين ما تدرين يمكن هالوظيفه تفتح لك باب رزق وتجيب لك وظيفه افضل

الرزق ما يجي مره وحده ... ولا يجي وانتي نايمه ... ولا يجي وانتي تتشكين في المنتديات ... طوري نفسك
خذي دورات دبلومات ... ادرسي ... لا تجلسين على بكالوريوس وتقولين ابغى مكتب ومكيف وثلاث ساعات في اليوم ... تعلمي انجليزي ومثلكم عارف اللي انجليزيته فري ول راح تزيد فرصه الوظيفيه ... طوري نفسك

باقولكم قصه صارت معي
انا اشتغلت في شركه
جابوا لنا موظفتين جدد
قالوا لي دربيهم على النظام
وكتابة الايميلات الرسميه
اللي صار
تعبت معاهم
تخيلوا يدورون حرف الداء من الكيبورد ولا يعرفون يكتبون جملتين على بعض وكل شوي مسوين لنا مصيبه في النظام يدخلون بيانات العملاء غلط

تدرون ليش هم كذا
لانهم تخرجوا وجلسوا في البيت من 5 الى 7 سنوات ولا فكروا ياخذون دورات ولا حتى طوروا انفسهم بالبيت
مادربوا انفسهم على شي نهائيا
كل هالسنيين يدورون على وظايف

في الاخير دفعوا مبلغ لشخص توسط لهم عندنا
ــــــــــــــــــــــــــــــــــــــــــــ

وفيه بنات تدخل بياناتها في نظام حافز وتختار كل الخيارات المتاحه للتوظيف
لاااا كذا غلط
اختاري الشي اللي انتي تبغينه
وش الفايده تختارين كل الخيارات
ولا جابوا لك وظيفه رفضتيها واذا عطوك فرصه ثانيه بترفضين لانها ما تناسبك
مو انتي في البدايه فتحتي لهم المجال
حددي رغباتك
تبغين التدريس اختاري التعليم فقط
على اساس لو عطوك وظيفه في مصنع ترفضينها وتكون حجتك قويه لانها مو من ضمن الخيارات اللي حددتيها
والافضل ما ترفضون شي
ما تدرون عن المجهول
عسى ان تكره شي وهو خيرا لك
ــــــــــــــــــــــــــــــــــــ

انا مو مع حافز ولا ضده
ولا مع حد ابدااا سواء نظام او شخص ولا ضد حد ابدااا

انا ضد السلبيه اللي نعيشهاااا فقط
نبغى وظيفه شكلها كذا لونها كذا وعسانا نتقبلها بعد ... تالي احنا الخسرانات
ماضاعت الدنيا لو اتوظف وظيفه مو تخصصي ... مافيها شي اتعلم من هالوظيفه ... اوسع مداركي
ليش احصر نفسي على علم معين ....
ـــــــــــــــــــــــــ


اتمنى لكم التوفيق