حالة بنتي الغريبه تهقون وش الي فيها ؟؟؟؟

السلام عليكم
صباح الخيرات
خواتي بنات حواء بنتي عمرها 7 سنوات تدرس اولى ابتدائي انقلبت حالتها من شاطره وتسمع الكلام واي شي اقوله لها يمشي والحين تحولت الى بكايه شكايه وربي احيان اقول شكلها مخوفه البنت والا تحلم بشي يخوفها الترم الاولى شاطره وتحب المدرسه الترم الثاني تتكيسل وتحب الغياب واحيان تذم في استاذتها وتقول صارة عصبيه وتطق ومااحبها ياماما ولاجا الليل ماتحب الغرفه ولا الضلام اذا جيت انومها تقول خليك معي وهي اول عادي تنوم وانا اطلع اشوف شغلي لاني مااسكر الباب والحين مااسكر واولع النور واروح القاها وراي تبكي والله يكرمكم مع البكى والخوف تستفرغ ولاقلت ليش ياماما خايفه قالت لا ماني خايفه تعالي عندي لاتخليني وحدي نومي معي وربي احيان اكون مشغوله وودي استغل الوقت في نومها وارتب المطبخ بس ماتخليني واحيان اضطر اطقها ورغم ذالك مافاد كرهتني حياتي انقلبت من البنوته الفاهمه الى بزر ابو سنتين تصدقون مره جلست معها وتقربت منها وقلت ليش ياماما تصيحين اذا جا النوم او اذا قلت بروح مع ابوك لسوق شوي واخليك عند خالتك الي هي اختي قريبه من البيت جلست تصيح وتستفرغ قالت ماما انا خايفه تروحون انتي وبابا ومارتجعون قلت اشلون مانرجع وبكت وقالت خاف تموتون مابغى اعيش بدونكم واجلس بالدنيا لحالي اعوذ بالله من تفكيرها قلت يعني لارحتي معنا بتحفظينا ماراح نموت اذا الله كتب راح نموت متنا وانتي معنا قالت احسن ياماما ابي اموت معكم ماابي اعيش لحالي قلت من قايل لك هالكلام قالت ماما وحده من صديقاتي بالمدرسه تقول فيه بنت راحت المدرسه رجعت مالقت اهلها تدرين وينهم قالت لا مدري قالت ماتوا والبنت عاشت بدون اهل مسكينه وبنتي تقولي وتبكي وربي تعقدت حسبي الله على هالبنيات طلعوا يخوفونها بالمدرسه

الحل ياخواتي صارت نفسيتها تعبانه واتعبتني معها
((( بس الغريب في الامر تروح للمدرسه وحنا في البيت وماتخاف ولاتبكي واذا رحت لسوق او لصيدليه قريب من البيت وبتركها بالبيت مع عمي ابو زوجي والشغاله واخوها هات ياصياح واستفراغ وخوف وتمسك يدي وتتنافض وتنطط وهي تصيح حتى ابوها مستغرب حالتها )))

الي خلاني اذكر السالفه لكم البارح كانو 2 من خواتي عندي يوم جت الساعه 11 قلت ماما روحي نومي بكره مدرسه يالله ياشاطره راحت شوي الا هي تنادي يمه يمه تعالي بسرعه ونجي ركض انا وخواتي قالت بستفرغ وصرنا نسمي عليها ودخلتها الحمام وراحوا خواتي للمجلس وتمسك حلقها وتقول شي ياماما احسه يخنقني ويجيبلي كحه ويخليني استفرغ والحاله تاخذ فتره وترجع لها يعني ماهوب دايم لاطريت الطلعه جتها الحاله واحيان تنام ولاتقول شي ولاتبكي وربي غريب امرها