حالة غريبة تحدث في كل 4 مليون أمرأة === تعالوا أسمعوا الحكاية!

أختى عندها بنت ما شاء الله عمرها سنتين وبعدين اكتشفت أنها حامل وعادي الدورة الشهرية اتأخرت عنها يوم وهي مظبوطة جداً راحت المعمل وحللت وطلع حمل المهم بعد أسبوع أو عشر أيام من تأخير الدورة جالها نزيف بالليل ومغص شديد جداً ومن حظها إنها كانت في بيت العيلة وأنا ووالدتي سمعنا صراخها وجرينا لحقنا عليها وعادي قلنا لها مش مشكلة هذا أكيد إجهاض والحمد لله وربنا يعوض عليكي وأنت عندك بنوته ربنا يبارك فيها ....
المهم ونقلناها المستشفي وفي المستشفى سمعنا المفاجأة الدكتورة قالت الحمل تمام وعادي والنبض سليم ومفيش مشاكل تروح البيت وبعدين تيجي بعد يومين أشوفها .. أحنا استغربنا وقلنا يمكن كان مجرد نزيف والحمل موجود ... والطبيب المعالج الخاص بأختى كان في إجازة وأنتظرت لحد ما يرجع .. وزاد عليها المغص الشديد وعلى وصفها كأنه الزايدة أو مغص كلوي وذهبنا لطبيبها مرة أخرى الذي أبدي دهشته الشديدة وقال الحمد لله الحمل سليم والجنين بخير يمكن شوية التهابات في القولون يمكن الزايدة يمكن..يمكن لكن ما أفادنا بشئ ...وأعطاها مسكنات للألم..

بعد كام يوم كنا جميعنا في المستشفى لأن زوجة أخي كانت تضع مولودها وأختى كانت معانا المهم فجأة بدأت في الصراخ الشديد والشكوي من المغص الرهيب الذي كالسكين يقطع في جنبها المهم كان طبيبها موجود لأنه هو أيضاً الطبيب الخاص بزوجة أخي والعائلة فحصها مرة أخري بالسونار وقرر أن كل شئ على ما يرام ولكن أمام صراخها وتألمها قرر عمل كونسلتو من الأطباء لأتخاذ القرار بعد أن تأكدوا أنها ليست الزايدة وبعد فحصها من الأطباء قرروا أن يقوموا بعمل جراحة تسمى جراحة إستكشافية حتى يعرفوا سبب هذا المغص ... ووافقنا وعملت أختي العملية ....... وكانت المفاجأة ...........تخيلوا كان أيه !؟؟!؟!؟!؟؟!









































أتضح بعد الجراحة أن المسكينة كانت حامل في توأم الأول كان في الرحم عادي والثاني يا حرام كان في الأنبوبة "قناة فالوب" اليمنى وطبعاً هوه اللي كان عامل كل المشاكل دي ومبهدلها يا حرام .. والغريب الطبيب قال لنا أيه تخيلوا ؟؟ قال دي حالة موجودة بس في الكتب وأنا طول عمري ما مرت عليا حالة مثلها وهي تحدث في كل 4 مليون أمرأة مرة!!!!!!!

وعملت الجراحة وطبعاً شالو لها الأنبوبة اليمين بالحمل اللي كان فيها وأخبرها الدكتور أنه لو تأخرنا ساعة كمان كانت الأنبوبة أنفجرت وبهدلت المنطقة كلها وطبعاً أخذت بنج كلي وتألمت بعد الجراحة لأنه كان ممنوع عليها المسكنات وكل ما كانت تتألم الدكتور يقوللها أستحملي عشان البيبي يكون سليم ... والحمد لله كمل حملها على خير وجابت ولد زي القمر لكنه ضعيييييف وهزيل جداً بسبب اللي حصل وهوه جوه :)

أسفة على الإطالة لكن حبيت أستفيض في التفاصيل حتى تستفيد منها البنات في المنتدي ..

ويارب يرزق الجميع بالذرية الصالحة ...آمين يا رب