حالتي المزريه الحمدلله على كل حال

السلام عليكم
اول شي ابي كل وحده تتحمد الله ع حياتها وعالانعام اللي حولها
اول شي انا ساكنه ببيت قديم يمكن له 35- سنه بيت كله حفر وفيران وصراصير ونمل كنا ساكنين ايجار ورحلنا بيت اهله القديم يبغاله ترميم فزوجي قال بدال الايجار نرمم البيت ونسكن وللاسف سحب علي لي الان 5 سنوات ولا سوى فيه شي
البيت كبير كبير ست غرف وكلها فاضيه مافيها اثاث ولابيبانها تقفل البيبان خشب ماكوله اكل ولافي. مجال اركب كوالين بيتي كنه بيت مهجور يفتقر للحيويه
زوجي للاسف فلوسه للناس يعطيهم بالهبل ومايبخل على نفسه تعبت وانا اتكلم مافي فايده
غرفة النوم من النوع الغالي لكن للاسف لافرشة سرير ولا مفرش ولاحتى ستاير حاطه قطع قماش عالشباك لاني ماحب انام وفيه ضو
سريري نصه مكسور انام بوضع القرفصاء وواتقلب كثير لان مكاني مو مريح اذا زوجي صحى اروح اكمل نومي بمنامه لاتقولو افرشي عالارض مافي بطانيات اتغطى بنفس بطانية زوجي بعض الاحيان يسحبها وهو نايم انام بدون
عيالي اخ بس عيالي افرش لهم فرشه وحده ينامو جنب بعض وغطا واحد كل واحد يسحب من جهه وهواش طبعا ولدي الكبير منامه لحال لانه كبير عيالي ماعندهم غرفة نوم ماعندهم ادراج ولا خزانه ملابسهم بشنط واكياس لما اروح السوق بنتي تعجبها خداديات تبغاهم بس وين تحطهم اقول ياماما ماعندك سرير بس نشتري راح اجيب لك اشتريت لهم بطانيات من حافز ياخذهم للعمال ويقول اجيب لكم وماشوف شي فراش البيت من قدمه صاير زي القماش كل شوي اسحبه اعدله غرفة التلفزيون كنت افرش ستااره نجلس عليها وجاب فراش مستخدم من عند امه وفرش جزء بالغرفه نجلس عليه وناكل مع العلم ان الارضيه بلاط قديم مهو سيراميك وصعب تمسيحه ماينظف الا بكلور عكس السيراميك بس مويه تخليه يلق
مطبخي ومادراك مامطبخي قال لي بارممه لك بالكامل بكره اجيب عمال وماصدقت قال كيذا ع طول طلعت كل شي برى عالممر ولي 3 شهور ماسوى شي وحلفت الف يمين مارجع الاغراض لاني تعبت بالفك والشيل والحط


اكتشفت بالصدفه انه ساحب 50 الف معطيها ناس مايسوو شي. علشان تضاربو مع ناس،ويطالبوهم بتعويض طبعا سلفتي علمتني وماقدر اواجهه علشان ماتصير مشاكل وباقي القرض لعب فيه




يسحب قروض بالهبل وبعطي الناس مو الف الفين لافوق ال10 الاف
زوجي غريب مايحط بالبيت شي حتى قبل 5 سنوات يوم سكننا انا فرشت البيت بفلوسي
نفسيتي زي الزفت ماقدر استقبل احد مره اهملت البيت مانظفه علشان مايزين بعينه والبيت قديم قديم يعني ياخذ مني مجهود علشان تبين فيه النظافه الحمام قديم وينعاف تخيليو الحمامات كيف قبل 35 سنه والله ماجدد فيهم شي الا المواسير
يخرب شي بالبيت مايصلحه لو يقعد سنه صرت انا وولدي نجيب ادوات سباكه ونصلح الخرابات
هذا غير السياره بكب ماتكفينا نتعصر ع بعض لما نوصل ولانسافر
علشان مااظلم زوجي اذا طفشت يمشيني الاكل اللي احبه يجيبه
بالاعياد مابقصر علينا كل شي يجيبه
بس يابنات مايحط شي بالبيت ولايغير اثاثه ولايهتم
مع العلم زوجي عنده نياق مايبخل عليهن يقول هذول فيهن فايده اكثر منكم
قلت اي فايده وهم ياكلو ويزقو معليش عالكلمه بس جد لا حليب فيهن ولا نفعنا بشي لو غنم بلعناها
انا عارفه مشكلتي مالها حل لان ماقدر اترك عيالي انا عندهم ادبرهم هو راح يهملهم
ماقدر اتركهم ولدي الحين مراهق وحركاته ماتعجبني لازم مراقبته 24 ساعه
ابي منكم دعوة لعل الله يستجيب لوحده منكم دعوتها
الكلام اللي فوق مجرد فضفضه وهذا ماهو الا غيض من فيض ماذكرت اشياء كثيره علشان مانعرف اكثر