حالنا غيـــر الناس

السلام عليكم ورحمة الله

موضوعي دا انا تعبت من التفكير فيه لوحدي وحاسة انه ماينحل ابدددا فارجوكم فكروا معايا وساعدوني

حاليا في ناس متقدمين واحنا بنسأل وبنصلي الاستخارة والموضوع يمكن يتم ويمكن يتفركش بدون سبب ( زي الي قبله )

المهم مو دي المشكلة

المشكلة انه لو تم الموضوع وسارت ملكة وبعدين زواج اهل العريس لازم يشوفوا أهلي صح؟
لازم يشوفوا عماتي وأعمامي وخالاتي وأخوالي
ودا الشي ماراح يسير ابدا لأن الوالد مقاطع الكل
هوه مايدخلهم بيت وهما مايدخلوا بيتنا
ليييش ما ادري
يعني احنا ممنوعين نزور أقاربنا وبيتنا والله تمر سنوات مافي أحد يدخله
واذا أحد جانا في السنة حسنة يجلس شوية مع الوالد بعدين اسمع خصام ومضاربة ويرجع يخرج تاني :(
الناس تفرح في الاجازات ورمضان والأعياد وانا يجيني اكتئاب واحباط وبكاء متواصل
في رمضان الناس تتجمع مع بعضها احنا نفطر لوحدنا ونتسحر لوحدنا طووول الشهر
والعيد حقنا عارفين كيف شكله؟
صلاة العيد بس ونرجع البيت.. وفي اليل نجلس في البيت نتفرج على التلفزيون
وتاني يوم وتالت يوم نفس الشي:(
لا بنشوف أحد ولا أحد يشوفنا
حتى مابنخرج ونشتري ملابس زي الناس
ولو احد اتصل علينا من قرايبنا يااااااويلنا اذا شفنا رقمهم وردينا عليهم البيت يسير حريقة
واحنا طبعا لا يمكن نتصل ولا حتى نفتح السيرة دي
والوالد عنده حب السيطرة وكلامه لا يقبل النقاش ولا احد يقدر يفتح معاه موضوع هوه مايبغى يتكلم فيه
وغير كده هوه يصلي ويصوم ويعرف ربه ومايسمع غير قرآن وأشرطة دينية
يعني عارف ايش مصير قاطع الرحم
ومع ذلك دي حياتنا من سنوات:44:
نسيت اقولكم انه كمان ماعنده أصحاب وزملاؤه في العمل ماعمرهم دخلوا بيتنا
وعنده مبدأ لا يزور ولا يُزار
هل في حل ولا انا حاقضي حياتي كده :44: