مساكن الله بالخير
كيفكم حوائيات حبيباتي :39:
اول شي ياحلوات انا عضوه قديمه بس اجبرتني الظروف ادخل بعضويه جديده
مااقدر استغني عنكن عساني ماافقدكن:love:
عاد انا ابي ادخل في الموضوع دوغري واللي هو حال صديقتي فديتها وين كانت ووين صارت الحين
واكيد انكم راح تستفيدون من القصه خصوصاً اللي تعاني من خيانة زوجها
كان يامكان قبل سنه بالضبط كلمتني صديقتي ضايق خلقها وتشكي من زوجها ...قلت عسا ماشر ..قالت الرجال تغير بس من ماسنجر لجوال وفاهي 24ساعه واذا كلمته نفسه على خشمه والجوال كله مقاطع جنسيه و...و....و....:icon33:
ماقدرت ارد عليها ذاك الوقت جلست اهون عليها وان مافيه احد مرتاح ...اهم شي اخذت البنت فتره وهي وراه تفتيش في تفتيش
بعد 3شهور كلمت تبكي وتقول تعبت نفسيتي واهملت بيتي وعيالي وتحيسب عليه ,,قلت لو دروا عنك المباحث كان وضفوك عندهم ..قالت ليه ..قلت الحين تاركه بيتك وعيالك ونفسك وتنبشين وراه صدقيني ماراح ترتاحين ابد ولا هو راح يلتفت لك نهائي انتي بكذا خليتي زوجك يكرهك زياده وبينتي له انك انسانه ضعيفه بدونه ..ترا الدنيا ماوقفت على رجال واللي خلقك مايضيعك..اهتمي في نفسك ودلعي نفسك تزيني لنفسك وطوري من ذاتك ..ماخبرتك خبله كذا ايام العزوبيه ..
قالت كيف تبيني اسوي كذا وهو حتى النت اذا فتحته جاء وفتشه وراي ,,
انا هنا بدا يشتغل عندي المكر :30:قلت جاك يامهنا ماتمنى..قالت كيف ؟مع العلم يابنات هي كان زوجها يهجرها اياااااااااام
اعطيت البنت رابط موقع للثقافه الجنسيه,,,ولاحظوا اني قلت ثقافه
قلت كل اللي عليك الحين انك ماتسألينه وين نروح ووين تجي واذا قال ابي اطلع قولي حلو انا عندي اشغال ودي اخلصها واذا سألك لاتقولين عندي كذا وكذا قولي اشغال كثيره حتى لو ماعندك الا الفضوه
واذا تكلمتي خليك مبتسمه ولاتعصبين على عيالك قدامه نهائي وخليك دايم على سنقة عشره كشخه وعطر وبيت مبخر وماعليك منه نهائي عيشي حياتك بنفسك ...ولاتهملين واجباته قومي بكامل حقوقه بس العبوديه اللي قبل اتركيها
قلت اذا طلع من البيت كل اللي عليك تصفحين هالموقع مع مواضيع تهتم بالعطر المكياج الملابس واياني واياك تدخلين ((الاسريه في عالم حواء)) ههههه
اخذت فتره وانا معها خطوه بخطوه ..وكنت ادعمها معنوياً وسياسياً
وتكلمني مره قالت الرجال يتحقرص من القهر ويحاول يستفزني باي طريقه بس انا حطيت اعصابي في فريزر علشان ماانهار قدامه وتقول قالي انتي معاد تكلميني اذا طلعت برا شكلي ابي احذف رقمك من الجوال قالت له وبابتسامه انا والله ماافضي بين نفسي وبيتي وعيالي وان كان تبي تحذف رقمي شي راجع لك وان كان تبي تخليه ماعندي مانع,,تقول وقتها حسيت انه بينفجر وماسك اعصابه بس
تدريجيا ماشاء الله تعلمت كيف تجذبه للفراش وماشاء الله تدلعه دلع على الفراش وبعده ترجع الحرمه الاليفه اللي جل اهتمامها في نفسها وعيالها
مرت الشهور وهي على نظامها هذا
وبطلت التفتيش وراه وارتاحت اعصابها وزانت بعد قلباً وقالباً
تقول خلال هاذي الفتره قل اهتمامه بالماسنجر والجوال والطلعات بشكل ملحووووووووووظ جداً
وتقول اشوف الاعجاب بعيونه وصار على الرايحه والجايه يتصل علي :biggrin:
والحمدلله حالياً بطل زوجها كل الحركات اللي هو يسويها ومبلط 24 ساعه عندها في البيت وعايشين في سبات ونبات بس للحين ماخلفوا صبيان وبنات غير عن اللي عندهم خخخخ ...بس الحريم مايعجبهن العجب تقول قلب كبدي طول اليوم متقابلين:biggrin2:
وماحبيت ابخل عليكم يابنات حواء بالقصه بما اني الراعي الرسمي لها:icon31:
وعايشت احداثها بالحذافير كامله وشفت كيف جات نتايجها لعل وعسى ان اللي تعاني تستفيد من قصتها...مع اني كتبتها لكم بالمختصر لاني كسلانه اكتبها كاااااااامله:icon30:
وفي الاخير اقول
إِنَّكَ لَا تَهْدِي مَنْ أَحْبَبْتَ وَلَكِنَّ اللَّهَ يَهْدِي مَنْ يَشَاءُ 
مهما كان عندنا من مكر ودهاء مايغنينا عن رفع ايدينا كل صلاه لله ودعائه وطلبه بيده كل شي وهو القادر على كل شي
واتمنى لكم اوقااااات سعيده
البنات اللي ارسلوا لي عالخاص لبى قلوبكن ودي اساعدكن بس الاداره ماتسمح بالمراسله من الخاص الا بعد 50 مشاركه
عسى دووم ماهو يوم...!!
الله يهنيهم يااارب .......!