حامل في السابع وهذي قصتي مع مستشفى قوى الامن

مرحبا اخواتي الحبيبات
جالسة اكتب لكم وانا يعتصرني الالم من الي صار لي امس
القصة
لي يومين معي حراره وكحه ناشفة صحيت يومالاحد الساعة اربع الفجر
من ارتفاع الحراره اخذت مسكن وريحت شوي وصحيت ولدي للمدرسة وزوجي ولبست ورحت عملي
الظهر زادت الحراره والتعب استأذنت من المدير واتصلت بزوجي يوديني الاسعاف
وصلت لإسعاف مستشفى قوى الامن الساعة وحدة الظهر تقريبا ولاني حامل بالشهر السابع
ماقصروا رايتهم بيضاء دخلوني غرفة الكشف الخاصة بالولادة قاسو حرارتي لقوها مرتفعة مره
عطوني خافض حراره وحطولي كاشف الطلق ودقات قلب البيبي
وجلسوا يتابعون الحراره لين انخفضتالساعة اربع العصر تقريبا حطو فيني علبتين محلول
وسحبو مني تحليل دم وبول واخذو مني مسحة طبية لإشتباههم بأنفلونزا الخنازير وقالت لي الدكتوره نستنا
طبيبة الباطنية تشوفك
بتقولون لي حلو طيب وشفيك زعلانه اقولكم..........
غرفة الكشف الخاصة بالولاده مافيها الا ثلاث اسره وكل ماجت وحده تكشف قوموني وجلسوني على الكرسي
في الاخير قالوا اجلسي عل الكرسي خلاص وجلست لين الساعة 8 المساء حسيت ظهري انكسر ورجليني
لما تكرمت دكتوره الباطنية وجت قالت لازم اشاعة للصدر بس تراها تضر الجنين ووقعي على كذا فرفضت الاشاعة عصبوا علي قلت ماراح اسويها قالت عندك التهاب في الشعب الهوائية رفضت قالت لي خلاص انا رايحه وبشرح لدكتوره النساء وش تسوين وهي بتعلمك قلت طيب واسال الممرضة وين طبيبة النساء قالت فوق عندها ولاده قيصرية
واجلس انتظرها على الكرسي لين الساعة 11 المساء جت وقالت لي معك التهاب شديد في البول وفي الشعب الهوائية
وارتفاع الحراره خطر عليك لازم تتنومين وتكونين تحت الملاحظة لان الحراره مضره بالجنين وممكن تسبب ولاده مبكره في السابع وخاصة ان نتائج انفلونزا الخنازير يبيلها ثلاث ايام على ماتطلع
بس هنا عورني قلبي قالت ماعندنا سرير شاغر ولا سرير في حضانة الخدج لو حصل ولاده راح احولك على واحد من مستشفيات وزاره الصحة روحي وشوفي وانا جهزت اوراقك خلاص يله روحي بسرعة لاتاخرين اكثر من كذا

(قدامي يابنات حالات بسيطة يكلمون الدكتوره وتتبسم لهم وتدخلهم على طول التنويم مع انهم جايين بعدي حسبي الله عليهم ونعم الوكيل)

طلعت على الساعة 12 اليل رحت لمدينة فهد الطبية كشفوا علي وقالوا مافيك ولاده ولا اعراض ولاده اذا صار عندك اعراض ولاده مبكره تعالي بس ننومك عشان الحراره لا قوى الامن عندهم ملفك وهم ينومونك والحراره مالها دخل
في الولاده ماقد صارت
والله يابنات درت المستشفيات الايمان واليمامه ها الخايس وكلهم نفس الكلام قالوه ويضحكون علي ورفضوا تنويمي
واتصل الفجر بخالي استشاري في مستشفى العسكري وسالته قالي المسئول عن تنويمك قوى الامن وماله دخل موضوع الحضانه هذا توك في السابع ماتولدين من حراره والمستشفيات الثانية عندهم حق في الكلا م الي قالوه
ارجعي لهم لما رجعت لهم الفجر قالو الدكتوره مشغوله تخيلوا المرمطه الي فيها كملت 24 ساعه صاحية لانمت ولارتحت

وانتظرها على الكرسي لين جت ولما شافتني عصبت ليه رجعتي شرحتلها الموضوع وقلت لها وش قالوا المستشفيات وانهم رفضوا استقبالي ردت علي بنفخ وعصبية انا خلاص حولتك ماراح استقبلك اطلعي من المستشفى جلست ابكي وتنفخ علي لية تبكين قلت انتي تقولين الحراره خطره على الجنين تخيلوا ترد علي وتقول
ايه خطره وش تبين اسويلك خذي خافض حراره وطلعي وتعطيني ظهرها وتروح ((حسبي الله ونعم الوكيل))

ويروح زوجي للمدير المناوب والتافه يرد ويقول دام الدكتوره عيت وش تبيني اسويلها خلاص
ليه من الاول سمعتوا الكلام وطلعتوا مشكلتكم )شفتوا رد الحقير الثاني
الله لايوفقهم رحت للبيت ونمت من التعب وصحيت اليوم الساعة 10 بزوجي يصحيني يقول قومي حرارتك مرتفعة
اوديك المستشفى قلت لا بتوكل على الله وباخذ خافض الحراره ومضاد لانفلونزا الخنازير كتبوه لي
ولما انخفضت حرارتي شوي اخذت الابتوب وقلت افضفض مع اخواتي بنات عالم حواء الحبيبات
عشان تدعون لي ربي يشفيني ويخليلي جنيني والله خوفوني علية حسبي الله عليهم

دعواتكم تكفون وعذروني على الاطاله