حامل ..وحيده..في الغرب..(منتريال)

هلا أختي

ألف ألف مبروك على الحمل ربي يثبته ويفرحك بمولودك يارب وهو طيب وبصحة وعافية ويارب

حبيت أفيدك باللي سويته أنا...صحيح مني في مونتريال بس كلنا في الهوا سوا.......أنا حامل للمرة الأولى الحمدلله..

ومن عرفت ..رحت اشتريت دفتر قسمته أقسام..قسم لمواعيد المستشفى وكل زيارة أكتب ايش صارلي وقسم لأدعية الولادة وآيات تسهيل الولادة وأعشاب وأكل النفاس وهذا كله جبته من قسم الحمل والولادة هنا في المنتدى وقسم مشتريات البيبي

وصرت أدخل مواقع محلات البيبي زي Mothercare و Babies R Us و غيرهم ومحلات كثيرة..وأقارن محلات السرر وأسجل عندي السرير سعره كذا من المحل الفلاني...وراعيت حجمه مايصير كبير على غرفة النوم حقتي..

والعربية...حطيت كذا وحدة وكتبت قدام كل وحدة سعرها والمحل حقها ومميزاتها...

والبانيو في هنا يجيكي ستاند من فوق طاولة تغيير الحفاضة وتفتحيها تلقي تحتها بانيو..ومن تحت أرفف تحطي الشمبوهات والحفايض..فكرته حلوة و2 في 1 يعني طاولة تغيير وبانيو....

الملابس لاتكثري أبدا بعدين لما يصير ان شاء الله 3 أشهر روحي معاه السوق واشتروا...أنا من كل موقع كتبت مثلا فنايل داخلية 12 حبة من سن 0 الى 3...

كم لبس شتوي وبطانية شتوية....والمهاد أو مدري أيش تسموه قماط....ماما أرسلتلي هوا من الرياض...

الرضاعات مافكرت فيهم...وبس سجلت وحدة صغيرة للموية....وكمان عجبتني زبالة الله يكرمك من ماركة Tommy تشيل تثريبا 60 حفاضة ميزتها تمتص الريحة ولا تطلع أبدا روائح...

ماراح أطول عليكي بس صدقيني يكون عندك خلفية عن كل الأسعار ووين تلاقي الأشياء...وقلت ان شاء الله بس أدخل السابع أشتري كل الأشياء مرة وحدة..

وكمان في نفس كل موقع تشتركي وتطلبي الكاتلوج ويجيكي..عندي كتالوجات كثيرة..وصرت عارفة الأسعار ووين أرخص وأيش أحسن

لاتستعجلي وتشتري أي شي قدامك..لأنك بعدين حتحوسي في الأشياء..اكتبي اللي تحتاجيه واتصفحي النت كثير

الله يسهلك أمورك يارب :26:

حياك الله marmora .....
وعليكم السلام ورحمه الله وبركاته .........
اولا الف الف الف مبروووووووك وعقبال ماتقومين بالسلامه وتقر عينك بشوفه المولود يارب......:26: :26:
عزيزتي بالنسبه لاغراض الطفل حاولي تستغلين التخفيضات راح توفر عليك كثير لاني صرفت بالهبل وشوفي البضاعه قبل بالنت علشان ماتتعبين لمن تروحين المول ......
الاشياء الاساسيه الكار سيت لانك ماتطلعين البيبي من المستشفى الا وهو معك وحاولي تختارين نوعيه كويسه وتكون مريحه نوعا ما الماركه اللي عندي ياعزيزتي (GRACO)...
طبعا عمليه ورهيبه وماقصرت معاي في المطارات وتكون مجموعه مع العربه لان الى اربع شهور احسن يكون في الكار سيت احفظ له من العربه لحالها .........
هذي نوعيه منها
طبعا السرير ومفرش البيبي اذا كنتي ماراح تشحنين معك حاول ماتاخذين شي مكلف ونفس الشي المفرش ومو شرط يكون مكلف في شراشف حلوه بس يعتمد على الذوق والرواقه بنفس الوقت <<< تقعد في المحل 4 ساعات .......
في عندك مثل هالنوعيه ....
وفي بعد مثل كذا ... وهذا ميزته معاه تغيير للبيبي بس اهم شي تكون مريحه في بعضهم مو مرررررريح نهائي......
طبعا هذي الاشياء الاساسيه حاولي ماتتكلفين كثير لان الثلاث الشهور الاولى مايبين اللبس على البيبي كثير ولاتكثرين وراعي مساله ولادتك سواء في الصيف او الشتاء .....
يعني اهم شي الملابس الداخليه حول 10 حبات وباقي الملابس قطنيه ومرتبه .....
بالنسبه للرضاعات انصحك بالرضاعه الطبيعيه ولا باس من رضعتين للمويه والاعشاب ...
بالنسبه للبانيو فيه نوعيات كثيره اهم شي تجبين الاسفنجه اللي تحطينها على البانيو تريحك
اكثر وطبعا مجموعه الشامبو والصابون وفرشاه الشعر ومقص الاظافر كلها تجيك مجموعه وحده ........
ومقياس الحراره تحتاجينه بعد واهم شي معاناه الشهر الاول المغص وعندك هذا رهيييييييب
وحده بوحده
طبعا الاشياء اللي اتوقع انها مو موجوده عندكم الاعشاب الخاصه بالنفاس مثل الحلبه والرشاد المره خوذيها معك للمستشفى <<< توصيات امها ياحبيلها ........
وش بعد ان تذكرت شي زياده رجعت لك ........
ايه صح هذا موقع Babies R Us
اتمنى اكون افدتك ياعسل والله يسهل عليك يارب ويرزق كل محروووووم ........
عجوز طخمه .......:rolleyes:

السلام عليكى



:26: مبروك الف مبروك :26: :04:

وعليكم السلام....
مبروووووووووووووووووك الف الف الف مليون تريليون مبروووووووووك على الحمل... والله يعينك ويهون عليكي وعلى جميع الحوامل... ويولدنا بالسلامه ويرزقنا بالطفل المعافي السليم... ويرزق كل محرومه ... آآآآآآآآمين

شوفي... شي طبيعي الوحده اول ما تحمل تجيها حمى شراء اغرااض البيبي... بس انتي لا تتسرعين ... >>>>>>>>>>> صيري ذهينه مثلييييييييي :01:
انصحك انك تصبرين ... ومثل ما قالت بشاير .. قارني الاسعار بالاول.. وشوفي وين الاسعار الانسب... وما دام انك توك حامل احسن شي انك تصبرين الا بعد الكريسماس لان الاسعار تكون خياااااااااااااليه جدا جدا ... فاصبري احسن الا الكريسماس :42: لا تقولين بعيد انا ابي اوفر عليج..

وهذي لستة الاشياء اللي قلت باخذها للبيبي... ياريت اللي عندها اضافات او تعليق على شي ماله داعي تقولي... (ترا اول بيبي ومالي خبره ابد :44: )

-ملابس داخليه / بجامات / طاقيه (قبعه) / فوط شي كبير وشي صغار / بطانيه خفيفه وثانيه ثقيله / شرابات / مهادات / جاكيت اذا كان برد

- سرير / مرتبة السرير/ كرسي السياره/ عربيه/ بانيو /رضاعات / شنطة البيبي/ مفرش للسرير/ طبعا اغراض السباحه من شامبو وكريم وبورده ............

انا بعدي ما شريت شي الا كم قطعه بس... انشاالله هاليومين بروح اشتري الملابس وهذي الاشياء..
اما الاشياء الكبيره فحطيت بالي على كم شي... انشاالله بنشتريهم على الشهر الجاي او اللي بعده....

السرير راح اخذه يمكن من وال مارت wal*mart ما ادري اذا عندكم بكندا بس هو ماركة فيشر برايس... وشكله مرتب وكبير.. وسعره مناسب بعد
العربيه مع الكارسيت انشاالله راح اخذهم من قراكو graco بس الا الان ما استقريت على شكل...

ومثل ما قالت العجوووووز :42: babies r us عندهم اشياء روعه للمواليد...

اول شي احب اشكركم كللللللللللللللللللللللكم على ردودكم و على مساعدكم ...

فعلا انا ما حاطه في بالي اشتري من الحينه لان بعده بدري .....بس حبيت اسال علشان اعرف المحلات و اشوف شو الاشياء الي ممكن تكون غايبه عن بالي و استفيد منكم

الملابس فعلا الاطفال يكبرون بسرعه ...فحاطه في بالي اشتري يعني 12 حبه ملابس داخليه و بجامات لكل عمر ....لان يحتاجون تغير على طول و يكبرون بسرعه و تتغير المقاسات

شكرا بشاير ...نبهتيني على الزباله لا كانت غايبه عن بالي ...و ماذر كير للاسف مب موجود عندنا ... و مع ذالك بتصفح الموقعين اخذ افكار

شكرا عجوز طخمه...و شكرا على الصور و هذي العربه كبيره مافي بديل عنها للطفال لاني داسما اشوفها و اتازم من حجمها ...و السرير غريب اول مره اشوفه ...و فكرت اشتري سرير واحد يكون مناسب الا ان يكبر الطفل علشان ما احتاج اغير اذا كبر

الثلج المتساقط شكرا على مرورك و الله يبارك فيج

شكرا sugar ... و عندنا وال مارت ...بروح اشوف شو عندهم يوم بتسمح الظروف

حبيت اسالكم عن طاولت التبديل ...الي تحتها حوض لسباحه الطفل ...في منها نوعين

وحده تجي بس الحوض و الغطاء يكون مكان التبديل ... و في نفس الشي بس يكون تحتهم ادراج ...اي وحده منهم افضل

هذي الصوره جبتها من موضوع اخر بالمنتدى و فيه الي اقصده


و شكرا لكم كلكم مره ثانيه
:27: