حامل ولله الحمد والشكر

السلام عليكم ورحمة الله وبركاته

وش اخباركم بصرحه اشتقت لهذا القسم لي مادخلت اكثر من شهرين

كنت مدمنه عليه اذا مامر عليه يوميا مارتاح بس انقطع النت عندي وتوه رجع

بصراحه احترت وين اكتب الموضوع وقلت بما اني استفدت من هذا القسم كثير بحاول افيدهم بتجربتي

اول شي باركولي لاني بسم الله ماشاء الله حامل ولله الحمد والشكر وعقبال كل من تتمنى يارب

تزوجت من اكثر من سنه وحملت في اول شهر وسقطت ومن وقتها لي تقريبا سنه انتظر الحمل

بس الله ماكتب الا هالوقت سبحانه اكيد له حكمه

وطول السنه احاول بزوجي اروح المستشفى بس هو كان رافض يقول تو الناس ومثل اكثر المتاخرات بالحمل

وقت الدوره كان هم مايعلم فيه الا الله وكل دوره ازن على زوجي واقول انت السبب ماوديتني اشوف المشكله

وقبل 3 شهور تقريبا وافق يوديني وبنفس الوقت اخذت ارقام حريم يعالجون عشان وقت الدوره اروح

واتاكد من المستشفى ومن الحريم وش المشكله وكنت راسمه كل شي ومخططه احل المشكله

وبالفعل رحت للمستشفى وقالت الدكتوره ان هرمون الحليب عندي مرتفع شوي

وعطتني حبوب الدوبرجين اتوقع اسمها كذا مو متاكده الي تاخذ تدريجين نص وبعدين وحده وبعدين 2 باليوم

وقالت لي راجعي بعد 3 شهور واذا مانزل راح تستمري 3 شهور ثانيه وقتها بجد تحطمت حسيت هالوقت مره

كثير اعوذ بالله من الشيطان سويت وقتها مشكله لزوجي انت السبب انت ماوديتني بدري بس هو كان مقدر

وهداني وقال هذا كله بيد الله والدكتوره تقول افتراضات بس ماتدري متى الله يرزقك

هذا الكلام كان في اليوم 15 من الدوره ورجعت من المستشفى على بيت اهلى لان زوجي كان بيسافر

ولا اخذت الحبوب الا اليوم الثاني لاني كنت متردده استمريت على الحبوب اسبوع بغت تذبحني للحين مادري

كيف تحملتها هالاسبوع رجع زوجي من السفر قبل وقت الدوره بيوم وعلى طول على المستشفى ورحت

لدتكوره ثانيه مارتحت للاولى وقلت غيري هالعلاج ماقدر اتحمله قالت خلاص اتركي هذا بالتدريج وبعد الدوره

ابدئي بالنوع الثاني ماعرف اسمه بس الي نص وحده مرتين بالاسبوع

واول مره من يوم تزوجت انتظر الدوره بدون خوف لاني متاكده انها بتجي ومتاقلمه مع الوضع تمام

واقنعت زوجي اذا جات الدوره روح للحرمه تعالج بعد امر الله يمكن عندها حل

وكانت دورتي منتظمه تاخرت يوم يومين قالت يمكن من العلاج بس لما تاخر 5 ايام ولاول مره حسيت بخوف

وعلى طول شريت الجهاز وزوجي مايدري وطلع ولله الحمد خطين بس بعد ماكنت مصدقه ولا قلت لاحد

وبعد اسبوع رحت مع زوجي المستشفى وتاكدت وماكنت مصدقه اول مره انتظر الدوره ببرود وكنت مستعده

نفسين والي شككني الدكتوره الاولى تقول صعب الحمل مع ارتفاع الهرمون بس الدكتوره الثانيه لما سالتها

كيف حملت والهرمون مرتفع قالت كثير يعتقدون ان اي ارتفاع يمنع الحمل او يسبب الاسقاط بس هذا اعتقاد خطاء

الهرمون مايمنع ولا يسبب اسقاط الا اذا كان اكثر من 100 واراده الله فوق كل شي

الحين لما اذكر نفسي الومها كثير لاني لما عرفت ان الهرمون مرتفع زعلت وبكيت وسويت سالفه لزوجي

واقول 3 شهور كثير وماكنت ادري اني بهالوقت ولله الحمد حامل احس كنت غبيه حتى زوجي يقول ماراح انساها

وسبحان الله طوال هالسنه الله مارزقني ولما اراد رزقني بدون اي حول مني ولا قوه ماسويت في الشهر

الي حملت فيه اي جديد عن بالقي السنه الا ان اراده الله تمت وكنت ادعي بالتهجد واخواتي يدعون لي

والحمد لله الله استجاب لدعائنا

وعلى فكره فيه موضوع انا قريته هنا استفدت منه كثير بس والله ناسيه صاحبته الله يجزاها الف خير

وربي كل ماذكرتها ادعي لها

كانت تقول انها راحت لحرمه وقالت لها ان الرحم عندها مايل وقالت اعراضه وحسيت انها فيني وقالت كذا طريقه

عشان الميلان هذا ماياثر ومن اهمها ان تحطي مخده تحت ظهرك وقت او بعد الج ....

وكمان قالت عن الوضعيات المناسبه وحاولت اطبق شوي من كلامه ويمكن يكون ساعد بعد امر الله في الحمل

وحولت ابحث عن موضوعها وشكرها بس مالقيته الله جزاها خير ودايم ادعيلها بالي تتمناه

هذا هو موضوعي حبيت ابشركم فيه وكمان اطمن الي هرمون الحليب عندها مرتفع ان مافي شي مستحيل

مانسى وحده ردت في احد المواضيع وقالت انو اذا الهرمون مرتفع لو نص درجه مستحيل تحملي نفسي اشوفها

الحين واقولها كل شي بيد الله ماتدري كم احزنت واحبطت بنات بكلامها الله يهديها

واتمنى انكم استفدتوا لو بشي بسيط لاني استفدت منكم كثير يكفي وقفتكم جنب بعض

الله يرزق كل من تتمنى بالذريه الصالحه المعافاه ويتمم على الجميع بالخير

واتمنى دعواتكم لي بثبات حملي وتيسير اموري لاني تعبت كثير مع الحمل بس كل شي يهون