حاول يفهمني انه يكرهني بس مافهمت توني افهم

ياخواتي فالله ابي مشورتكم والله حسبي ووكيلي ..

من اول ماتزوجته ومبين انه مو ذاك الزود علي بس ماكنت اصدق كنت اوهم نفسي باعذار له عشان تمشي الحياه وهذاني وصلت الى مرحله حرجه والقرار فيها صعب جدا نظرا لوجود طفل والمشكله تعقدت اكثر وتمنيت الحين لو اني من اول حليت المشكله واخذت قرار حتى لو كان صعب في وقته على الاقل كان ضرره بيقع علي وحدي لكن الحمد لله على كل حال وانا مو مشكلتي يمكن البعض ما يشوفها مهمه لكنها بالنسبه لي مهمه جدا لكن مابي الامور توصل للطلاق بس عشان خاطر عيون وليدي وان المشكله يمكن تنحل ماهي مستحيله ولسه فيه امل بس انا تعبت ولاادري وش اسوي.؟.
مشكلتي اني احس ان زوجي يكرهني..
من اول ماتزوجته ماطلب يكلمني زي الناس انا اللي طلبت لما شفته تاخر ..
واحنا فشهر العسل قالي لما ترجعين اقعدي عند اهلك عشان تشبعين منهم قبل مانسافر..
لما سافرنا ماجاني الا بعد شهر تقريبا..
لما طلبت احمل رفض بحجة الدراسه رفضا باتا ولما كبرت المشكله وافق ولما ولدت كنت ابكي احيانا فالليل من الضيقه والهم وقل النوم وبكا ولدي ولاجا يساعدني..
بعد ماولدت قال وش رايك اوديك لاهلك وارجع اخلص الاجراءات وصار اللي بغى وراح وقعد شهور طويله مارجع بحجة تعقيد الاجراءات..
ولما رجع واخذنا بعدها بشهور قليله ونتيجه لاني ماطلعت معه ولامره لوحدنا ونتيجة الحاحي عليه باننا لازم نخرج مع بعض قالي اذا حبيت تروحي لاهلك ترى ماعندي مشكله..قلتله ورمضان قال بدبر نفسي المهم مابيك تشغليني بالطلعه انا مو فاضي ابدا عشان الدراسه وبعدين قال عذر ثاني الا وهو تحويش الفلوس وبعدين هدينا وهدت الاوضاع وطلعنا وسافرنا ..طيب وين راح الانشغال اللي قبل كنت تقول عنه؟؟!!
اكتشفت بالصدفه انه يساعد بنت فمنتدى مساعده انسانيه بس اتضايقت مره لانه ماقد سواها وماقالي عنها الا بعد ماقالت انها بتجي للبلد وسألني هل نسكنها فالشقه اللي جنبنا بتفضى والا بعيد؟واكتشفت ايضا انه كاتب بحث مع بنت يونانيه ومارديت الا بالصدفه وهي تقريبا كانت يوميا تطلع عالمسنجر تكلمه ولما رحت مره معزومه رجعت بدري ولقيته يكلمها انقهرت ماتوقع انه في شي وفنفس الوقت مستغربه والله وحده العالم بحالي المهم مو بس كذا الادهى انه طلع يكذب علي وقالي انها ايطاليه وانا اللي اكتشفت انها يونانيه لما كلمتها عالمسنجر عشان اعتذر من خربشة ولدي ..
ليش كذب علي طالما مافي شي؟؟يقول عشان ماتظنين انها نفس البنت الي قلت لك عنها من زمان انها حلوه وهي كانت يونانيه ..قلتله واذا كان ..قال اعرفك بتسوين مشكله وتكبرين السالفه ..قلت لا طالما مافي شي ماراح اسوي شي
المهم انا حتى قلت فنفسي هو ليش قالي انه عندنا بنت حلوه وكيف سمحتله..
لايجي فبالكم اني حلوه او مو حلوه ماراح امدح فنفسي ولااذم فالمنتدى العام بس كل اللي اقدر اقوله اني قاعده احاول جهدي اني اقوم بواجبه وصحيح انو ولدي ماخذ تقريبا كل وقتي لكني احاول..
هو الحين صاير ينتقدني دايما وعالصغيره والكبيره
وقليل جدا مايقعد معي قالب ليله نهار ونهاره ليل لين قمنا نام والعكس ولما قمت له بدري عشان اقعد معاه طلع للجامعه يقول مابي اتاخر ولو اني نايمه كان ماطلع الا بعدي بساعتين زي عادته ..
مايقعد معنا الا ساعتين تقريبا فاليوم بينما اكتشف كثيرا انه قاعد عالنت يلعب ورق يقول وقت راحه ..طيب وقت الراحه ماينفع تعطيني ياه..
وفنفس الوقت يقول بيسفرنا لمكان قريب ..مع انه كلما تجي سفره يقترح علي انو نطلع مع جماعه اصحابنا وفعلا هذا اللي صار سفرتين راحوا مع الاصحاب ماكنا نجلس سوا الا فالفندق وعلى طول ننام من التعب يعني ماكنا مسافرين مع بعض اساسا احس انه يبغى يبعد عني بشتى الطرق وبزعمه بيسكتني بالسفرات وهي هروب مني يمكن..حتى لما مره قلتله خنروح مطعم قال وش رايك اعزم عمتي ..ودايما طلعاتنا لوحدنا يكون فيها نكد او اغلبها ..
انا تعبت واحس اني كرهته وودي الحين انفذ رغبته القديمه واسافر بس مااقدر الحين خلاص ..وواقعه فحيره شديده وودي اعرف حقيقة مشاعره عشان اعرف احل المشكله ..وهو رافض انه يعترف باي شي ويقول مافي شي بس انتي تحبين النكد ,,وهو تصرفاته اللي تجيب النكد يبغى يطلعني ويسفرني وياكلني ويشربني بس مااطلب اني اقعد معه هذا وش معناه انا مابغى حياة ماديه بس ابغى بعد مشاعره معي ابغى قلبه لي ابي احس انه فعلا يحبني ..بس مدري كيف ومدري وش اللي مزعله مني والا مين اللي داخل بينا مثلا ومخرب العلاقه بدون مايدري وووووو..
طولت عليكم بس ماصدقت القى مكان ابي افضفض وان طنشتوني منيب زعلانه عليكم بس ان اهتميتوا بكون شاكره لكم جزيل الشكر وجزاكم الله كل خير وحل جميع مشاكلكم..فالله في عون العبد ماكان العبد في عون اخيه..