حبوب الروكتان ......الحل الاقوى والامثل والنهائي لحبوب الشباب (التجربة خير برهان)

ريمو.. :

طيب انا عندي كم سؤال: كم وحده فيكم متعقده من بشرتها؟ :44: كم وحده منكم ماتطلع من بيتها الا وهي حاطه كريم اساس عشان تخفي حب الشباب؟ :mad: كم وحده حامت كبدها من الخلطات وحاليا قاعده تقرأ موضوعي وهي حاطه قناع طبيعي او كيميائي على وجهها بسبب حب الشباب؟ كم وحده منكم تقعد بالسااااعات عالنت تدور حل لحب الشباب؟ كم وحدة تركت اكل الكاكاو والشطة والفلفل لانها سمعتهم يقولون انها تطلع حب الشباب؟ طبعا انا واختي كانت حالتنا مثل اللي فوق مابقى شئ الا وجربناه ,وياما جربنا صابونات نيتروجينا السائلة والجامد سواء ديب كلين او العادية :angry: ومنظفات جونسون clean & clear ,وكريمات ومراهم وصفوها لنا الدكاتره في المستشفيات الحكومية والاهلية ......والنتيجة بشرة تزداد سوءا لدرجة انه وبقدره قادر النفر زااااد بشكل مو طبيعي في وجهي بالذات العام والبنات لاحظوا وكل من شافني قال يابنت الناس وش اللي قاب في وجهك وش انتي ماكله؟ وانا لاتعليق لدرجه اني صرت كل يوم اروح الجامعة وانا حاطة بودره لوريال على وجهي عشان يخفف مظهر النفر وللمعلومية هالبودره خطيييييييييرة وحلووووه انصح الكل يستخدمها وهاذي صورتها طبعا اللي بشرتها دهنية وبقوة مثلي راح تتفهم حالتي بالضبط خصوصا عند ازالة الشعر اذكر اختي قبل من سنتين سوت فتلة,الله لا يوريكم وجها كيف صار كله نفرررررررر وانا اذا شلت كتفي وقسم ان النفر يطلع بشكل رهيييب من بداية الكتف لنهاية الكوع لدرجه ان خالتي لما شافت كتفي قالت يرحم امك بلاش تشيلين مره ثانية طبعا مايحتاج اوصف لكم صدري وظهري كيف كانوا ونفس الحالة مع المحروسة اختي ولو تشوفون مغسلة حمامي وانتوبالكرامة تقولون انكم داخلين صيدلية موحمام ,الغسولات والمنظفات ماااليه المكان. لدرجة اني نويت اني استخدم حبوب منع الحمل لاني قد قريت في الجريدة انها تساعد على تخفيفة وان الكثير من الشابات يستخدمونها بس الحمدلله ربي اغناني عنها طبعا وللخلطات الطبيعية نصيب في اللعب ببشرتي جربت قناع الزبادي والعسل واعوذ بالله كل ماله يزيد مو يخف جربت قناع المرّه وياما نشف وجهي ولا جاب نتيجة جربت قناع الزبادي والبطاطس المهروسة وياما وياما قرفني استغفر على فكره اللي يقول يمكن العيب فيك مو في الخلطات لانك مااستمريتي عليها ,اقووول شهوووور وانا اجرب نوع واحد من اي خلطة ومافاد واللي يقول ان سبب ظهور النفر هو قلة النظافة الشخصية ارجع واقولة نتسبح كل يوم ومع ذلك مافيه فايده احب انبه كل واحد فيه نفر انه مايسوي هالحركه ابدا لانها هي اللي من جد تحفر وتشوه الوجه وبعدها لا روكتان ولا غيره راح يزيل هالاثار فخلوا النفره في حالها ولا تفقعونها المهم اختي خلاص حامت كبدها وقررت انها تستخدم حبوب الروكتان راحت الدكتور ووصفه لها والحين هي خلصت العلاج والله ثم والله ثم والله ان بشرتها طلعت تلق بسم الله ماشاء الله :35: الصدر والظهر والاكتاف والوجه كل واحد يقول الصفااااوة عندي لدرجه انها لما سوّت فتلة مره ثانية بعد العلاج ,ولا نفره تجرأت تطلع على وجهها طبعا خلصت العلاج من سنتين تقريبا ولله الحمد لحد الان البشرة ماشاء الله ماطلع فيها نفر اللهم من كم شهر وحده الله يهديها شافتها وقالت اهب يانورة وين نفرك مير اختفى كله وعلطول من بكره طلعت نفره كبر قريح في وجهها <<ترى ذكر الله زين على فكره حتى صديقتي كتنت بشرتها معدوووومة بالحرف الواحد ياقلبي عليها والله النفر كان كبييييييير وفوق بعض ولمااستخدمت هالحبوب بسم الله ماشاء الله تقولون ان بشرتها ماذاقت شئ اسمه نفر وربي ياعالم اني ماابالغ في كلامي المهم انا من بعد ماشفت النتائج الباهره على اختي وصديقتي<<متعوب عليها كلمة الباهره وانا طيراااان عالمستشفى عشان اخذ حبوب زيها على فكره انا واختي عالجنا في مستشفيين مختلفيين والسبب انها كانت تكررره دكتوري لانه بااارد وانا كنت اكره دكتورها لانه عصبي بس يالبى قلوبهم والله لولا الله ثم هم كان شفتوني لحد الان احط قناعات على وجهي طبعا هم في البداية ماراح يعطونك الحبوب اول ماتطلبينها لازم اول شئ يعطونك كريمات ومقشرات وبلاوي يقولون لك جربيها لشهر واذا مافيه تقدم راح نعطيك الحبوب (قعدت ساعة اقنعهم واقولهم انا مجربة نفس هالادوية بالضبط من قبل ومافيه نتيجه لكنهم اصروا اخلاء للمسؤلية لان الروكتان دواء موسهل ابدااااا له اثار جانبية راح اتكلم عنها ان شاء الله) وعدا الشهر والحبوب هي هي وحولوني عالاستشاري عشان يصرف لي الحبوب اول شئ قام يسأل عن تاريخي وتاريخ العائلة الكريمة الطبي وعن وزني و الخ الخ لكن اهم خطوة اللي من دونها ماااافيه امل يسمحون لكم باستخدام الحبوب الا وهي تحليل الدم عشان يعرفون نسبة الدهون والكليسترول والشحوم الثلاثية والخ الخ بعدها اذا طلعت النتيجه كويسة راح يسمحون لكم باستخدام الحبوب والحمدلله صرفوه لي وبدأنا بالعلاج......... في شهر 7 عام 1430 (العام الماضي) يتبع

طيب انا عندي كم سؤال: كم وحده فيكم متعقده من بشرتها؟ :44: كم وحده منكم ماتطلع من بيتها الا وهي...

ريمو.. :

بعض الاحيان ماكنت الاقي في الصيدلية علب الـ20 غرام فكنت اخذ علبتين من الـ10 غرام واصير اخذ حبتين مره وحده بعد الاكل لازم تنتبهون انكم ماتلخبطون في وقت اخذ الحبوب يعني خلو لكم وقت محدد مثلا العصر مو يجي يوم تاخذ الحبة العصر وبكره تاخذها العشاء ماينفع ابداااا وانتبهوا تاخذون حبه عالريق ماينفعش خاااالص الاعراض الجانبية:تنقسم الاعراض الجانبية الى قسمين:شائعة و نادره الحدوث طبعا مو شرط كلها تصير فاأنا راح احط علامة * عند الاعراض اللي تعرضت لها اولا:النادرة في حال حدوثها لاسمح الله يجب عليك الاسراع بالذهاب الى الطبيب 1_جفاف شديد في العين 2_اصفرار البشرة و العينان أو البول بلون أصفر داكن 3_الشعور بالتعب الغير اعتيادي، أو انعدام الشهية 4-الصداع، الغثيان، التقيؤ، أو عدم وضوح في الرؤية 5-ألم حاد في المعدة، الإسهال، أو نزيف في المستقيم 6_الاكتئاب أو التغيرات المزاجية المفاجئة كالحزن أو الغضب ثانيا: الشائعة :arb: 1-جفاف بسيط البشرة * 2-حساسية في الجلد * 3-جفاف في الجيوب الافنيه +نزيف من شده الجفاف * 4-جفاف الشفاة وتشققها لدرجة خروج الدم * 5-تسبب الم في المفاصل والعضلات وتخلي النفسية زفت 6-تساقط الشعر 7-جفاف بسيط في العيون-أصحاب العدسات اللاصقة طلعوا نظاراتكم الحين! 8-زيادة الحساسية والحروق من الشمس – إستخدم كريمات الحماية من الشمس* 9-تقشر الجلد في راحة اليدين و أخمص القدمين – المرطبات مرة أخرى! 10-جفاف الجلد و الشفاه – ضع كريمات مرطبة لتخفيف هذه المشكلة* 11-إرتفاع الكلوسترول وإنزيمات الكبد في الدم 12-ألم في العضلات – اللي عنده دورة أو بطولة مهمة أنصحه بتأجيل الروكتان 13-العشى الليلي كل هالاعراض تزول بمجرد التوقف عن الروكتان بالنسبة لجفاف الشفاة انصحكم وبشده انكم تخلون لابيلوا معاكم في كل مكاااان لانه مايمديكم ترطبون شفايفكم الا وهي ناشفة بعد فتره قصييرة بالنسبة لي كنت حاطة لابيلوا في شنطة السوق وشنطة الجامعة وعلى التسريحة وعلى المغسلة وفي شنطة الابتوب ويالله السلامة مع أنه في بعض الاحيان ماكان يفيد معي الا حبيب الشعب فــازلـــيــن والله توني احس بقيمته وبالنسبة للحساسية انا تقريبا في الشهر السادس او الخامس <<حسيت اني وحده حامل تسولف جتني حساسية في يدي بس العيب مني لاني ماكنت ادري انها من اثار الروكاتين فلمار حت الدكتور قال حطي كريم او فازلين وبالفعل من ثالث يوم وهي بادية تروح وبالنسبة لجفاف الانف ومادراك ماجفاف الانف الحل الوحيد انك تدهنين خشمك بالفازلين كذا مره في اليوم<< مو قلت لكم اني عرفت قيمة الفازلين جفاف العين الحمدلله ماجاني بس جاء اختي وعلطول وصف لها قطره ترطب العين اما باقي الاعراض من تساقط ونفسية وعضلات والخ فلله الحمد ماجتني. :icon28: طبعا لما جاء شهر رمضان الله يبلغنا واياكم هالشهر الفضيل,صار لي مستخدمته لشهر ونص طبعا خف النفر وانا كنت طماعة كنت ابي العيد يجي وبشرتي تلق فرحت لموعدي وقلت ابي ازيد الجرعة واخليها 40 غرام في اليوم بدال 20 زدتها وياليتني مازدتها الحين على 20 غرام مغير داقتها صداقة مع الفازلين واللابيلو عشان الجفاف ومع ذلك كنت اتجرح فمابالك بـ 40 غرام ولا بعد صيام (شين وقوة عين) اسبوع واحد اذا ماكان اقل وانا على 40 غرام وتوووووبة اذا كررتها كل شئ فيني نشف صرت مثل الانشوفة<< ابدا ماقصدها مثل انهيوك ^_^ ورجعت على 20 غرام ويالله السلامة فالمقصد من هذا كله بلاش عجلة في العلاج. اذكر لمابديت اخذ الحبوب قالت لي بنت خالتي : صدق انك مجنونة احد ياخذ هالحبوب ؟انا صديقتي اخذتها وشوهتها؟البنت صارلها حروق ومدري ايش وماعاد صارت تطلع من البيت واعتذرت عن الدراسة و و و ياسااااااتر كل هذا؟؟ اقول بس انا الحمدلله اخذتها وتمام صديقتي بعد اخذتها وتمام واختي اخذتها وتمام لاننا اخذناها عن طريق طبيب اما اللي مستعجل ويبي ياخذ على كيفيه فذنبه على جمبه لان هالدواء له تأثير على وظائف الكبد والكلى تراني علمتكم واخليت مسؤليتي.اللهم اني بلغت فاللهم اشهد يتبع

بعض الاحيان ماكنت الاقي في الصيدلية علب الـ20 غرام فكنت اخذ علبتين من الـ10 غرام واصير اخذ حبتين...