حبوب فيزان والبطانة المهاجرة

السلام عليكم
سجلت في المنتدى بس عشان افيد البعض عن حبوب فيزان لان مافيه ولا موضوع في النت عربي يحكي عن هالحبوب بشكل مفصل
ولاني في يوم من الايام كنت محتاجه احد يشرح لي تجربته لكن مالقيت ف لعل احد يستفيد
حبوب فيزان وتجربتي معها
الاعراض :
انا عمري 25 سنه غير متزوجه وكنت اعاني من الام الدورة بشكل مرييع لدرجة اني كنت اشيل هم كل شهر بسبب الالم الي راح يجيني , كنت اجلس بالثلاث ساعات ابكي من الالم ومايخف الالم الا بابرة فولترين من اي مستوصف اخذها
كانت الاعراض انه يجيني نزيف بعد كل دورة ب 10 ايام وكنت متخيله ان الموضوع عادي ,امور طبيعيه ,لكن للاسف بعد سنتين من الاهمال كشفت وطلع عندي كيس دموي (بطانة مهاجرة ) على المبيض الايمن , وقال الدكتور ان حجم الكيس ماهو كبير ف مايستدعي عمليةف تم صرف حبوب فيزان لي
المدة:
في البدايه الدكتور ما وضح لي كم المدة الي راح اخذ فيها العلاج هو فقط صرفه لي وقال تعالي كل 3 شهور وبنشوف ايش يصير ولكن اتضح لي بعدين ان اقل شي لازم استمر عالحبوب مدة 18 شهر ( بالنسبة لحالتي )
بديت في الحبوب شهر (12) ديسمبر 2015 ومازلت مستمره بالحبوب والكيس يصغر لكن بشكل ضئيل
علاج البطانة :
طبعا سابقا كان علاج البطانة المهاجرة هو يا عن طريق ابر او عن طريق ازالة الكيس بعملية جراحية لكن حبوب فيزان هي اول حبوب تعالج البطانة المهاجرة
وظيفة الحبوب:
الحبوب وظيفتها انها توقف الدورة الشهريه عنك لان الكيس الدموي هذا اساسا يتغذى على دم الدوره ف عشان ينشف ويصغر حجمه لازم يقطعون الدورة عنه

الاعراض:
الي لاحضته بالحبوب ان النفسية تكون دمار لكن ما احب ابالغ واقول مثل البعض اني يعني في حاله لا يعلمها الا الله ومن هل كلام لكن اقدر اقول فعلا انا متنرفزه بزيادة وصايره حساسسسسه واصيح من اي شي واقدر اقول فيني ملل زايد ( ممكن تكون من امور ثانيه في الحياة مو شرط من الحبوب )
-انتفاخ بالجسم تحسين نفسك كذا منتفخه
- شهيه زايدة ( لكن لا تعطين نفسك هواها تقدرين تتحكمين بنفسك مو تقولين خلاص الحبوب خلتني كذا لا حاربي هالشي)
-ونبهني الدكتور من زيادة الوزن وقال حطي في بالك ترا خسارة الوزن بعد الحبوب جدا صعبه ف احرصي عالمشي لمدة نص ساعه كل يوم
ف عشان كذا حرصت على اكلي وبقدر الامكان قاعدة احاول اخفف اكل عشان ما اسمن
قالو لي من الاعراض الشائعه صداع لكن ماجاني الحمدلله ابدا ولا لاحضت هالشي
ملاحضات مهمه مانبهني عنها الدكتور:
-حبوب فيزان يبدا مفعولها بايقاف الدورة بعد الشهر الثالث
لما تبدين تاخذين الحبوب ماراح تاخذ مفعولها الا بعد 4 شهور , يعني اول 3 شهور الى 4 شهور الدورة راح تكون مستمره بالنزول
بالاول كنت مستغربه ليش ماوقفت الدوره لدرجة رحت استشير طبيب اخر حتى قال لي ان فيزان يبغاله اقل شي 3 شهور على مايستجيب له الجسم
-ممكن تجيك الدورة فجاءه
انا وقفت الدوره عني في الشهر الرابع من اخذ فيزان وبعدها استمريت 3 شهور بدون دورة لكن الصدمه ان الدوره فجاءه نزلت بدون اسباب ولما سالت الدكتور قال عادي استمري عليها وكملت عليه .
- كوني حريصه على وقت الجرعه
مهم جدا انك تكونين حريصه على وقت الجرعه , انا مره نسيت اخذها يومين ورا بعض وسبحان الله بدت على طول تجيني افرازات دمويه بلون اسود ف احرصي انك تكونين عالوقت بالضبط .
معلومات عامه :
الحبوب جديده ماطلعت الا في عام 2011 عشان كذا تلقين مواضيع قليله عنها في العربي لكن لو بحثتي بالانقلش راح تلقين اكثر من موضوع
سعر الحبوب تقريبا :238 ريال وفيها مايقارب 28 حبه ويعتبر غالي لكن العافيه اهم من كل شي
والحبوب ماتصرفها المستشفيات الحكومية
وبس
امانه الي تقرا كلامي تدعي لي ان ربي يشفيني ويسعدني واهلي ومرضى المسلمين ويرزقنا العافية والصحة على الدوام