السلام عليكم
هلا فيكم حبيباتي عندي نصايح خفيفه ومهمه لكل زوجه تتشكى من تعامل
أهل زوجها السيئ معها لإنه كثرررت الشكاوي خلال هالفتره وفي الغالب
كلها شكاوي و مواقف جدا تافهه تقدر الزوجه بالحكمه والعقل تتفاداها
وتريح بالها وتعيش بسعاده ...
النصايح إلي بطرحها بتكون على حسب المواقف إلي قريتها من العضوات
بالمنتدى و إن شاء الله تستفيدون ولي حابه تضيف نصايح و توجيهات
حياها الله تتفضل ...:)
حبيبتي الزوجه : إعملي بأصلك مع أهل زوجك ( آم و أخوات ) وبادري
بالطيب والتعامل الراقي ولا تنتظرين منهم شكر وعرفان ، وإذا أنتي من
النوع إلي ما يتحمل الجفاء فالأفضل هنا تتعاملين معهم بالمثل
آتصلو عليك بالمناسبات وقدروك إعملي مثلهم ، آهدوك أهديهم ، تجاهلوك تجاهليهم
وبكذا ترتاحين من الضغوط النفسيه إلي بتتراكم مع الوقت نتيجة ضغطك
على نفسك و إنتظارك لتقديرهم و إحترامهم لك !
حبيبتي الزوجه : مو بالضروري أهل زوجك يغلونك ويحبونك ويحبون أطفالك
خففي على نفسك الضغوط هذي كلها ولا تهتمي لها وكثفي إهتمامك
ع الناس إلي تحبك وتقدرك وتعملك قيمه ، أدي المطلوب منك تجاههم فقط
ولا تعطي أهميه لمحبتهم لك من عدمها ولا تعملي مقارنات لتعاملهم معك ومع أطفالك
وبين سلفتك وأطفالها في حالة عاملو الطرف الثاني بشكل أفضل ..
ترفعي عزيزتي عن صغائر الأمور ولا تكبريها وتضخمينها وتصير هي شغلك
الشاغل !! الحياه حلوه إستمتعي فيها قدر الإمكان و إبحثي عن السعاده
والراحه و إبتعدي تماما عن كل ما يعكر مزاجك لإنه بالنهايه الدنيا ماتسوى
نتنكد فيها :)
حبيبتي الزوجه : إذا شعرتي إنه غير مرغوب فيك وفي زيارتك عند أهل زوجك
فالأفضل تخففين الزيارات وتخليها على فترات متباعده وفتره قصيره
تأدي الواجب وتريحي ضميرك بدون ما تلجأين لأسلوب العتب والزعل والضيق !!
حبيبتي الزوجه : تجنبي العتب وتجنبي الشكوى وبالذات للزوج نهائي
لا تشكين أهله عنده إلا في حالة الأمور الكبيره والصعب تجاهلها
أما توافه الأمور فالأفضل غاليتي عدم ذكرها والتطرق لها
لإنه بالنهايه إنتي الطرف الخسران !! وكل رجل في الغالب بيكون بصف أهله
ومايرضى عليهم ...
حبيبتي الزوجه : أخر نصيحه و أهم نصيحه لا تعطي الأمور والمواقف السيئه
بينك وبين أهل زوجك أكثر مما تستحق و إلتمسي لهم العذر قدر المستطاع
وتجاهلي ما يمكن تجاهله و إبتعدي عن التدقيق بكل كلمه وهمسه وحركه
وإحتسبي الأجر عند الله بكل تصرف راقي تعاملينهم فيه ولا تنسي عزيزتي
إن الله يمهل ولا يهمل وكل إنسان بهالدنيا بينال جزائه !
أتمنى تستفيدون من هالنصايح والموضوع يرحب بمشاركات وتعقيبات الجميع
وما يهمنا بالنهايه غير نعيش بسعاده وراحة بال والله يفرج هم المهمومين :redface:...