حبيت أفضفض لكم شوي تسمعوني ؟ولا أضف وجهي

:44:السلام عليكم ياأحلى بنات لأحلى منتدى على الأطلاق

بما أني عضوه جديده فياريت تقبلوني بينكم أنا بصراحه أعتبر نفسي عضوه قديمه لأني معاكم

وبينكم بس من خلف الكواليس ومتابعه وبشده لكل مواضيعكم الشيقه مشاكلكم وأفراحكم ولا ننسى قسمي

المفضل طباخكم اللذيذ والمشهي :)

ماعلينا ندخل بالمهم ماعلي تحملوني وتحملو هذرتي الزايده اذا المقدمه كذا شلون الباقي الله يعينكم


انا متزوجه وعندي 5 عيال ولدين وثلاث بنات صار لي متزوجه 15سنه ماشاء الله تزوجت وأنا عمري 14 سنه

وعمري هالحين 29 وزوجي أكبر مني ب11 سنه

طبعا بما أني متزوجه صغيره فكلمتي هي كلمة أمي الله يحفظها ويخليها لي

وتعرفون انتو طبع امهاتنا هاالله هاالله بزوجك لا تزعلينا ولا تخلينا ينام وهو زعلان منك ولا يطلع وهو زعلان

ومن هالحكي تعلمت انا من هالشي مستحيل أحط راسي على المخده وهو زعلان مني أقعد اراضيه وأحايله

وأجي على نفسي كثير بس عشان يرضى علي وهو طبعاا عاجبه الوضع يقعد يتدلع ولا يرضى الا بطلعة الروح

ويذلني ذل يابنات والله ماتصدقون انه مايرضى ألا لما أحب راسه وأتأسف له حتى لو هو غلطان طبعاا تعود على هالشي
مع العلم أنه طيب كثير وقلبه أبيض وحنون بس أكيد الخطأ مني أنا الي عودته على هالشي أنا أستاهل

عاد أنا طفشت ومليت من هالوضع تدرين الحرمه لما تكبر تعتز ثقتها بنفسها أكثر وماتهون نفسي علي شوي شوي صرت

اتركه يزعل يوم وماأراضيه وبعدين امتدة المده أكثر وصرت أتركه لما يطيح الي براسه

عاد هو لما يرضى علي بعدين يقعد يتشره علي ويقولي تغيرتي مادري من الي حاشي لك راسك

وأحنا هالحين زعلانين على بعض صار لنا تقريبا 5 أيام وهو الي غلطان علي قاعد يمزح معاي مزح ثقيل شوي

وأنا مادري شفيها عزة نفسي زايده هاليومين زعلت وطلعت من الغرفه وتركته بروحه توقعته بيجي يراضيني بيحس فيني

بس عمك أصمخ لاهو جاني ولا راضاني وقعدت أصيح على حظي شفيني انا من بد هالحريم ناقص والله أني مو مقصره شي بحقه

وأي شي يبيه مجاب

ونمت وأنا متلومه حيل على نفسي عاد قعدت يوم ثاني وقلت لا هالحين بكلمني وصار العكس أهو الي زعل ورفع نفسه

وفرش له في الأرض مانام معاي على السرير معلومه (اذا زعل ينام بالأرض)

وأذا حطيت الغداء مايتغداء معانا ولا ياكل شي بالبيت

ابي أعرف هالحين أنا شنو ذنبي وشلي سويته عشان أستاهل هالعقاب

شورو علي يابنات شسوي معاه والله مليت لا تقولون لي روحي راضيه لاني مستحيل انزل نفسي له

يكفي أهانات والله والله تعبت:44:

اسفه اسفه حيل على الأطاله ادري طولت عليكم كثير بس تحملوني وسوري لو كان اسلوبي ملخبط بالحكي

لاني توني جديده وماعندي خلفيات عن صيغة كتابة المواضيع
ولكم كل الشكر