انا حبيت اسجل شكري لهذا المنتدى الرائع، واقول اني فعلا استفدت منه بشكل كبير.
من حوالي خمس سنوات بديت اصبغ شعري، وكنت اصبغه مرة كل اربع او خمس شهور، بعدين تخبلت وقمت اصبغه وايد .. وفي آخر شهور كنت أصبغه يمكن مرتين في الشهر يوم احس ان اللون مب ضابط .. وفعلا شعري تدمر بشكل فظيع وكان محروق وشكله يروع خصوصاً من الأطراف .. ومستحيل كنت اخليه ينشف بدون سيشوار لأنه شكله الطبيعي كان صعب جداً.
بس لما اشتركت في المنتدى هني، وبديت اقرا الوصفات والخلطات اللي تقدمونها لنا، بديت اراجع نفسي وقررت احاول إنقاذ ما يمكن إنقاذه من شعري.
وفعلاً قررت ....... لا صبغة بعد اليوم
الخطوة الثانية طبعاً كانت معالجة شعري.
في البداية قريت عن وصفة فيها ثوم .. وصراحة كانت واحدة من اهلنا تنصحني دايما بالثوم وتقول لي انتي ما وراج زوج ولا شي، يعني خذي راحتج مع الثوم بدون ما تخافين انج تزعجين ريلج .. بس انا ما كنت اطيع.
بس عقب قررت اني اجرب.
وفعلا خذت خلطة من المنتدى ..
مجموعة من الزيوت حسب الرغبة، أنا شخصياً كنت استخدم (زيت الصبار + زيت اللوز + زيت حبة البركة + زيت الخروع + زيت الخس + زيت النخاع + زيت الثوم + زيت الجرجير) وندق راس ثوم ونخلطهم ونسخنهم شوي على النار .. شوي مب وايد يعني ما نخليه يغلي مثلاً .. وعقب ما يبرد ندهن به الشعر ونخليه لمدة 8 ساعات.
وهالكورس يستمر لمدة 6 اسابيع بشكل منتظم .. يعني مثلاً كل يوم أربعاء من كل اسبوع.
انا كنت اخليه الاربعاء على اساس عندي عقبه يومين اجازة ويالسة في البيت.
وبالنسبة للريحة .. انا صراحة كنت اغسل شعري وايد .. يعني مثلا 5 او 6 مرات بالشامبو وافركه عدل .. وطبعا عقب السبوح لازم بنحس بالريحة شوي، بس ممكن التغلب عليها بماي الورد مثلاً .. وصدقوني ماحد تأذى من الريحة ابداً .. حتى مخدتي ما كانت تمسكها الريحة نهائياً.
وبصراحة حسيت شعري طول شوي مع انه اساسا نموه بطئ جدا جدا جدا.
الوصفة الثانية بعد خذتها من المنتدى ..
ملعقتين حبة البركة مطحونة + ملعقة عسل + بياض بيضة .. بس طبعاً انا اضاعف الكمية عشان تكفي شعري.
نخلطهم ونخليهم في الشعر لمدة ساعة واحدة بس.
والنتيجة...............
انا بروحي ما صدقت .. وفي حياتي ما استخدمت اي وصفة وظهرت نتيجتها بهالسرعة.
شعري صار احسن بوايد .. وشكله حلو .. ونعومته ردت .. وتمويجته طبيعية..
والأهم إني نسيت شي اسمه سيشوار نهائياً.
ومن كثر فرحتي بهالوصفة قمت اسوي لها دعاية وانصح فيها كل اللي اشوفهم.
واعترافاً بالجميل لقيت من واجبي أن احط هالموضوع واشكركم لآنكم ساعدتوني أرجع شعري مثل ما كان.
ويمكن بعد تكون في واحدة من الأخوات ما لحقت على الموضوع القديم فممكن تستفيد من الوصفة الحين .. لأنها فعلاً مفيدة .. خاصة حبة البركة.
واسمحو لي على الإطالة.
تحياتي
تسلمين على هالموضوع وشي رائع منك انك تقولين الخلطات اللي استخدمتيها وتاثيرها على شعرك حبوبه..
جزاك الله كل خير عيوني..
اختك..
سبائك العسجد..