حبيت افيدكم بتجربتي في آيات تثبيت الحمل..ومابغا منكم الا دعوه حلوه في ظهر الغيب.

السلام عليكم بنات..
انا اليوم حبيت افيدكم زي مادايما بستفيد منكم..وما اتمنى غير دعوة في ظهر الغيب لي ان الله يحفظلي زوجي وذريتي ويرزقني الذرية الصالحه اللهم امين..

انا موضوعي هذا عباره عن اجتهاد من نفسي لا اكثر ولا اقل..يعني بليييز لاتجي وحده تقولي من وين جبتي كذا ولا ايش الدليل..والحمدلله ماشاءالله ربنا ماخيب ظني..

انا يابنات قصتي مع الحمل قصة..
الحمدلله ماشاءالله حملت 3 مرات..وكل حملاتي بنزيف ودم ومستشفيات وتنويم وكلللللللل انواع المثبتات اللي في بالكم اخذها ..يعني والله اتعب تعب الله يعلم فيه..هذا غير الراحه التامه وماتحرك لازم حتى اصلي في السرير فكانت نفسيتي تعبانه .خاصة حملي الثاني جاني انفصال جزئي بالمشميه..
المهم لما حملت في الحمل الثالث اول ماعرفت بكيييييييييييييييت خفت يصير اللي صارلي في الحمل الثالث..وانا معد اقدر ارتاح هالراحه التامه لان عندي كان طفلين لازم اهتم فيهم حتى بوجود الشغاله..
المهم بدا حملي الثالث الشهر الاول مانزل دم انبسطت(انا حملاتي اللي قبل الدم من الشهر الاول)واتفائلت خير..بدا الشهر الثاني كمان بدون دم وحسيت ان ربنا بيعوضني ..لكن ماتمت فرحتي الا بدا الدم في نص الشهر الثاني..وحسيت ان هذا قدري ونصيبي في الحمل لازم هالتعب النفسي والصراع من اجل البقاء..
وفي نفس الوقت زي ماقلتلكم عندي طفلين قبل..فحسيت اني خلاص معد بيدي شي..تخيلو اخذ ابر مثبته كل 3 ايام وحبوب وتحاميل تثبيت..والدم (زي الكدرة بني)يروح يوم ويرجع بعد يومين وهكذا<<يعني لعب اعصاب وتعب نفسي..

قمت قلت مافي الا الرقيه والحمدلله كنت ارقي بطني انا من قبل..بس سبحان الله دخلت موقع ولقيت عن ايات تثبت الحمل بعد الله..وفعلا ماشاءالله لاقوة الا بالله..كانت تنزل الكدرة علي واخاف بس ارجع واوكل امري لربي وقلبي يرتاح بان ربي مارح يخيب ظني..
فحبيت اني افيدكم بالايات اللي كنت اقرها يوميا ..قبل النوم..وكل ايه اكررها 3 مرات واللي تحتها خط كنت اكررها 3مرات او اكثر....ياللا اطبعوها او اكتبوا معي::


1-(الم نخلقكم من ماء مهين/فجعلناه في قرار مكين/الى قدر معلوم/فقدرنا فنعم القادرون).المرسلات20-24


2-(لكل نبأ مستقر وسوف تعلمون)الانعام 67


3- (وقيل يا أرض ابلعي ماءك وياسماء اقلعي وغيض الماء وقضي الامر واستوت على الجودي وقيل بعدا للقوم الظالمين)هود44

4-(فالله خير حافظا وهو أرحم الراحمين)يوسف


طبعا بالاضافه الى المعوذات والرقيه الشرعيه المعروفه..ونسيت اقولكم يفضل تقرين هالايات وانتي يدك على بطنك وانتي بتدهنين عليه زيت مقري عليه..


وزي ماقلتلكم هذا اجتهاد شخصي مني..يعني لاتجي وحده صاروخ ارض جو وتقولي مافي دليل على كلامي والخ.


انا بس قلتلكم كذا لاني فعلا حبيت افيدكم..ومابغا منكم لاشكر ولا شيء..بس ابغا دعوة في ظهر الغيب بان ربي يحفظلي زوجي وعيالي ويبلغني فيهم ويخليني لهم آآآآمين..