حبيت انقل لكم تجربتي مع اشعه الصبغه

السلام عليكم ورحمه الله وبركاته ..

دائما البنات يسألون عن اشعه الصبغه ..

حبيت اني انقل لكم تجربتي مع اشعه الصبغه . لاني الشهر هذا سويتها .

اول شي الاشعه هذه لازم تتسوى بين ( ثامن و عاشر ) يوم للدوره .. يعني لو صار عقب ما يصير ما لها نفع ( هذا كلام الاخصائيه اللي سوت لي ) !!

طبعا ما يكون في جماع من اول يوم الدوره ليما تسوين الاشعه ..

ثاني شي .. تلبسون لبس العمليات . الازرق . يعني احسبوا حسابكم انها مثل العمليات .

طبعا دكتوره اللي تسويها .

اول شي . تطلب الدكتوره منج انك تدخلين الحمام .

ثاني شي تقعدين على سرير العمليه . و يحطون جهاز يشبه السونار بس حديد عشان يثبت المهبل . بعدين ابره فيها سائل ( حق الرحم )

بعدين يبدأ الألم . لان في شي يدخل داخل مثل الماي الثقيل . تحسين فيه .. و راح تحسون بألم ( كثير يألم ) انا حيل تعورت .

و بالسونار يبين كل شي . انا السونار كان خلفي على الشاشه فما شفت شي . الدكتوره اهي اللي شافت . و ما تقول غير ( فري نايس ـ ممتاز ) و بس .

بعدين يطلع دم من المرأه يعني انا طلع مني شوي دم مو دوره لا بس شوي دم . استمر معاي يومين وراح . ( استحاضه )

عطتني التقرير . و دخلت فيه على الدكتور ( استشاري ) في مشتفى هادي اسمه ( عصام )

قرا التقرير و قال الحمد الله ما في شي . و ما عندك اي انسداد ..

بس الالم اللي حسيتي فيه الظاهر فيه شوي التصاقات . و راحت ..

الحمد الله على كل حال .

طبعا لشهر هذا راحه لا دواء و لا ابر ولا اي شي .. هدوء . وراحه للرحم و لجسمي ..

حاسه جسمي خرب و السبب الابر و الحبوب ( كلوميد )

و ناطره الدوره تجي عشان أبدأ كورس جديد من الابر و الكلوميد ..

ادعوا لي بالذريه الصالحه يا رب .

وعسى ربي يرزق كل محرومه ، و اي سؤال ثاني انا مستعده اجيب عليه ...