السلام عليكم و رحمة الله و بركاته
إزيكم حبيباتي و أخواتي من الأمهات ... حبيت أحكيلكم عن تجربتي مع بنتي في تعوديها على الحمام .... لأني دخلت كتير و قليل على النت عشان أستفيد من خبراتكم السابقة لكن معظم اللي قريته كان كلام نظري و علمي ... و كنت بدور بين السطور على خطوات أعملها و أشياء بديلة إذا فشلت في بعض المحاولات ... و الحمد لله أقدر أقول إني نجحت في تجربة هذا الكلام النظري اللي قريته و طبقته عملي مع بعض الإضافات و التجارب من عندي
نبدأ بسم الله الخطوات في نقاط متسلسلة
أولا : قبل البدء في التعويد لازم تدخلي على النت و تعملي سيرش على الكلمات التالية (تعويد على الحمام – تعويد على البوتي – Potty Training ... إلخ ) و تقري معظم إن لم يكن كل التجارب عشان هتلاقي معظم اللي هيحصل معاكي حصل مع غيرك فتقدري تتصرفي ساعتها
ثانيا : لو دخلتي و قريتي .. أو سمعتي من تجارب الأخرين ... إحذري من الكآبة أو التخوف من الفشل قبل الدخول في التجربة بنفسك ... لأن كل الل هتشوفيه و تقريه عبارة عن أخطاء و مشاكل الآخرين ... لكن مش هتلاقي قصص نجاح (أكيد كلنا بنكتب عشان مشاكلنا :icon33:... نكديين بطبعنا تقولي ايه بقى )
ثالثا و أخيرا قبل أن أحكي تجربتي : إستعيني بالله و بالدعاء ... قولي يا رب نفسي أنجح مع بنتي/ ابني ... يا رب ساعدني و قدرني على التعب و طول أعصابي و بالي عليها ... من الآخر إدعي بكل اللي نفسك فيه
قصتي مع إبنتي
طبعا عشان هي إبنتي الأولى فكان جوايا كسل و خوف أأأأأأأأأأأأأأأد كده هو ... على مش عارفة أبدأ منين و لا اعمل ايه :blink:... و كل ما أقرا أشوف "بسم الله ما شاء الله" في أطفال إتعودوا من سن سنة أو ٍسنة و نص :unsure: ... و أنا أحس إني متأخرة ... بس أجي أشوف ناس تانيين بدأوا بعدي كمان ... يعني أنا أعتبر كويسة برضه أهو و مش متأخرة قوي ... ده غير بقى كلام أمي و حماتي و الأهل و الحبايب اللي ما يتوصوش في العتاب و اللوم :icon30:
قلت خلاااااااااااااااص هبدأ إن شاء الله ... الصيف اللي فات كانت بنتي تمت سنة و نص ... قمت إشتريت بوتي ملون و مرسوم عليه ألعاب و أشكال .. و كان على شكل كرسي .. (خدي بالك فعلا إن الحاجات دي لازم تكون جذابة و مفرحة للطفل) فرحت بيه قوي و قلت لها بصي جبت لك كرسي جديد و بقت تلعب بيه في كل حتة في البيت و تقعد عليه ... كل ده و أنا لسه ما قلتلهاش ده ايه و بيتعمل فيه ايه ... أنا بس بعودها عليه و بحببها فيه
بعدين دخلتها الحمام و قلعتها البامبرز و قعدتها عليه ... قعدت تعيط و تصرخ و رافضة تماما القعاد عليه بالشكل ده .... عااااااااااادي خلاص و لا تتخضي :ohmy:... كل ده بيحصل مع كل الأطفال :-)
طبعا أنا لما شفت الموقف ده دخل في نفسي الكسل و الخوف من قبل ما أبدأ ... بس قلت مش هضغط على نفسي و لا عليها (أم كسلانة قوي :hahaha:)... قمت سبتها (مش بقولكم كسلانة :biggrin: ) ... بس كل كام يوم أعمل محاولة و أقعدها عليه ... و في مرات فعلا نجحت و عملت فيه و في مرات كتييييييييييرة لأ ... أو ترفض تقعد أصلا
فضلنا على الحال ده الصيف كله ... و أنا أسبوع أدخلها يوم و أسبوع لأ .... لحد ما الشتا جه ... قلت بقى خلاص أتوقف عن العمل لحد الصيف القادم (ياااااااااااه دنتي بطيئة قوي :11:)
بس إستني عليا ... هتلاقي بعد كده إني أنا قطعت شوط كبير في تعليمها ... على الأقل عرفتها ده ايه و بنعمل فيه ايه ;-) ... لدرجة إني في أثناء الشتا .. و كل ما تشوف البوتي بتاعها بقت تقولي عايزة أقعد عليه ... تقريبا وحشها و إفتقدته ...
نزلت جبت ملابس داخلية جديدة و ملونة و عليها رسومات عشان تحب تلبسها برضه... و حوالي 3 أو 4 بنطلونات قطن زيادة عشان التغيير و الغسيل و كده
و أهم حاجة كمان إشتريتها هي ... كمية كبيييرة من المصاصات و البونبوني ... عشان أكافئها كل ما عملت :7_5_131:
و أول ما صحينا تاني يوم ... قلعتها البامبرز و قعدتها على البوتي ... و سبحان الله عملت عليه بسهولة أول مرة ... فده فرحني جدا و إداني دفعة إني أكمل :7_5_122:... و لبستها الملابس الداخلية ... و قلت لها إوعي تعملي بي بي في البنطلون ... و بعدها بساعة قعدتها تاني و عملت ... بعدها بشوية نامت و قلت مش هلبسها بامبرز عشان أعرف هتعمل و هي نايمة و لا لأ ... و الحمد لله ما عملتش .. بس أول ما صحيت ... عملت على نفسها و جت مستغربة و قالت لي بصي ... قلت لها كده وحش و إوعي تعملي تاني في البنطلون ... بس طبعا لبستها بامبرز في وقت النوم بالليل ... تاني يوم بقى كانت رافضة تقعد عليه تماما و تصرخ و تعيط ... و مرة واحدة بس اللي قعدت ... و صرخت أول ما عملت إخراج و كانت خايفة و عمالة تقولي بصي بصي و تعيط ... قريت إن ده طبيعي برضه و عادي
تالت يوم كنت محبطة تماما ... مع إنها أول يوم فرحتني ... بس أحبطتني لما بدأت ترفض تقعد عليه و بقت تعمل على نفسها ... و قريت إننا لازم نحببهم في القعاد و لا نزعق و لا نصرخ فيهم خااااااالص ... قمت جبت طبق غسيل صغير و مليته ميه و حطيت فيه ألعابها المطاطية .. و حطيت بالونة ... بس طلعت مخرومة ... فجتني فكرة .. قمت مليتها ميه و قلت لها بصي ... البالونة بتعمل بي بي ... و البط و الوز بيعمل بي بي ... حسيتها فرحت باللعب و كمان عجبتها فكرة البالونة قوي و عجبتني أنا كمان عشان من ساعتها بقت تقولي أنا هعمل زي البالونة
و من ساعتها الحمد لله رجعنا نقعد عليه تاني ... و في أخر الأسبوع خرجت يومين ورا بعض عند أهلي .. و كانت بتيجي تقولي ماما بي بي ... حاولت أقعدها على حمام الكبار ما فهمتش و معرفتش و ما عملتش ... و للأسف إضطريت ألبسها بامبرز في اليومين ... رحت و إشتريت بعدها قاعدة للأطفال و عليها رسوم و أشكال و قلت لها .. بصي جبت لك بوتي جديد ... و حبته قوي برضه الحمد لله ... و من ساعتها و الحمد لله رب العالمين بقت تعمل على حمام الكبار و سابت البوتي و ده ليه ميزة ... إنها كانت لما تزهق من البوتي بتقوم من عليه بسهولة لكن الكبير طبعا عالي عليها و بتقعد لغاية ما تخلص خاااااالص
و الحمد لله في خلال 10 أيام إتعودت و فعلا فرحت بيها جدا و بنفسي و بإستجابة ربنا لدعائي و حسيت فعلا بإنجاز كبير معاها و نجاح
أنا معاكم و هشجع أي أم زيي مع أول أطفالها و هجاوب على أي سؤال
و أتمنى إني أكون أفدتكم و عفوا للإطالة ... لكن حبيت أديكم تفاصيل صغيرة لحدوتة النجاح الكبيرة