حرام والله اللي يصير لعيالي من امي الله يهديها والله اني متضااااايقه ادخلوووا تكفون

والله ضايق صدري ومكتئبه :44:

بقولكم السالفه باختصار

عندي اخوان واخوات والمشكله ان امي تفرق بيننا ومسويتنا احزاب الله يهديها

طبعآ أنا من اللي امي ما تميل لهم ولاتحب عيالي مومشكله اهم شي عند الوالده زيارتها بشكل يومي واذا ما زرتها تتشره وتتضايق واذا جيت طبعآ معي اطفالي لاني ماعندي شغاله احصل اختي وعيالها عند اهلي بشكل يومي والمشكله ان امي عينها على عيال اختي تدلعهم وتعطيهم وتحضنهم وتدللهم واطفالي الصغار يشوفون انا والله العظيم الامر عندي عادي لكن المشكله بأطفالي احس بعيونهم حيره ونظرات لأمي خصوصآ لما تنادي عيال اختي وتبوسهم وتحضنهم وتمدح في لبسهم وفيهم واطفالي يشوفون وساكتين وانا ما بيدي شي :44:

واذا لعبوا عيالي مع عيال اختي وطاحت بنتي او اخذت بنت اختي اغراضها تقول امي لبنتي ايه عطي فلانه من اغراضك خليها تلعب معك واذا وحده من بنات اختي بكت او تبي شي تنفعل امي وتقول من عليها ومن طقها ومن طيحها ومن اخذ اغراضها من اخذ لعبتها واجي انا واهزأ بنتي واخذ منها واعطي بنت اختي عشان ارضي الوالده

واذا الوالده شافت مع عيالي اي شي تجلس تطالع فيهم حتى يعطون عيال اختي اما اذا جابوا عيال اختي شي لايمكن تقول لهم يعطون عيالي

هذا غير انه اذا جاء زوجي لأهلي يزورهم ماتهتم الوالده بالتقديم تحط اي كلام واذا جاء زوج اختي تحطه بأحسن مكان وتقديم حلوو ولازم عشاء

والله اني مره سافر زوجي وخفت اجلس وحدي ببيتي وقلت للوالده ابجي عندكم حتى يجي زوجي لاني اخاف لحالي مع اطفالي ببيتنا قالت ماعليكم الا العافيه وان جيتي بتجلسين بالمقلط يعني اغراضي وقشي ونومي قدام الرايح والجاي وانواع الازعاج ولما قالت بنتي للوالده افتحي لنا الغرفه المقفله ننام فيها قالت مكيفها خربان وهو والله العظيم جديد توها مركبته

واختي اذا سافر زوجها تنومها امي بغرفتها بغرفة الوالده هي وعيالها وهي لها غرفه فوق اختي وانا ما لي غرفه عندهم:44: ومع ذلك منومتها بغرفتها

والله العظيم اني اجيها وازورها عشان ابرها وارضي ربي قبل كل شي وانها احيانا ادخل وهي مكشره واطلع وهي مكشره ويان ماجيت يوميا تزعل ومثل ماقلت لكم صعبه اجي بدون اطفالي لان ماعندي شغاله

وان جيت ذقت انواع الغبن والقهر على نفسي وعلى عيالي من التفرقه اللي اشوفها انا ماهي مشكله بس الاطفال كبروا وصاروا يشوفون ويميزون بين معاملة امي لعيال اخواتي ولهم حاولت ابين لهم انه يتهيأ لهم وانها ماتميز بينهم بس كل يوم يشوفون التفرقه ومايصدقوني :44:

وانا باره فيها واجيب لها واروح معها واذا طلبتني اي شي ما اردها اما اختي دلوعه وتبي كل شي على كيفها ولاتحب ضيوف امي ولاتستقبلهم ولاتزور معها اذا احتاجت الوالده شي كلمتني انا اجيها من بيتي استقبل ضيوفها او ازور اللي تبيه لكن ما بين بعينها الله يهديها

وفيه صفه سيئه بالوالده الله يهديها اي شي تشوفه معي ولا مع اطفالي عينها عليه حتى لو جبت لها ولعيال خواتي زيه يعني مايملى عينها شي الله يهديها

وتحب زوجة واحد من اخواني ودايم تمدحها بطريقه تنرفزنا وتقارنها فينا رغم اننا نحبها الا انها كرهتني فيها من اسلوب حكيها ومقارنتها ومره صارحتني وقالت ترا اللي يزعل فلانه يزعلني واللي يراضيها يراضيني تقصد زوجة اخوي وتقول احبها اكثر منكم والله انها حزت في نفسي كلمتها صح زوجة اخوي طيبه وكلنا نحبها بس مهما كان انا بنتها والله اني ما اغار من زوجة ولا اخواتي اللي تحبهم ولا اخواني بس بديت احس بالقهر على حالي وحال عيالي وزوجي المهان بين ازواج خواتي وهو ملاحظ هالشي من زمان وانا اكذبه واقول يتهيأ لك

قال الرسول صلى الله عليه وسلم :

(( اتقوا الله واعدلوا بين اولادكم ))

انا لو مو باره بالوالده استاهل اللي يجيني بس مومقصره معها بشي والله يقدرني ارضيها وابرها اكثر واكثر لكن ابي منها شوية عدل بيننا