حريم ادمنوا المشاكل .. ورجال عشقوا العناد .. واي هدوء نرتجيه !!

السلام عليكم ورحمة الله وبركاته
صباح ملي بالرضا والسعاده .. اسعد الله صباحكم اخواتي الفاضلات
مواضيعي اهديها لكل من طلبت مني ان افيدها ولكل من تريد ان تستقي العبره من اسهل الطرق ولكل من تريد ان تقصر المسافات نحو الحياه الزوجيه السعيده وهنا اضع بين ايديكم واقع حياه مريره خرجت منها بعبر وفوايد وصنعت مني انثى استثنائيه ما اكتبه لكم لم استقيه من كتب او محاضرات والله العظيم انه واقع عشته وخبرات اكتسبتها من واقع حياه احتسيت مراراتها واكلت معاي همومها وغمومها والله اني لكم ناصحه صادقه ومواضيعي حصريه لعالم احلل وابيح من تنقلها ولكن لاتنسى ذكر اسمي والدعاء لوالدي بالرحمه والمغفره واسم المنتدى عالم حواء ..
من القواعد التي يجب ان تضيعها عزيزتي نصب عينيك وانصحك ان تتمعنيها وان تكتبيها مرارا وتكرارا قاعده ذهبيه مردودها لنفسك اولا ولتجلبي لنفسك حياه اهدا وانعم وهي(اي شي وكل شي لايستطيع زوجك ولاتسطيعين توفيره فاستغني عنه بكل بساطه)
لاتحولين حياتك لجحيم عشان يوفر لك جهاز جوال فخم او يغير لك عفش البيت بشي فوق مقدرته وفوق استطاعته دام عندك شي ترى غيرك ماعنده شي الشي هذا اللي تشوفينه قديم ومايمشي الحال غيرك يبيه بعدك غيرك حالته اردى منك اشوف حريم ممكن تحول حياة زوجها لكابوس عشان بس تسافر لبرى مو لانها تبي تسافر وتغير جو لااا المصيبه لان(فلانه سافرت ) لان(هذيك ماهي باحسن مني)
يا اختي من راقب الناس مات هما السعاده والله العظيم مصدرها القلوب ياما ناس تسافر لاخر الدنيا والمشاكل واقفه بينهم على ساق ويرجعون والشيطان موصل معاهم المشاكل للسماء
ثاني شي حاجه حلوه لو(استشعرتي نعمة الزواج بشكل عام )
يا اختي اذا عندك زوج يصلي فرضه ويخاف ربه ومتقي الله فيك فاعرفي ان فيه مئات بل الوف الفتيات يتمنون مثل هذا الزوج او هذا الزوج بنفسه فيه من تتمنى زوجك نفسه كم تشوفين حولك من البنات المتاخرات عن الزواج الوحده تتمنى زوج تخلف منه وتستقر عاطفيا ونفسيا معاه لو ما سفرها لمكان ولا اعطاها شي غير (الاستقرار والامان والاطفال) نعمممممه ومن اللي لقاها لقيتيها فاحمدي ربي واشكريه وداري على شمعتك تضوي داري على نعمتك بالشكر وحمد ربي تضوي لك بالاستمرار والسعاده
والله اني اعرف وحده مطينه حياة زوجها ومشاكل بسبب (زيارات اهلها ) تقول المفروض اروح لاهلي مرتين بالاسبوع ؟؟؟؟؟ اسالكم بالله مثل هاكلام يعقل ؟؟ مطينه عيشته عشان زيارات اهلك ما اقول اقطعوا اهاليكم بس وربي قلت لها يويدك مره بالاسبوع كثر الله خيره ماقصر غيرك مسارفه بعيد وبالسنه تقعد عند اهلها اسبوعين او شهر بالكثير
يا بنات (ارضوا بالقليل يجيكم الكثير)
يابنات اذا رفض زوجك شي لاي سبب سواء كان يشوف المصلحه في غيره طيعيه
او كان يشوف ان ماله داعي طيعيه او ماخذ السالفه عناد كمان طيعيه يعني تنازلي عن هالشي وخلاص هو عرف ان نفسك فيه فاقطعي الكلام عن هالشي وانسيه واقتنعي ان رفضه هذا (مؤقت) لكن لما تحنين وتعصبين وتزعلين وتقومين مشكله بيحط براسه لاااا يعني لا وممكن يحلف بعد وبعدها اغسلي يدك مره اتحدى لو عاد طاعك
لما يشوفك الزوج سكتي ورضيتي (وطعتيه) بيوافق بعدين وهو بنفسه بيجيب لك هالشي
الرجال يكرهون اصناف كثير من الحريم مع انهم ( ماينطاقون هالرجال الا من رحم ربي) بس الحرمه اللي مستحيل يطيقونها (القنانه النكديه اللحوحه)) هذي يعاملونها معاملة غير معاملة الاوادم ابد مايطيقها افضل الرجال لكن هذا مجتمعنا وهذا عاداتنا جبرتنا نكون تابعات لهم وتحت ظلهم نرضى منهم اللي مايرضونه مننا والله المستعان وش السواه والله مالي ولا لك غير ((الرضا بهذا الواقع )) بس ترضين وتتعايشين واحذري من النصايح اللي تقولك واجهيه اكسري عينه ادبيه وقيه عند حده ترى الحريم زمان قالوا كلمه والله ماكذبوا واسالوا من جرب حتى اللي تشوفون وتحسون انها ممشيه زوجها على العجين ما يلخبطه لاتحسوبنه شطاره منها ولا قوه يمكن زوجها طبيعته كويس يمكن نها ذايقه منه الضيم وانتي مالك الا الظاهر والله ان الرجال ماتسنعه حرمه حطيها ببالك لاتاخذين ببعض النصايح وتورحين تفردين عضلاتك وتعلنينها حرب المهم نرجع للكلمه الي قالوها زمان
((الحرمه تناطح الجيال بس ماتناطح الرجال)) تخيلوا والى الان يقولونها حطي راسك براس جبل ممكن تهدينه بس الرجال لاااااااا مابتقدرين عليه
الشي اللي مايجي بالهدوء والسياسه والتفاهم الشي اللي مايجي بطيبة نفس وقناعه والله مايجي بالقوه ولا طولة اللسان ولا العناد واذا جاء بهذا الطريقه ان يجر وراه مشاكل لها اول مالها تالي فسدي هذا الباب من اصله وتعودي مع زوجك التفاهم والهدوء واللين واذا عودتيه وفهمتيه وححستيه بقناعتك((انك ماراح تمنعني من شي الا فيه شر عليه وانك ماحرمتني من شي الا انك انت اعرف بمضاره وعارف ان المصلحه في غيره))
داايم حسسي الرجال انك تحترمين رجولته ورايه كرجل وحكمته وكلمته الا اذا كان ((ماهو بعقله ولا بواعيه ناقص دين وايمان فهذا له قاعده خاصه وتعامل ثاني
بس لمن يكون زوجك طيب محافظ على صلاته وهذي الاغلبيه ان شاء الله فلا توقفين حياتك عند الكماليات لا تارقين حياتك عشان شي ماهو اساسي ماهو بشرط يكون رومانسي ويفاجئك بحركاته ورومانسياته اذا تفاعل معاك وجاملك باللي تسوينه فكثر خيره فيه الخير والله اعرف وحده حالها مع زوجها ماهو باحسن من حالي مع زوجي كان لما يشوف الاشياء الرومانسيه والحركات يخربها ويتمسخر ويقول لها تخيلوا((شكلي جيت على بقايا ليله رومانسيه )) يعني انك تبينها لغيري او كنتي مع غيري شوفوا الخبث كيف فكانت تبكي وتنهار وتنصدم وتتمشكل معاه مشاكل طويله وعريضه
شفتوا كيف ان فيه رجال خباااااااااث وشكاكين كيف يفسرون كل شي على كيفهم فاحمدي ربي ان زوجك مو رومانسي بس يعني اهون من هالاشكال
ولكل ما تعاني جفاء الزوج او زواجه عليها وعندها عيال اللي تشتكون من ازواجكم وعندكم عيال ترى الوحده اذا صارت ام تنجبر غصب عليها تتنازل كثير وتضحي كثير وتربط مصيرها بمصير هالعيال وتهون اشياء كثير بخاطرها عشانهم الام كلمه ماخوذه من امه يعني انتي بالنسبه لهم امه باكملها يستحقون منك الصبر والتضحيات صح كثير يكون على حسابنا بس من وجهة نظري نعم اضحي بسعادتي عشان اطفالي وش بلقى من الطلاق لو اصريت عليه غير اني ابتعد عنهم ممكن اتزوج صح بس ياترى كيف بتكون الزيجه الثانيه رجال اولا واخيره مثل الاول بالضبط يحملون نفس العنجهيه ونفس الكبرياء الظالم واكبر دليل اللي تزوجوا مرتين هل لقت عند الزوج الثاني سعاده مالقتها حرمه او اكلها بملقه ذهب وفرش لها الارض حرير لا والله كلهم نفس بعض وان كانو يختلفون شوي بس مو كثير يمكن الاختلاف يكون قلبك وانتي مع الثاني مع عيالك واي تشتت ذهني بتعيشينه واي راحه وعلى قول المثل ذل ابوكم وا عز غيره
عرفنا طبيعة مجتمعنا وثقافة رجالنا بتعيش معاهم الوحده اذا سكتت وتنازلت وصبرت وبلعت المر ممكن تقولون انتي ي ام طيف تطلقتي صح تطلقت بس بعد معانة سنين طويله وشقاء محد شاف اللي شفته ظروفي كانت خاصه ممكن اني انصح بالطلاق لماا تكون الوحده مرتاحه ماديا ممكن تستتقل بحياتها كلامي اقصد به اللي مالهاوظيفه ولا دخل ممكن تستقل منه احظوا ماقول الي مالها عزوه كلنا مالنا عزوه الا رب العالمين واذا جاء الصدق الاهل ماهم عزوه يبونك ضيفه او جنازه والله مايبونك غير كذا

موقف جاء ببالي عشان تعرفون الالم اللي اعتصره قلبي وعاشه بمره من المرات اثناء شغلي بمطبخي في ساعه متاخره من الليل ايام بعد ولادتي ببنتي الثانيه باسبوعين كنت اشتغل بالمطبخ عندي طلبيه الصباح اثاري بنتي الصغيره كانت تبكي ماسمعتها وفجاه سمعت صوت زوجي يصارخ مع انها مو معاه بنفس الغرفه بس يقول ازعجتني لانه ماهو نايم اصلا سمعها لو انه نيم كانه جثة مايحس المهم رحت ورضعتها ونومتها اثاريها صحيت مره ثانيه ماسمعتها بالمطبخ حوسه وضجه تعرفون المطابخ المهم والله لايسامح اللي يكذب دخل زوجي المطبخ يضحك ماقلت له شي قال بنتك اللي تبينها تزعجني وتنكد نومتي روحي دوري عليها !!! قمت وقلبي طايح بس مابينت له واروح غرفة بناتي مالقيت الصغيره مو بفراشها دورت بالغرفه الثانيه مالقيتها بكل البيت مالقيتها رحت لزوجي وهو منسدح قلت وين حطيت البنت قال دوري عليها والا اقولك لاتتعبين نفسك والله ماهي بالبيت
لبست جلال صلاه ودورت بالحوش وفتحت باب الحوش ماشفت شي جن جنوني وفقدت عقلي ورجعت له بعدما اخذت سكين من المطبخ وساطور وقلت له وين حطيت البنت تكلم وبنتي الكبيره تصيح بالسيب بس ماهمني وقتها قلت له والله ولماتتكلم لا اذبحك هنا واشرب من دمك تدرون وش ردة فعله
قام يضحك وميت ضحك ورمى عليه مفتاح السياره قال خوذيها من شنطة السياره تحسبت عليه ورحت جبتها بقلبي انا قد سودت من الصياح طلعت اخذها من السياره الساعه 2 بعد نص الليل
تخيلوا هذا وربي من اهون المواقف اللي قد شفتها من زوجي الان صار طليقي
ورغم كل الالم صبرت صبر ايوب ماهو عشانه عشان بناتي وعشان ماعندي اهل ينشد فيهم الظهر والي مافيه خير لبناتي وانا معاهم مافيه خير وانا بعيد عنهم لو ركبت راسي وتطلقت
واللي مثل هذا مافي براسه رة نخوه ولا رجوله ماراح يخلي بناتي معاي بعد السن القانوني 7سنوات واي عيشه مع مثل هالاب حسبي الله عليه
ولاتنسون ترى الحرمه اللي تاخذ حقها كامل تندم وقاله الشيخ المطلق (خوذي نص حقك ) والشخص اللي يعيش بس لنفسه يكرهونه اللي حوله عيشي وتفاني بالعطاء والتسامح والتنازل لكل من يستحق منك هذا العطاء والصمود وثقي بالله تمام الثقه ان صبرتي فلك الاجر وثقي بان الدنيا لم تصفو لاحد واننا عايشين ايام ونرحل
ونتيجه المعادله
حريم ادمنوا المشاكل ورجال عشقوا العناد // ان الرجال يعتبر نفسه بكل احواله رابح وتبقين انتي العنصر الاضعف من وجهة نظره فالحياه مع هالاشكال تجي ((بالتفاهم والتنازل وتقديم التضحيات والصبررررررر والله يكون بعون كل صابره

اتمنى اكون وفقت بموضوعي ووصلت النصيحه لكم بالشكل الصحيح ..

اختكم//ام طيف..

اللهم ارحم والدي واغفر له واجعل قبره روضه من رياض اللجنه واجمعني فيه باعلى جنان الخلد ..