حزن عليها وقرر يتزوجها وهو مايبغاها

السلام عليكم ورحمة الله وبركاته


يا اخوات تتذكروا موضوعي اللي نزلته عن اخويا قبل فتره وقلت فيه عن جارتنا اللي تبغاه لبنتها وكل شوي تكلم امي عن دا الموضوع
امس صارت مشكله كبيره عشان الموضوع دا بس بالبدايه ابقولكم قصة جارتنا هذي عشان تفهمو الموضوع


جارتنا ارمله عندها بنت وولد وساكنين جنبنا
ولدها اعززززززززززززز اصدقاء اخويا ويعتبره اخوه ويتساعدوا بكل شي بالحياه وهما اصدقاء من لما كانو اطفال
ويتساعدوا حتى بمقاضي البيت لو واحد مشغول الثاني يجيب وكذا
قبل فتره ولدها دخل دورة في العسكريه لمدة 3 شهور ووصى اخويا ينتبه لأهله
وصار اخويا كل يوم يجيب لهم المقاضي وكل يوم يجيب لهم اكل شكل وحلويات وفي الويكند ياخذهم معانا نروح بحر او مطاعم او سوق
وكل يوم يتصل على ام صاحبه يسلم عليها ويتطمن وهيا ادا احتاجت شي على طول تدق عليه كأنه ولدها
وحتى بنتها تطلبه بالواتس اكل معين او كيك او اغراض الصيدليه ويجيب لها كل شي
طبعاً كل دا من فلوسه ماياخذ منهم ريال رغم ان امه تحاول تعطيه بس مايرضى ويقول انا وولدك جيبنا واحد
اخويا طيب مره ويحب يخدم وجارتنا تحبه وتعامله كأنه ولدها وتناديه حبيبي يعني كأنه من جد ولدها بس ماتكشف عليه طبعاً
كانت تقول لأمي اتمنى ولدك يتزوج بنتي وتدعي دايما واول مره كلمت امي فيها عن دا الموضوع امي فرحت لأن البنت قمررر ماشاءالله واخلاقها روعه
وامي اساساً كانت تحاول تخطبلوا من زمان بس هوا مايبغى يقول ازوج اخواتي واتطمن عليهم بعدين اتزوج
قالت يمكن يرضى بهذي وكلمته ورفض على نفس كلامه
علمت امي جارتنا عن رفضه لكن جارتنا ما استسلمت كل فتره تعيد نفس الموضوع وتقول مايتزوج بنتي الا فلان وامي تسايسها
وانا جلست مع اخويا وسألته عنها وخليته يعترف ليه رفضها قال انا اشوفها زي ما اشوفك (يعني زي اخته) وهيا صغيره على الزواج
ويبغى وحده قريبه من عمره يكون تفكيرهم زي بعض ويفهمو بعض وكلام كثير
(عمر بنتها 17 وعمر اخويا 26)


اللي صار انها قبل اسبوع اتصلت على اخويا وصارحته بالموضوع وانها تبغاه لبنتها والبنت تبغاه وماتبغى لا مهر ولا شي
واخويا حاول يفهمها ويمدح في البنت عشان ماتزعل منه ويشرح لها سبب رفضه للزواج في هالوقت
تخيلوا قالت له لو لي عندك اي معزه لاتاخذ قرار ذحين خذ وقت وفكر مزبوط وبابي مفتوح لك واستحى وقالها اللي تشوفيه


امس جات عند امي وقالت لها انا اتصلت على فلان وقالت لها الموضوع كله وقالت شكله بيوافق
امي تنرررررررررررررفزت مررررررره
وقالت لها كيف تقولين للولد كذا وليش تغصبينه وووووووووو كلام كثير وقالت لها الولد مايبغاها خلاص قفلي ع الموضوع ولاعاد تتصلين على ولدي
(جارتنا اسلوبها حفش لكنها طيبه وامي دايما تسايسها بدا الموضوع لكن امس انفجرت عليها)
وامي اتصلت على اخويا وقالت له ماعليك من كلامها ولا عاد ترد عليها وعلمته الموضوع كله
اخويا انجن وخرج من شغله وجا البيت جلس عند رجول امي شوي ويبكي يقولها ليه تقولين كذا حرام عليكي كسرتي قلب البنت اليتيمه
وامي معصبه تقول ما اسمح لأحد يلعب بعقلك ويحاول يستغلك وعشانهم عارفينك طيب وتستحي يحاولون يجبروك على بنتهم
راح اتصل على جارتنا وحلفها ماتجيب سيره لبنتها عن الموضوع وكله مجرد سوء فهم
رجع جلس عند امي يراضيها ويبوس يدها ورجولها عشان تروح تخطبها له وامي رااااافضه وتقوله مستحيل
جلس والله يمكن ساعتين يترجى فيها لين حزنت عليه وقالت له لو انت من نفسك تبغاها ماراح امنعك روح تزوجها
قالها انا ابغاها وابغاكي تروحي معاي عندهم وتخطبيها لي زيها زي بقية البنات وبالقوه وافقت
راح اتصل على صاحبه وقاله اخر الاسبوع بنجيكم انا واهلي وصاحبه فهم وقاله الله يحيكم


انا كل مايدور في بالي كلام اخويا اللي اول معقول غير رأيه ؟ رحت اطل عليه بالليل لقيته يبكي والله كنت بطيح من طولي اول مره اشوفه كذا
رحت اهديه واحاول فيه طول الليل مايبغى يتكلم قلتله ماحد يقدر يجبرك عليها لو ماتبغاها واصلا لو تزوجتها راح تظلمها يمكن بعد سنه تطلقها
وتصير مطلقه بعمر 18 مو حرام ؟
قال ما اطلقها لو اموت وانا ابغاها خلاص حتى لو ماكانت الي اتمناها عادي اصلا هي بنت تستاهل ومافي زيها ووووو


حسيت كلامه مو طالع من قلب كأنه قاعد يحاول يقنع نفسه فيها , قلتله انا ما ابغاك تتزوجها ولا موافقه ولو كلامي يعنيلك اي شي اسمع كلامي
قالي انتي اختي حبيبتي وكلامك كله اوامر الا في الموضوع دا
حاولت بكل شي ترجيته بكيت عصبت عليه مافي شي فاد
كيف احل الموضوع دا وافركش الزواجه انا اعرف انه مايبغاها ولو اعرف انه مو مجبور وربي لا افرح له واساعده لكن واضح عليه مايبغا


انا اللي معور قلبي انه مافيه بنت ترفضه سواء من وظيفته او دينه او اخلاقه او شكله كللل شي فيه حلو ماشاءالله ليه مايخلونه يختار شريكة حياته بنفسه زي بقية الشباب
ليه تجري وراه لين اجبرته يتزوج بنتها
والله يابنات قبل فتره قالي المواصفات اللي يتمنى بزوجته وربي ماطلب جمال ولا طلب بياض زي كل الشباب كل الي يطلبه متدينه وتخاف ربها وتكون حنونه
انا افكر البس عبايتي واروح لبيتهم واقول للبنت عن كل شي يمكنها ترفضه او اكذب عليها واقولها اخويا يحب وحده ومايبغى يتزوج غيرها
وانا ادري ان الفكره دي غلط لكن والله مابيدي حل عشان كذا كتبت الموضوع دا يمكن عندكم حل قبل ما اتهور واروح لهم
حسبي الله ونعم الوكيل هو مو ناقص هم وتعب لسا قبل امس كان مبسوط وجالسين نضحك ونخطط للسفر وذحين حاله مقلوب فوق تحت