حزن وكآبة !! بعد مولودي الرابع ...

السلام عليكم ورحمة الله
كيف الحال خواتي بنات حواء
كمقدمة لموضوعي بعطيكم نبذه عن حياتي اولا
امرأه متزوجة من ست سنوات ونصف عمري 35 موظفه ( معلمة ) زوجي موظف حكومي متوسط الدخل اغلب الصرف علي مقاضي بيت لبس لي ولاولادي اجار الشقه عليه ( شقه صغيرة متواضعه )
زوجي زيه زي اي زوج عادي ويمكن اقل اتكااالي عصبي باوقات كثيره مهمل لاحتياجاتنا اغلب مطالبي اهلي يقومون فيها
نتزاعل كثييير بسبب المادة وراتبي
سبق واني زعلت عند اهلي لعل الوضع ينصلح
يتحسن شويه ويرجع يعني عيوووبه كثيييره
لدينا 4 اولاد ذكور الاكبر 5 سنوات والثاني 3 سنوات والثالث سنة و4 شهور والرابع شهر واحد فقط ( في آخر نفاسي ) يعني جايبه اولادي ورى بعض حملتي الاخيره جت بدووون تخطيط لاني اهملت في اكل حبوب المانع انصدمت لما عرفت اني حامل بكييييت وحاولت انزله واكلت اعشاااب ونطيت من فوق السرير كذا مره بس ربي ماكتب انه يطيح بالاخير استسلمت ورضيت وقلت عساها تكون بنت وتقر عيني بها بعد 3 اولاد مرت شهور الحمل وولدت قبل شهر بالضبط طبعا ما كنت عارفه جنس المولود لين طلع وقالت الدكتوره ولد ساعتها قلت الحمد لله بنفس راضيه بس من ثاني يوم طلعت فيه من المستشفى بدت المشاكل والوساوس
صارت فيني حالة حزن وكآبه فضييييعه ماني متقبله وجود طفل رابع احس خلاااص اجهدت نفسي بالحمل كل ساااعه الوووم نفسي ليه حملت ليه ما اكتفيت بثلاثة ليه اهملت الحبوب ليه ما انتظمت عليها ليه ما حاولت اكثر اني اجهضه
واصيبييح وابكييييي كثييير امي وخواتي يهدوني اهدى بس تجيني ساعات انهاااار وابكي
ساعات اقول ليتني على الاقل جبت بنت
وساعات اقول المفروض بس عندي ولدين ما صار لي ست سنوات وجبت 4 اطفال
اجهدت نفسي بالحمل والولاده
حاليا بس افكر بعيالي
خلفتي كلها اولاد شايله هم تربيتهم وان الولد صعبه تربيته كيف لا كبرو كيف بذاكر لهم كيف بتحمل مسؤلية 4 اولاد
وشايله هم المادة وان مافيه بيت ملك امان لهم
ساعات اقول ليت الاثنين الصغار او الكبار بنات ليت عندي بنات يساعدوني ويونسوني
وساعات اقول بحمل على طول اجيب بنت وساعات اقول بس وش يضمن اني بجيب بنت وساعات اقول انتظر 5 سنوات بعدين احمل بس وقتها بيكون عمري 40 الحق اربي مره ثانية
وساعات اقول خلااااص ماهو لازم بنت قفلت يكفووون اللي عندي
يا بنات ذبحني التفكييير احس ماني متقبله وجود طفل رابع ما كنت متهيأه له
احس حتى لو ابروح واجي ثقيله مع وجود اربع اطفال
احس اني عجزت وكبرت نفسي من الحمل المتتابع
اللي تزوجن معي وقبل بس معهن 3 و2 اطفال فقط
بس اقارن نفسي بهن واغبطهن خصوصا اللي معها اطفال بنات واولاد
احس اني ضيعت نفسي وارهقتها لاني كنت مرتاحة يوم معي 2 خصوصا ان عندي شغاله
الثالث والرابع جو ورى بعض بظرف سنه و3 شهور
احس اني نمت ومعي ولدين وصحبت ومعي 4
تعباااانه نفسيا يا بنااات احس كل شي بالحياة ماله طعم ما عندي رغبه اشتري والبس احس خلااااص راحت علي يا دوب اشوف وقت لعيالي واحس ان الناس تتشفق لحالي اني جبت ورى بعض وكلهم اولاد
اعيش حالة حزن بس ارجع اتفرج على صور قديمة يوم كان عندي طفل وطفلين واتحسر على ذيك الايام واتمنى رجعتها احس كنت خفيفة ومسؤلياتي قليلة ومسيطرة على وضعي واحس كنت لسى عروس حتى لو مشى فيني العمر الحين احس خلاص عجزت علشان ثار عندي اربعة
خواتي وش رايكن بوضعي ووش تنصحوني فييييه اجرب احمل؟ وبعد كم سنه ؟ او قفل خلاااص ؟
علما ان زوجي الوضع عنده عادي ما يضغط علي بالحمل وكان نفسه ببنت بس فرح لما جا الولد وراضي به
دعوووواتكم لي ....