حزينه ومكتئبه على صفحات التواصل الاجتماعي ..ومبسوطه واقعيا🙄

السلام عليكم ورحمه الله وبركاته ..
كيفكم يابنات عالمي الجميل ..
انا اشوف ظاهره منتشره فمجتمعنا..
اللي هي “ادمان الحزن” والمبالغه في إظهار المشاعر الحزينه..
وحده حاطه صوره دمعه حزينه كصوره عرض بالواتس
وكاتبه عبارات حزن بالواتس تتجدد يوميا
يوم تقرينها تحسين ان كل حزن العالم داخلها ..
وهي بنفس الوقت بواقعها مسافره ومستانسه ..
واهلها وعيالهاطيبين يعني مافيه داعي للحزن ابد
ولا اللي مثلا جدها او جدتها متوفي من زمان من سنين
وهي يوم كانو عايشين ماتحرص على زيارتهم ولا اهداءهم..
وعلاقتها معهم رسميه جدا هم بديره وهي بديره
ولازالت تحط عبارات جدي وجدي وحزن ودموع ورثاء

دعيتي لهم بجوف الليل بينك وبين رب العالمين؟
تصدقتي عنهم لو بريال..؟
بالايام المباركه ليله القدر ويوم عرفه ذكرتيهم بدعوه؟
حرصتي على ايجاد صدقه جاريه لهم؟
هذا الحب الحقيقي الصادق الخالي من الرياء
وماعداه صدقيني كلام فاضي..
اعرف وحده من بنات دفعتي توفت الله يرحمها من سنوات
كلنا حزنا عليها لانها كانت فجاه ودعينالها بالرحمه والمغفره مر شهر شهرين
ولازالت وحده من البنات من الدفعهحاطه حاله بالواتس وبتويتر وادعيه حزن
تجدد كل يوم لو تقرينها تقولين هذي شوي وتترك الدراسه تاثرا بحزنها
ف قررنا نجمع فلوس ك صدقه جاريه لزميلتنا
لعل الله ينفع بها واللي تبي تدفع تدفع..
المفاجأه ان اللي مزعجتنا بحالات الحزن وشعور الفقد
رفضت تتبرع لو بعشرين ريال بحجه انه ماعندها 🙂
الخلاصه..
ديننا الاسلامي دين فرح ..
وربي حرم علينا نحزن على المتوفي اكثر من ثلاث ايام لانه كمسلم راح لمكان احسن من الدنيا..
لاتبالغي باظهار حزنك بشعارات الواتس وتويتر بينما انتي بالواقع عايشه في قمه السعاده لان هذا يعتبر من النفاق وانفصام الشخصيه
وفري حزنك لموضوع يستاهل فعلا الحزن و ممكن فيه ناس تشوفك قدوه وناس تتاثر باللي تكتبينه
ويصدقون فعلا انك موقفه حياتك عشان اللي متوفي من سنين..
والله اعلى واعلم