حسبت نفسي كريمه طلعت من جنبها

السلام عليكم اخياتي

بخش بسالفة دغري :(
احب الطيب واهل الطيب والطيبين بس اشوف انهم بجهه وانا بجهه اخرى

ماني حول الطيب ولا اعرف له :(
كل ماسويت شي وانا بنيتي انه احسن شي يطلع ولاااااااااشي ولا له قيمه


بعطيكم امثله يمكن تفهمون قصدي

رحت لعزا الله يبعد عنا وعنكم الحزن رغبه مني بمواساة اهل المتوفي
واداء واجب واترجي زوجي طول اليوم والحمدالله رضى يوديني
طبعا اهلي كالعادة راحوا ماقالولي فاضطريت اروح لوحدي رحت وعزيت وسلمت ورجعت بيتي
الى هنا حلو! اللي صار ان كل وحدة راحت معها ياااا قهوة وشاي يا حليب وزنجبيل بس انا رحت مامعي ولاشي اصلا ماجا في بالي انه المفروض اخذ شي:(
مثال ثاني: رحت ازور مريضة بالمستشفى وكالعادة زوجي مستعجل اخذت فطاير من المخبز وعصير ورحت خمس دقايق تحمدت لها بالسلامه ومشيت
الى هنا حلو برضو! طلعوا اللي جايينها من قريباتي جايبين ماكولات اشكال والوان وحلويات وقهوة وورود وجلسوا هرجه وسوالف ولما طلعت راحولها للبيت وطلعت انا بسواد الوجه

مثال اخير في روضة ولدي عندهم حفله وعمل عن وحدة المسكن قمت سويت له عمل باللي عندي من مواد وتعبت عليه ومدري كيف كنت اشوفه عمل فخم وكبير لحد ماتفاجأت باعمال زملاؤه
ولدي تأثر ياقلبي عليه:(


اللي بعرفه ليه اشوف الشي في البدايه كبير وحلو ويوجب ويبيض الوجه وبعدين القى نفسي بوادي والدنيا واهلها بوادي
كيف اكون كريمه وصاحبه واجب وطيبه ويبين طيبي عند غيري

احس اني صرت نكرة بين هالعالم
منافسة محمومه ماني قدها
سباق سباق وتحدي او هذا اللي احسه!!
وتذكرت شي من الامثله
عملت حفله للاطفال وعزمت امهاتهم وكنت مفكرة نفسي متكلفه
لحد ماحرجتني بنت بخامس تضحححححححك على الحفله والكيكه تقول كيكتكم تخقق >>تستهزأ
وفعلا لما شفت حفلاتهم وكيكة مطبوع عليها صورتهم عرفت ان حفلتي ماهي الا نكتة احرجت نفسي واطفالي




طولت عليكم بس حبيت اوصل لكم الصورة
لعل فيكم من تنجدني مما انا فيه