حسبي الله على مدارس الأندلس ..أنا مصدومة أعطوني حل الله يسعدكم

السلام عليكم : يابنات ، أنا صديقة ريمي .. أعطتني معرفها جزاها الله خير عشان اكتب مشكلتي ..

أنا عندي ولد ثانية ثانوي ماشاء الله ، الله يحفظه ويحفظ لكم كل غالي ، ولدي هذا يدرس في مدارس الأندلس في الطايف

وأمس أخذ النتيجة وكانت صدمة قاسية ماتوقعناها أبدا، تخيلوا ولدي طول عمره ياخذ تقدير ممتاز في المدارس

الحكومية اللي درس فيها السنوات اللي فاتت والسنة هذي قال لي يا أمي أبغى أنقل مدرسة أهلية عشان

أجيب نسبة أفضل، ونقلناه ودفعنا للمدرسة 5750 رسوم الفصل الأول ، هذا غير التقوية المادة الواحدة ب 300

عندهم في نفس المدرسة ، قالوا المدرسين للطلاب ادخلوا تقوية أفضل عشان تجيبون درجات أحسن وكان ولدي

يروح الصباح المدرسة ويروح العصر كمان عندهم عشان التقوية حطوها في العصر وطول الترم يذاكر .. وبعد هذا

كله تدرون كم نسبته 71 % ، والله من البارح وانا أبكي وماني مصدقة أول مرة في حياته يجيب نتيجة زي كذا ،

لا والمصيبة المعدل تراكمي .. حسبي الله عليهم ان كانوا ظلموه ، تخيلوا واحدة من المواد يدرسها اثنين من

المدرسين كل واحد يدرس فصلين ، ومدرس ولدي حدد لهم أشياء معينة يذاكرونها والمدرس الثاني هو اللي حط

الأسئلة وجاب أشاء من خارج التحديد حسبي الله عليهم ونعم الوكيل ...

يابنات ولدي مستواه طيب والله ما اقول هذا الكلام عشان انه ولدي لكن هذي الحقيقة والدليل إنه جاب درجة

عالية ماشاء الله في اختبار القدرات ، لكنهم ضيعوا فرحتنا بها حسبي الله عليهم ...

يابنات : الله يسعدكم أشيروا علي احنا طبعا بننقله مدرسة ثانية في الترم الثاني، لكن أنا خايفة نسبته هذي

تنزل المعدل ، وفكرنا نخليه مايدرس الترم الثاني ويبدأ السنة الجاية في مدرسة ثانية غير المدرسة الخايسة

هذي ، لكني مقهورة من ضياع سنة من عمره ، غير الرسوم اللي دفعناها واللي يعلم الله وحده كيف دبرناها :(، بالله عليكم يابنات ويا أمهات : أشيروا علي لو كنتم مكاني إيش تسوون ؟ الله يسعدكم أعطوني حل

وادعوا لولدي إن الله يوفقه ومشكورين وجزاكم الله كل خير .......... أختكم أم عبد الله