السلام عليكم ورحمة الله وبركاته
حبيت اعرض لكم مشكلة صاحبتي
هيا نشراها في منتدى تاني وحبيت
اخد رأيكم في مشكلتها :
هيا كانت كاتباها على جزئين
فانا نقلتلكم الموضوعين على بعض ...
ودلوقتي اسيبكم مع المشكلة
ويارب تساعدوها ...............
الجزء الاول
السلام عليكم
انا بكرة عيد جوازي
ووالله مخنوقة عالاخر ومش قادرة اتكلم مع حد على اللي بيجرالي
ولا اللي حاسة بيه لا من قرايبي ولا من قرايبه
بداية معلش ان موضوعي مش مرتب بس بجد انا بكتبه بدموعي
انا اتجوزت من شاب اكبر مني ب5 سنوات زميلي في الشغل وكان باختياري
وربنا رزقنا ب 3 اطفال طبعا من الاول كده وكإن الولاد دول ولادي لوحدي
هو طول مهو في البيت يانايم يا بياكل وفي الحالتين مش عاوز يسمع نفس حد من الولاد
وإلا خدوا بقى زي ما تحبوا من شتيمة وضرب ونرفزة على العيال
اولادي بقو عصبيين جدا وبيردوا كلامه وشتايمه اللي عمري ما كنت اتخيل ان اطفالي انا يقولوها
انا باشتغل وكل دخلي حاطاه في البيت اكل وهدوم ولعب ونظافة البيت وهو لالالالا ولا حتى بيعرض انه يديني مصروف للبيت وكل يوم الغدا ايه؟؟؟ ومش بس كده ده بيتشرط كمان
وياريت الواحده تلاقي كلمة طيبة على اكلة ولا لبس ولا هديه !!!!1
علاقته باهلي زي الزفت و بيقولي هم المفروض يتقربوا مني مش العكس!!!مع اني محافظه جدا على علاقتي باهله وهما بيشهدوا اني بعاملهم بما يرضي الله ..كل المشكلة ان بابا اتوفى وسيادته عاوزني اجيبله فلوسي اللي كان بابا حاططها باسمي ...انا اعترضت وقلت دي مش فلوسي دي فلوس انا ما اشتغلتش بيها انا من يوم ما اتعينت وانا صارفه كل فلوسي ودخلي عالبيت والعيال قسما بالله من يوم ماجابلي الشبكة ما جاب جرام دهب واحد واو حتى خيط في ابرة مع ان الفلوس اللي اهلى جابوهالنا هديه الفرح اخدها كلها وانا اللي بسدد لما حد بيجيله مناسبه!!!! هوا ده كل المطلوب مني خدامة بتدفع فلوس مش بيتدفع لها فلوس انا اربي الولاد واعلمهم ووهو نايم اخرسهم خالص واجهز الاكل واروح شغلي واقبض علشان ياخد فلوسي في بيته!!!!! انا ماما تعبانه والغرب قبل القرايب سألوا عليها وجوزي ابدا حتى سلامتك مش عاوز يقولها دايما كده مقصر رقبتي ....قال ايه مامتك مش بتعاملني زي باقي الامهات ما بيعاملوا اجواز بناتهم !!!! وللعلم احنا قاعدين في بيت اهلى يعني ماما في نفس البيت شفتوا الخيبة !!!!! لا والنهارده بيقول لبنتي متتطلعيش عند نينه خالص فالبنت بتقوله ليه يابابا قالها انا بقول كده ....تخيلوا لما الطفلة دي تقول الكلام ده قدام ماما واخواتي انا موقفي يبقى ايه؟؟؟؟شايفين الضغط النفسي ؟؟؟ ادفعي بقى ... اصله بيقولي اصل اهلك لقوا بنتهم مع حد بيعاملها كويس !!!اه كويس جدا
بجد انا لغاية دلوقتي ملتزمه الصمت بس والله حاسه اني هانفجر وطبعا مقدرش اقول لماما او اخواتي حاجه مش عاوزة ازود الطين بله هما من غير حاجة حاسين بيا مش عاوزه اؤكد شكوكهم لدرجة ان بابا الله يرحمه كان بيقول لماما انا حاسس ان بنتي هتموت مقهورة منه بدري .... وانا طبعا لالالا دايما التمس ليه الاعذار عند اهلى وعند الناس ...بس خلاص قسما بالله انا بكتب موضوعي ده وانا غرقانه في دموعي ...
بقولوا تعالى نسافر برة علشان نحسن دخلنا يقولي وهوا احنا سعينا للرزق هنا ؟؟ طبعا بيلمح عالفلوس بتاعة الميراث.... بصراحه انا مش ضامنه مستقبلي معاه لا انا ولا ولادي فسايبة ميراثي للزمن انا كده غلطانه؟؟؟؟؟
انا وصلت لدرجة اني كرهته بكل معنى الكلمة بس مش عارفة اعمل ايه؟؟؟!!!!! اتعايش معاه وهوا بيضغط عليا وعلى اعصابي في كل الامور ؟؟؟ انا بحاول اقنع نفسي انه بجد كان بيحبني يعني مكانتش جوازة علشان اللي عندي والله انا بتقطع وانا بقول الكلمه دي بس بجد شكلها كانت كده.....انا وصلت لدرجة اني لما ييجي يقرب مني الاقي كل اعماله السيئة تيجي قدام عيني ووالله بأدي الواجب وخلاص اهو كله تمثيل في تمثيل ....اه بالمناسبة طبعا السوق وطلبات البيت كلها عليا مهو انا حديد ....هو كل وظيفته ينام بالنهار لحد معاد شغله يقوم ياكل ويروح الشغل وبعد الشغل مع اصحابه خمسه ترويش وبعدين يرجع يتعشى وينام بعد الفجر ....بجد انا كل اللي صعبان عليا ولادي ذنبهم ايه في الحياة؟؟؟ والله ولا مرة خدنا وخرجنا ان شاالله نجيب طلب بلاش فسحة او خروجه ودايما يقولي هنخرج بالتلات عيال ازاي؟؟؟ كإني اول واحده عندها 3 اطفال !!!!! اضطر انا اني اخدهم واخرج بيهم لوحدي اي مكان بس يكون قريب ... معندوش اي تحمل للمسؤوليه
شفتوا العيشه؟؟؟
اعمل ايه؟
اشمت الناس فيا واطلب الطلاق؟؟؟
ولا التزم الصمت واصبر عالضغط النفسي وحسبي الله ونعم الوكيل ؟؟؟
ولا انا غلطانه مفروض اديله ميراثي؟؟؟
ارجوكم ساعدوني وشوروا عليا ...انا مش قادرة اقول لحد من العيلتين وحتى صاحباتي في الشغل مقدرش اقولهم لانه معانا في الشغل ولازم احافظ على شكله وشكلي قدام الناس !!!!؟؟؟
آسفة جدا لاني طولت اوي عليكم ونكدتكم معايا
**************************************
الجزء التاني
اخواتي الحبيبات
في البداية انا صاحبة موضوع ...............
وعلشان تفتكروني وكمان اللي مكانتش شافت موضوعي اللي فات
انا هاحطلكم اللينك بتاعه
.................................................. ...................
ولأني حسيت انكم فعلا اخواتي وان الكل اتفاعل معايا
وفعلا اديتوني اراء وحلول كإنكم بتنصحوا نفسكم او حد من قرايبكم
فحبيت انكم تشوروا عليا بعد ما احكيلكم تطورات الوضع والجديد فيه
على نص الاسبوع ده لقيته بيتصل على اخويا وبيقوله تعالى
ولما نزله قعد يتكلم معاه ويقوله
احنا عليلة واحده
وانا عاوز اخد الدور اللي احنا قاعدين هما شقتين وده في بيت بابا الله يرحمه
علشان عاوز يفتحه حاجة تبع شغلنا مانا زي ما قلتلكم بنشتغل في مجال واحد
المهم وبيقول لو قلتو اه او قلتو لأ مش هتفرق
كان بيقول عاوز يأجره يعني وبيقول بالاسلوب ده انا كده كده هادفع فلوس
فانتو اولى من الغريب .... .مع العلم اننا هنا في البيت بقالنا 5 سنوات ولا ايجار ولا ميه ولا كهربا !!!!!
المهم فاخويا بيقوله طيب والسكن هتسكنو فين؟؟؟
فقاله احنا ناخد شقة من الشقق اللي فوق (استعمار بقى ) نأجرها يعني
او ناخد شقه برة ....انا كده كده مش مرتاح في القعدة في البيت هنا !!!!!!!! تخيلوا بيقول الكلام ده لاخويا
المهم خد رأيهم فوق (قصده على ماما واختي ) ورد عليا
بعدها بيومين اخويا قاله انت طبعا زي ما قلت اه زي لأ
بس ماما مش موافقة يتفتح .....في البيت هنا
وده طبعا لان وجود ...... يستدعي ان البوابة مفتوحة 24 ساعة ومعاناه هلك للبيت
وماما رغبتها ان البيت تكون ليه خصوصيته وحرمته ....فقاله ماشي
واجاركم الله عاللي عمله فيا ....
ا نتي اصلا فين حقك ؟؟ انتي لازم تبقى عارفة نصيبك في باباكي ...انتي فين الفلوس اللي باسمك
في البنك؟؟؟ انتي مخليه الدفتر عند مامتك ليه؟؟؟ انتي عارفة حقك في الاراضي ؟؟؟....الخ الخ الخ
المهم انا رديت وقلتله انا عارفة حقوقي كويس ومحدش عندنا هياكل حق اخوه
وبعدين الميراث دي انصبة ربنا موزعها في كتابه واحنا معندناش حد هيغضب ربنا
قعد يتريأ ويقولي ابقي قابليني وانا ابقى واحده ست ان اخدتي حقك ....
انتي تطلبي منهم يفضوا الشقة اللي احنا فيها دي (طبعا لان العفش اللي احنا بنهلكه من 5 سنين بتاع بابا وماما )
المهم يفضوا الشقة علشان نأجرها لحد وناخد الايجار ندفعه ايجار لشقة تانيه ناخدها برة البيت
انا مش طايق اقعد في البيت ده !!!!! طيب وهو انا ملزمة ادفعله الايجار ؟؟؟مش عاجبه البيت مانطلع منه
ونأجر شقة تريحه ويطيقها بس مش هادفع ايجارها مش كده؟؟؟
اه وتعرفي كل حقوقك كتابيا في كل حاجة المال السايب والبيت والارض
وده علشانك انتي وولادك مش علشاني انا مش الراجل اللي بياخد حاجة من حق مراته!!!!!!!!!!!!!!!!!!!!!!!!!
اه والولاد ميطلعوش فوق نهائي دول ولادي وده حقي انا مش عاوزهم يتربوا نفس التربية دي
انا مش على استعداد ان بنتي جوزها يسألها معاكي فلوس اد ايه ؟؟ تقوله معرفش كام بالضبط
وبصراحة انا عارفة فلوسي اد ايه بس عارفة اني بمجرد ما اقوله عالرقم هتبتدي الطلبات والتماحيك علشان ادفع
فأنا قلتله ماشي ان شاء الله وقصرت الشر ودعيت ربنا انه ييسر الامور .....
النهارده لقيته بيقولي يا ريت متهربيش من المواجهه ومتتحججيش بالطبخ والعيال ومتتكلميش في الموضوع اللي قلتلك عليه
فبقوله موضوع ايه؟؟؟ بيقولي تطلبي حقوقك كلها كتابيا ....وبصي بقى ده اخر قرار عندي ان تاخدي كل حقوقك ده قصاد استمرارنا مع بعض !!!!اه انا بقى بادور على حجة علشان نفترق ....بصراحة انا اتخنقت فقلتله ياااااه بتدور على حجة؟؟؟
طيب ما لو عاوز نفترق يبقى ليه بتدور على حجة؟؟؟ وده لقيته قال بقى كده؟؟؟ ماشي من النهارده وقام لم شوية من هدومه
والفلوس اللي كان شايلها وقالي لما تعرفي قيمتي ابقي دوري عليا وبكرة تعرفي مين الخسران؟؟؟؟
فبقوله اهدى بس واستعيذ بالله من الشيطان
لقيته بيقولي ا نا قعاد في البيت ده مش قاعد ومش هروح ادفع ايجار شقة وانتي عندك شقة هنا
انتي لازم تاخديها وتأجريها وتعملي فيها اللي انتي عاوزاه ان شا الله تفتحي فيها كباريه
انا مش على استعداد ولادي يشربوا من نفس التربية دي !!!! فبصراحة قلتله تربيتي دي هي اللي خلتك تتجوزني
واسأل عمو وطنط (باباه ومامته) عن تربيتي طيب ياريت ولادي يتربوا نص تربيتي
وقلتله انت مشكلتك انك مجربتتش بني ادمة مش متربية او مش كويسه فيرد يقولي اه انا مبعرفش اتعامل مع حد متربي
وأقسم بالله لاعملك فضيحة هنا واخلي سيرتنا على كل لسان وهو ده اللي هيرد اعتباري وياخدلي حقى من ضحكك انتي واهلك
عليا السنين اللي فاتت!!!!!!!!!!!!!!!!!!! مش عارفة والله مين اللي ضحك على مين ؟؟؟؟
ده انا باطلب موضوع الشقق ده بقالي 3 سنين وكل اللي باخده مماطلة وبس
هوانا اهلى مش من حقهم انهم بتطمنوا كويس هما هيدوا تعبهم وشقاهم لمين؟؟؟؟؟؟
هو اهلي غلطانين علشان شايفين ان ده ميراثي وهو ده سندي من غدر الزمن وغدر جوزي؟؟؟
ده انا باحمد ربنا انهم موافقوش على موضوع العيادة ده من زمان كان زمانه بيقول دي شقته بوضع اليد
وكان طردني انا وولادي منها ................
المهم في النهايه وهو ماشي بقوله طيب مش هتسلم عالولاد؟؟
لقيته بيرد وبيقولي كلام بيئة جدا
بيقولي .. ام العيال مقدرش اقول الكلمه
وطــ. في ميت عيل
عاوزاهم اهم عندك مش عاوزاهم هاتيهم
وانا بقولك اهه اهلى ميعرفوش حاجة عن الموضوع انا حذرتك اهه اهلي متقوليلهمش حاجة
لان الكلام معاهم هيجيب نتيجة عكسية .............................
ومشي .................
قسما بالله العظيم ده اللي حصل بدون اي اضافات
اعمل ايه؟؟؟ وايه رأيكم ؟؟؟؟
وفضيحة بفضيحة انا دكتورة وهو دكتور
وحسبي الله هو نعم الوكيل
معلش يا جماعة انا عارفة ان الموضوع طويل جدا
بس انا حبيت انقله كامل وماحذفش اي كلام هيا كانت كاتباه
علشان الصورة تبقى واضحة عندكم
وعلى فكرة انا لونت كلام جوزها بالاحمر علشان يبقى باين
بعيد عن تعليقاتها وسردها للموضوع ...
ودلوقتي مستنية رأيكم
سلام مؤقت
dr_rasha @dr_rasha
عضوة
يلزم عليك تسجيل الدخول أولًا لكتابة تعليق.
الصفحة الأخيرة
الي زي كذا يا ينعدل ولامال وجوده فايده والله بابا صادق تموتين مقهوره
لاتقولون ينصلح اشتري راحتك قبل كل شي