حسبي الله ونعم الوكيل

السلام عليكم ورحمة الله وبركاته

بنات وربي اني بهم عظيم

انا والحمدلله ترشحت بجدارة وطابقت واجتزت المقابله والكشف وكل شي تمام ولله الحمد وامنه وطلع تعييني بالقصيم

يوم خلصت كل شي وسلمتهم كل شي وربي اني بلبس عباتي وباطلع من عندهم وانا عند الباب الا وتناديني الموظفة

لو سمحتي تعالي في خطاء:ohmy:؟؟؟؟؟

روعتني من جد رجعت لها واقولها وش خطائه ؟؟؟

واللي رفع ضغطي تطالعني بابتسامه وتقول النقطتين:confused:

اي نقطتين اي خرابيط!!!

قالت اسمك في الوثيقه مو مطابق لبطاقة الاحوال؟؟؟

اسمي في الوثيقه سميرة تاء مربوطة فوقها نقطتين!!

وفي البطاقه سميره بدون نقطتين!!!

طالعت فيها باستغراب قلت والمطلوب ؟؟

قالت لازم تعدلين الوثيقه او البطاقه

قلت انتي من جد تتكلمين تعطليني علشان نقطتين يختي نقطتين ماغيرت باسمي وجرفته

حبيبتي الدنيا تطورت كل شي بالنت وانتم توكم على نقطتين!!

من جد يابنات فقدت اعصابي:024:

قالت والله زيك زي غيرك ياتروحين الجامعه ويشيلون النقطتين علشان تتطابق البطاقه

او تروحين الاحوال ويحطون نقطتين علشان تتطابق الوثيقه!!

قلت خافوا ربكم انا من الرياض ومشوار كل يوم والثاني ساحبه رجلي وجايينكم علشان ورقه اللحين التعاملات كلها

وانتم بعدكم على سلم واستلم!!

وتروح تجيب ورقة نفس اللي عبيتها اول مرة وتقولي بكل بجاحه عدليها وحطي بخانة اسمي يطابق البطاقه لا

ومن اول مكتوب نعم يعني الخطاء من الموظفه اللي عبت البيانات اول مرة مو مني!!!

واخذ الورقه وادخل على رئيستهم واقولها السالفه واني مو انا الغلطانه ليش الموظفه مانتبهت واليوم يوم جيتكم

الموظفه الثانيه ماانتبهت الا يوم جيت باطلع انتم ماتخافون الله ترى مشوار جيتي وروحتي يختي عديها كلها نقطتين

ماتأثر المهم رقم السجل المدني مو النقطتين!!!

قالت عادي عدليها وجيبيها معاك وقت المباشرة لان كل هالشي لمصلحتك بيراجعون ورانا واذا في شي بيستبعدونك

قلت انتم الغلطانين مو انا قالت ولو عدليها وجيبيها معاك!!!

حسبي الله عليهم ونعم الوكيل ليش هالتعقيد وربي حرام عليهم اهم شي رقم السجل المدني مو نقطة والا نقطتين


واروح للجامعه علشان يعدلون الوثيقه قالت وين شهادة الثانويه

انا متخرجه من عام 1417ولاادري وين شهادتي الثانويه

حاولت فيها رحت لرئيسة القسم مارضت

قالت روحي طلعي بدل فاقد من الورزاة

لا إله الا الله

وادور بين اغراضي لقيت كل شهاداتي الا الثانويه مالقيت الا صورة

وارجع للجامعه بالصورة قالت روحي عدليها من الوزارة خليهم يشيلون النقطتين:mad:

بنات من جد طرطعت عليهم قلت خافوا ربكم رايحهع جايه قلتم جيبي الشهادة ولاقلتم عدليها تخيلوا لو طلعت

بدل فاقد ووديتها لهم كان قالوا روحي عدليها!!

حاولت من هنا من هناك مارضوا:ohmy:

وارجع للوزارة وخلصت الاوراق قلت متى استلمها قالوا ماندري انتي قديمه يمكن تطول

قلت الله يرحم امك باقي اروح للجامعه ومافي وقت ابيها ضروري والله ماقصرت كتبت ملاحظات على اوراقي

وعطتني رقم جوالها وقالت دقي علي علشان اعلمك قلت تكفين استعجليهم لي 11 سنة متخرجة وتوه طلع تعييني

حرام استبعد علشان نقطتين:icon36:

قلت لرجلي روح الاحوال وشوف يمكن يخلصونها بدري وراح اليوم تخيلوا قالوا الغلط منهم مو منا وطلعوله اسمي

ببطاقة ابوي الله يرحمه قبل زواجي قالوا نفس الاسم الغلط منهم والتعديل بياخذ منك سنة ونص لو الغلط منا:11:

ايش هذا التعقيد ياناس علشان نقطتين يضيع مستقبلي اللي ضاع نصه في انتظار التعيين

مو حرام مافي قلوبهم خوف من رب العالمين

اهم شي رقم السجل المدني لو في اسمي مليوووون نقطة:mad:

واللحين مالي حل غير الصبر والدعاء بانهم يخلصونها بدري قبل المباشرة والا على الدنيا السلام:frown:

من كثر ماتعقدت انا ورجلي بسبة النقطتين اتفقنا مانسمي عيالنا اسماء تنتهي بنقطتين:biggrin2:

حسبي الله ونعم الوكيل

دعواتكم لي بالتيسييير