حسن الظن بالله تعالى

السلام عليكم .. كيف حالكم يابنات .. *****الله بخير ..
قبل شهر تقريبا سمعت قصة جميلة واليوم جا على بالي اني أحكيها لكم .. لعلها تعود على احداكن بالفائدة ..
كانت لي صديقة من ايام الدراسة وقمت بزيارتها في منزل اهلها الجديد .. ماشاء الله البيت موقعه جيد جدا في وسط البلد وملكهم طبعا .. المهم .. اخذتنا الاحاديث.. وقلت لها انتو مو ايام ما كنا ندرس كنتو ساكنين هنا في نفس الحارة قالت لي ايوا في العمارة اللي جمبنا بالتمام .. قلت لها ماشاء الله وكيف صار النصيب واشتريتو الأرض الملاصقة لكم .. قالت لي عاد هذه قصة ثانية .. قالت لي أبويا كان كل يوم يصلي الفجر ويأكل الحمام درة في البرحة اللي قدام بيتنا ويطالع في الأرض اللي جمبنا ويقول الله ياريت تكون من نصيبي .. وكل يوم على ده الحال .. المهم نقلو من العمارة وراحو شوي ابعد ونفس الشئ صار يجي يصلي الفجر في نفس المسجد ويأكل الحمام درة .. رغم ان المسجدصار ابعد .. واشترى أرض في مكان ثاني وسوا المخطط وحفر الأرض و يوم من الأيام وكالعادة راح صلا الفجر في المسجد وراح يأكل الحمام .. ويضرب بعينو ويشوف يافته مكتوب عليها الأرض للبيع .. ياسبحان الله .. طيب ايش يسوي دحين وهو بيعمر في مكان ثاني .. راح في نفس اليوم وحاول يبيع الأرض اللي بيعمرها رغم الخسائر وراح ادين واشترى الارض اللي يحلم بيها طول عمرو وبناها وسكن فيها .. شوفو كيف سبحان الله القادر على كل شئ .. الانسان مننا ضعيف ولا يدري ربي اش كاتب لو .. عشان كده يابنات لا تتذمروا لا تتعالوا لا تتكلموا وانتو ما تدروا فين النصيب .. اللي تقول انا لسه ما اتزوجت .. واللي تقول انا ما خلفت .. واللي تقول زوجي ما يحبني او ما يسال في .. ترى ربنا هو وحده العالم ..ولله في خلقه شؤون .. احسنو الظن بالله تعالى احسنو الظن بالله تعالى .. احسنو الظن بالله تعالى .. والله يوفق الجميع ..