حشيت فيكم حللوني

السلام عليكم ورحمه الله وبركاته
كيفكم بنات الله يسعدكم دنيا واخره صلوا على النبي
سبحان الله وبحمده سبحان اله العظيم

بنات قبل فتره صارلي موقف بالدوام وحده من الموظفات دخلت علي المكتب وقالت فلانه تراني حشيت فيك حلليني 😕الموهم حاولت اطنش الموضوع وقلت لها محلله بس بصراحه مو من قلبي
وقبل اسبوع صارلي بعد نفس الشي وحده ثانيه دخلت علي بمكتبي وكنت فرحانه ومبسوطه قالت لي فلانه حشينا فيك اليوم حللينا
سكتت بعدين قلت مااحللك وانا مبتسمه ع بالي انها تمزح قالت كيفك انا قلت لك اني حشيت فيك
قلت الله يحللك ويسامحك انتي الخسرانه الموهم دخلت علينا استاذه وقطعت كلامنا
بس احس بقلبي قهر خير وشذا الاسلوب طاحوا الناس بهالحركه انها تقول لفلانه تراني حشيت فيك ع بالها كذا سقط ذنب الغيبه ماتدري انها تسبب بالم نفسي وذنب زياده ع ذنب الغيبه
ماادري وش استفادت من انها تقولي انها اغتابتني في ناس تحب تنشر طاقه سلبيه في محيط العمل والله من بعد كلامها جاني تعب نفسي وماعاد لي خلق اسوي شي ودي بس اطلع واروح للبيت حسبي الله ونعم الوكيل
عاد اليوم قلت لازم ابحث عن حديث او شي يثبت تصرفاتهم الغبيه هذي
ولقيت ابن عثيمين الله يغفرله ويرحمه يقول اذا اغتبت شخص وتبت لاتعلمه انك اغتبته بس استغفر له وادعوا له وحاول تحسن صورته قدام الي اغتبته عندهم واذا سمع المغتاب الغيبه تطلب منه يحللك ويسامحك
لكن تشوفني مسفهله ومبسوطه وتجي تقول تراي حشيت فيك الله يحش قلبها با لهم مثل مانكدت علي يومي حسبي الله ونعم الوكيل حشي بس لاتعلمين الي حشيتي فيه توبي وادعيله واستغفر ي له ليه تنكدين ع الناس
والله تنكدت ذاك اليوم والى يومكم ذا وانا كارهتها وشايله بخاطري منها علشان هالكلمه
وش رايكم بهالاسلوب حسيته منتشر بكثره انها تحش وتقول فلانه حشيت فيك حلليني ع كيف امها تستانس وتفضفض واذا ارتاحت غثت الي حولها
مااقول الا حسبي الله ونعم الوكيل ع كل من يحب يشوف اخوه المسلم منغث ومتنكد