حطيت قاز في شعري تعالو شوفو النتيجه

السلام عليكم ورحمة الله وبركاته

اخواتي العزيزات باركو لي امس حطيت قاز في شعري ( جاز) ...

اعتقد البعض منكم يذكر موضوع الاخت وليده اللي ذكرت فيه القاز واللي حصل للموكيت في بيتها لمن اتكب عليه القاز ... اللي حصل اني بعد شد وجذب واخذ وعطاء في الموضوع قررت اني اخوض التجربه بنفسي ... بمعنى اني احط القاز في شعري ( كله فداء لعيون بنات حواء شوفو كيف التضحيه ):09: :09:
المهم ياطويلات العمر انا وعدت الاخت وليده اني اطيق تجربتي يوم الجمعه اللي هو يوم امس ( عشان اجازتي الاسبوعيه ) وكتبت في نفس الموضوع الطريقه اللي ناويه اطبقها اثناء التجربه ...
وعشان البنات اللي رح يقولوو مجنونه دي تحط قاز في شعرها واللي علقو في موضوع الاخت وليده على مسألة القاز اقول لهم انا عن نفسي حطيت في شعري بلاوي كتير ماراحت وجات على القاز ( دا حتى طيب وابن حلال القاز دا :42: ) يعني جربت بخاخ ريجين لمدة سنه ولا جاب فايده وجربت حبوب الزنك وحبوب زيت السمك وكمان جربت كامينو موتو وبالاخير قالو يسبب سرطان وعموما بدون مااحد يقول شي كلنا عارفين ان البخاخات دي مواد كيميائيه اقلها القاز احنا فاهمين هو ايه ... دا غير الزيوت وخلطات الزيوت اللي بنشتريها ولا ندري ايش فيها واللي بنخلطها بنفسنا ) ... ادري طولت عليكم بس عشان اوضح شبب اقتناعي بالتجربه دي ( وبعدين زمان كانو جداتنا يحطوه وانا ذكرت في موضوع الاخت وليده عن جدتي الله يشفيها وكيف كانت تحطه في شعر عماتي وهم صغار وانهم مشاء الله للآن شعورهم ثقيله رغم انهم عجايز ...وبعدين في مصر بيحطوه عادي جدا واللي تقول لي عشان القمل اقول لها اوكي للقمل واشياء اخرى وبعدين مهو مضر بالصحه والدليل الفلاحات المصريات صحتهم مشاء الله زي الفل ( عموما انا كنت ناويه احط كميه قليله في شعري بمقدار ملعقه الى ملعقتين بس سألت دكتوره اثق فيها وقالت لي دا ممتاز بس انتي اتحملي ريحته وقالت لي حطيه كميه وسقسقي شعرك بيها ( اغرق شعري او بمعنى اخر امليه قاز) وحطيه لوحده ( لاني كنت ناويه اخلطه بالزيت ) والدكتوره دي اثق فيها جدا ...
المهم ياطويلات العمر رح اديكم تجربتي بالتفصيل بكل مراحلها :

بسم الله الرحمن الرحيم :

أول شي انا متوكله على الله ولله الحمد وكمان لمن استخدم اي شي جديد اقول بسم الله الذي لايضر مع اسمه شيء في الأرض ولا في السماء وهو السميع العليم واقول بسم الله الرحمن الرحيم واحط )

المرحله الاولى : انا ذكرت لكم اني نويت احط قليل بس بعد الدكتوره ماقالت لي كويس قلت اوكي بسوي زي ماقالت وحطيت في شعري مقدار كاسة شاهي وفركت بيها فروتي ( قاز لوحده ماخلطت معاه شي تاني ) بالبدايه حسيت بسوية تقريص خفيف (نغز ) بس بعدين وقف وتركته على شعري لمدة ساعة كاملة .
المرحله الثانيه :
في وحده من الاخوات جزاها الله خير كتبت مره عن زيت هي استخدمته وفادها في شعرها وكان عباره عن زيت نارجين ( اللي علبته خضراء + ماسكه وسابله وساق الحمام ) انا الزيت دا سويته من ايامها ولا استخدمته بانتظام وباقي عندي منه لاني كسوله ...( حطيت مع الزيت حبتين من حبوب منع الحمل ( ياسمين ) في وحده من الاخوات ذكرت في موضوع انها تكثف الشعر وتحطها مع الشامبو ووحده اضافت انها تحطها مع الزيت لان الزيت بيفضل في الشعر مدة اطول انها حطيت حبتين في الزيت من الليل ورجيته كذا مره ( هي اليوم لقيتها راسله لي الطريقه وانها تطحن الحبوب بعدين تحطها بس انا حطيتها بدون طحن بس بعد كده انشاء الله رح اطحنها بس المره دي عدت خلاص بدون طحن )
عموما انا بعد ساعه من زضع القاز على شعري حطيت الزيت وفركت فروة راسي كويس وترتكته ساعه كامله على شعري .

المرحله التالته :
الشامبو ( نفس موضوع حبوب منع الحمل حطيت مع الشامبو من الليل تلات حبوب منع الحمل من نوع ياسمين ، وعلى فكره انا سألت الصيدلي على مووضوع الحبوب دي وهو قال لي انها ممكن تكون مفيده لان سبب التساقط نقص هرمون الاستروجين والحبوب دي عباره عن هرمون استروجين فهي انشاء الله مفيده عموما هو قال لي لو مافادتك انشاء الله مابتضرك ) انا غسلت شعري بالشامبو دا وعلى فكره هو كان شامبو عادي يعني بدون بلسم ( البلسم لوحده )...

غسلت شعري كويس بالشامبو ولمن خرجت من الحمام وانتم بكرامه تركت شعري ينشف لوحده وعلى فكره للأمانه ريحة القاز قويه يعني المتزوجات صعب شوية عليهم :22: ، انا تركته ينشف طبيعي وحطيت عليه دهن عود وخمريه ولمن نشف تماما بخرت شعري بس الريحه سارت خفيفه بس موجوده .

نجي للنتائج :

1- شعري ناعم فما اقدر اقول سبب لي نعومه بس كمان ماعمل لي جفاف في شعري والحمد لله .
2- لمعه غير طبيعيه في شعري ( من جد يابنات والله لمعه خياليه )
3- بالنسبه للكثافه ماحصل شي طبعا واكيد مش من اول مره وانا قررت اني استخدمه على الاقل مرتين بالاسبوع لمده لاتقل عن تلات شهور عشان اشوف نتيجه كويسه انشاء الله
بس دا كل اللي حصل معايا وانتظر تعليقاتكم