(حفر و شخاميط) تأليف : كريمة أساس :)

هلا يا بنـيــــّـــــات .... كيف حالكم ؟؟؟
بأقولكم ,و انتوا اكيد مثلي , لين طالعت و شفت و جلست أتمحص و أتفحص مذيعات قناة الجزيرة ولا العربية و لا العارضات في المجلات أقول في نفسي حتى لا يسمعوني إخواني "يا عليهم بشررررررة تقول زبدة من الصفاااااااء عنبوا ذولي وش يستخدمون كريم أساس !!!!؟؟؟؟"
من هنا بدت رحلتي مع كريمات الأساس ...
قالت لي أمي جربي سان لوران يهبببببببببببل .. و أقوم أطمر للسوق و أجيب لي ذاك السان لوران و ألطه في وجهي .... :blink: وععععع وصار وجهي كنه جبس و مفتت بعد
قلت يا خسارة الفلوس اللي دفعتها فيه ....يمه خذيه ما أبيه مدري وشلون تستخدمينه وع!!!

قالت لي صديقتي ..هاو ما دريتي عن كريستانديور لا يفوتك جناااااااااااااااااااان يخلي بشرتك كنها قزازة ..... قالت و لا ماقالت و مير أطمر للسوق و أجيب لي ذاك الكريستانديور و أصبغه في وجهي :blink: يمه وش ذا الشخوط اللي في وجهي و كل ما وخرت شخط طلع شخط ثاني و أمسك الإسفنجه بأمسح ذا الشخوط و مير تزيد وعععع طلعت حمار وحشي بس بلون واحد
ياسفاب الفلوس وين أودي ذا الحين

قالت لي خالتي ... الحمدلله في أحد ما يستخدم سماش بوكس يخلي بشرتك طبيعيه ماكنك حاطه كريم أساس ... ما كملت خالتي كلامها إلا و أنا جايبته من السوق و ألطه في وجهها ...:blink: و يدخل ولدها يمه وشذا الطين اللي في وجهك وعععععععععع
يا خسارة الفلوس خذيه يا خاله ما بيه

و تقولي مرة أخوي ... لا يفوتك يا بــتــــوته مااااااااااااااااااااك يطير العقل يعطي لمعه تغطي على لمعه القمر ..... و ماردني إلا السوق خذتلي ماك وجيت البيت و أطشه على وجهي :blink: و أناظر في المرايه و أقرب وعععع ماكني قبل صابغه وجهي بعلبه مرطب وشذا!!! خلا بشرتي صحراء قاحله من الجفاف شوي و تتشقق ...
ياربيه وش أسوي بذا الحين خلني أحطه في شنطة مكياجي أخليه لركبي و كوعاني أبرك

و أقوم أحمق و أروح للسوق و أمشي و أنا معصبه وكل ما أحد كلمني من ذا البياعين حقين المكياج يسوي دعاية لمنتجاته التفت عليه و أناظره ذيك النظرات الحقد و أقوا " أشششششششششششششش انت كذاب و خراط و .... الخ " ..... شوي و أدخل بالصدف عند ميك أب فور أيفر و أقوله " وشلون كريم أساسكم ؟؟؟ ولا هو بعد معفن مثل غيرة "( بديت أسترجل من الحقد ) "" لااااااااااا مدام شو عم تحكي هدا الكريم ب .... "" و أقطع كلامه و أقول بلا فلسفه يعني وقفت على ذا الكريم ما أجربه ... و أخذه و أروح للبيت و أدهن وجهي و أناظر في المرايه ... هاه .... وشو ... و أقرب .... و أطمر ذيك الطمرة لين ما خبطت بالسقف الحمد لله لقيت كريم أساس يمشي حاله صح إنه جفف بشرتي شوي و ما غير لون بشرتي و لا صفاها :blink: بخخخخخ بس خلاص تعبت لدرجة قمت أقنع نفسي إن هذا الكريم زين و يهبل وصرت كني مذيعه في بيت أبوي بببببببببببخخخخخخخخخخ

في النهاية قررت انتحر بس فكرت استغفر الله ما يجوز حراااام ...و صاروا يسموني أهلي ( كريمة أساس ) من كثر ما أهذري بكريمات الأساس لحد ما أقنعت نفسي و قلت "مو أنا الوحيده اللي أعاني لأني كل ما رحت لمناسبه أتخرع و أتروع و تجيني كوابيس من وجوه ذا الحريم حفر و شخاميط و مشق وحثاريب و بثور وتجاعيد كل هذا بسبب الأساس !!!

عنبوا شيطانهم وش يستخدمون ذا المذيعات و الفنانات ؟؟؟؟؟

فجأة قالت شغلتنا مدام في هدا كريم فليبيني كويييييييييييس خلي وزه إمنتي هيلوووووووووو....
<<<<<<<<<< وش وراي ورى ما أجربه