بطاقة دعوة
تتشرف هـنــايا بدعوتكم لحضور حفل الزفاف الكبير لفريد المذاق
فارس الضيافة العربية مطارة القهوة على ملكة المذاق أميرة
الضيافة العربية مطارة الشاي وذلك في منتديات عالم حواء
قسم الفن والأشغال اليدوية . .
وتروي لكم أميرة الحفل العروس بعض من ذكرياتها . . .
أنا مثل كل مطارات الشاي ، إذا ما كنت في الخزان أكون في غرفة
الضيوف ، وطبيعي في الخزان ما أكون مرتاحة الظلام يخوفني ويخليني
كئيبة ، أنا أحب الشمس والهوى النقي والطبيعة وأحب كل شي حلو ،
ولما أكون في غرفة الضيوف بعد ما أكون مرتاحة ، لاأن الحريم لما
يتجمعون يصير ما لهم سيرة غيري ، وحدة تقول هذي المطارة وايد
حلوة بس عيبها تبرد الشاي بسرعة ، وثانية تقول واي هذي المطارة
كانت عندي قبل سنة موديلها صا ر قديم ، وغيرها تقول بسرعة تتكسر
أو لونها مو حلو ، وكلام غيره وايد له أول ما له آخر . . ، يقولونه وما
يا خذون بالهم إنهم قاعدين يجرحون فيني . . ، مو كافيهم الماي المغلي
إللي يحرقوني فيه كل يوم . . . !!
قبل كم يوم خذتني هنايا من الخزان ، وإللي حيرني إن ما كان في عندها
ضيوف ، خفت إنها تكون ملت مني وتبي ترميني وتتخلص مني ، وحطيت
إيدي على قلبي وحسيت إني خلاص عمري راح ينتهي ، وتمنيت بيني وبين
نفسي إني أظل محبوسة بالخزان أهون لي من سلة المهملات . . !!
بس المفاجئة لما لقيت هنايا تحاول تفصل علي قماشة بيضا أظن إن اسمها
من التور . . ، تحيرت شنو هنايا تبي تسوي فيني ، بس حيرتي هالمرة
اختلفت عن حيرتي الأولى ، هالمرة قلبي يدق من الفرح مو من الخوف . . !!
المهم قصت التور والفازلين بالمقاس المناسب . .
وبعدين خيطت الحافة بخيط السنارة . .
وسحبت الخيط من الناحيتين عشان يعطي الشكل إللي تبيه . .
ولفته علي وشدت الخيط . . ، وصار أحلى فستان عروس . .
وخذت بعض الاكسسوارات وقعدت تفكر شلون تزين الفستان . . ؟!
ولفت على الفستان شريط ذهبي وشريط ثاني بيج . .
وخذت ورد وايد حلو وناعم دخلته بالشريط . . وصار أروع
فستان عروس . . .
يتبع. . . . .
وثنته بشكل عمودي بحيث خلت الطبقة إللي فوق أقصر من
الطبقة إللي تحت . . ، وخيطته من النص . . .
وما صدقت نفسي وهنايا تحط الطرحة على راسي . . بعد ما زينتها
بالورد والشريط الذهبي . . ، كانت هذي أحلى وأروع لحظة في حياتي . .
وصرت ملكة جمال العرايس . . .
وصار طبعا مو ناقصني غير المعرس ، كنت أقول بيني وبين نفسي
إن شاء الله هنايا مثل ما سنعتني ما تنسى تسنع المعرس . .
الصراحة كنت خايفة إنها توهقني يعني حزت الزفة ما نلاقي المعرس
وتحرجني جدام المعازيم . .
بس الحمدلله إنها خيبت ظنوني ، لأنها خذت مطارة القهوة وبدت تفصل
ثوب المعرس . .
قصت الفازلين بالمقاس المناسب ، وثنته من فوق . .
وقصت من الناحيتين زاوية مثلثة . .
ولفته على المطارة وثبتته عدل بشوية صمغ وثبتت الأزرة . .
وبعدين خذت قطعة قماش بيضا مع خيط أسود مبروم . .
وسوت منهم غترة وعقال . .
واو . . صار معرس يهبل . .
وسوت لنا هنايا أحلى زفة . . ، وصارت تفتخر فينا جدام الضيوف
خصوصا بمناسبات الزفاف . .