حقيقه مستشفى ادم بالقاهره وتجربتي معاه

السلام عليكم ورحمه الله

بالبدايه احب اقولكم ( الله يبلغنا واياكم رمضان وحنا بااتم الصحه والعافيه )


فيه بعض الاخوات يمكن يعرفوني لاني اشارك معهم بموضوع الصفر
انا متزوجه من ٣ سنوات عقم زوجي عرفناه اول سنه
خلال هالسنه عمل عمليه دوالي عند الدكتور ( سعيد قطان ) مستشفى الحبيب العليا الرياض

وخلال السنتين الاولى كان ياخذ فيتامين وادويه كثيره من بينها ( بروكسيد بلس واوميغا)

- سمعنا عن الدكتور مدحت عامر موجود بالقاهره ويمدحون فيه كثير بمنتدى طبيبي وان فيه اشخاص راحوله كثير واستفادو والسنه الي فات جاء بجده ( هو يجي كل فتره بعياده كلينيك بجده متعاون معاهم )
راحله زوجي وشاف الهرمونات وكتبله على نوعين ابر ( مورينال & كوريومون )
وقاله استخدمهم لحتى يوم العمليه لو تجلس سنه تستخدمهم مافيش مشكله
استخدمهم زوجي تقريبا ٨ او ٩ شهور كل يومين ياخذ ابره

توكلنا على الله بعد سنه وقلنا نروح له بمصرونسوي عمليه المسح المجهري ومن هنا بدت ( المعاناه والتعب الجدي )





. تعبنا الاول كان بتواصلنا مع المستشفى كان كله بالايميلات واذا كلمناهم كل واحد يحذفنا على الثاني
صارو كل شهر يطلبون منا تحليل هرمونات لي ولزوجي
انا قالولي عندك لخبطه واستخدمت حبوب ديانا تقريبا ٤ شهور لحد ماقالو كذا اوكي وقفي
زوجي طلبو منه يااخذ حبوب ارامديكس مع الابر




. وصلنا لمصر بالسلامه ورحنا نبحث عن المستشفى وكانت الصدمه ان المستشفى بوسط حاره
جدا وصخه ومايصلح فيها مكان لمستشفى
دخلنا المستشفى وكان عباره عن ( عماره سكنيه شقق ) قديمه مره
كانو شغالين يصلحون الديكور بس كان قذر المكان بس باديين يصلحون ويعدلون بالمكان هالوقت
قبال هالمستشفى مبني العمليات جديد ونظيف عكس الاول




. المعاناه الثالثه كانت اول يوم ندخل ونعبي بياناتنا دخلنا على الاستقبال اخذو بيناتنا وفتحولنا ملف وقالو روحي للدور الثاني للجنه الطبيه رحنا فوق وكل غرفه ندخلها مااحد يعبرك
كل غرفه يرسلونا للغرفه الثانيه مافيه احد يمسكك ويقولك اعمل كذا وكذا او روح للمكان الفلاني وخلص ( بصراحه حسينا انفسنا نعقب معامله مو راضيه تخلص )
بعد هذا كله قدرنا ندخل للدكتوره وطلبت مني كشف سونار وهنا بدت معاناه جديده
لقت فيني كيس دموي على المبيض اليسار الي هو البطانه المهاجره
كانت صدمه لي لاني جايه عشان عمليه لزوجي على اساس انا سليمه
قلتلهم ليه ماطلبتو مني هالسونار وانا بالسعوديه ؟!!
الشغله كله خبط لزق تعالو وخلاص

ارسلونا لمركز ثاني عشان اسوي كشف 3d لان بمستشفاهم ماعندهم ورحنا ندور هالمركز الثاني وعلى ماوصلنا لقيناه مقفل قالت تعالو بكره الساعه ١ الظهر سويت السونار ورجعت المستشفى قالولي رحي الدور السادس مدري السابع عشان يسجلون الاوراق بملفكم رحنا للدور السابع اول ماجلست عند الباب لاشعوريا دموعي نزلت لاني كنت مرررهقه من الطلعه والنزله




. موضوع الكيس الدموي جلسنا عندهم شهرين كامله ( خسرنا كثيير خلال هالشهرين من سكن وتكاسي والاكل ) طلبو مني اسوي عمليه شفط الكيس ثاني يوم دوره واعطوني حبوب ديانا سبوعين وكنت كل اربعاء اجيهم يشوفونه بالسونار
شايفين تضييع الوقت !! كان من الممكن يطلبون مني كل هذا وانا بالسعوديه





. بالاخير قررو لي عمليه شفط الكيس بس قالو ماراح نشفطه كله بس نصه نبدا معك ابر التنشيط انا فرحت كثييير كنت ابي اقولهم سووها الحين بس خلصوني
يوم عمليتي نادوني بغرفه صغيره وقالو بدلي ملابسك بملابس العمليه وملابسي ادور مكان احطهم فيه مالقيت وتجي الممرضه وتقولي عادي حطيهم اي مكان وتفتحلي درج مكسور بابه وتقول حطيهم هنا :rolleyes:
طبعا عمليتي كانت ثاني يوم دوره ومتخيلين منظر اني بدون شي من تحت :freak6:
بعد ماخلصو العمليه وصحصحت شوي احس نفسي من تحت رطبه ويوم فتحت الشرشف الله لايوريكم المنظر ( عذرا على الي بكتبه ) بس كان الدم واصل للركبه انفجعت
كيف مخليني بهالحاله وفوق هذا صابين البيتادين الاحمر وكل رجليني حمراء للساق
كيف ماينظفون المريضه بغرفه العمليات ويلبسونه شي !!!!!!


ناديت الممرضه ولا حولك احد اسمعهم يسولفون ويضحكون وانا ماحد معبرني لحد ماناديت بصوت عالي وخافت وجت قلت جيبيلي ملابس انا مليانه دم كيف تخلوني كذا والدوره فيني قالت بآستغراب ( الدوره قاياكي ؟؟) بصراحه انسدحت ولاكملت كلامي معها لانها هي مشرفه على وجايه معي من بدايه العمليه وبالاخير ماتدري انا مسويه عمليه ايش !!





. فيه نقطه قاهرتني جدا بالمستشفى هي الممرضات مجموعه بنات صغار بالعمر يمكن اعمارهم ٢٤ سنه هالبنات كلهم تعاملهم سيئه واذا جيتي عند اي وحده تحسسك انك تشحذين منه
تعاملهم مع الجميع كذا كبير وصغير مايحترمونه
فيه وحده اسمها شيماء هالانسانه تحسسك انك ماكله حلال ابوها هالبنت موجوده بالدور الثاني عند الاستقبال شغلتها تاخذ ارقام الناس وتنادي عليهم وترشدهم لمكان عياده الدكتور وتسجل حضروهم بالكمبيوتر بس تعالو شوفو اذا احد كلمها ماتلتفت له بس تاشر بيدها بطريقه وقحه او اذا سالها احد ماله خلق تجاوب تسكت ووكآن الي يتكلم سراب هالصفه باغلب الممرضات عندهم يمشون ويتركونك تكلم نفسك




. المستشفى صحيح دكاترتهم شاطرين خاصه اطباء النساء كلهم ماشاءالله ممتازين

. احد العيوب الي بيتعب الواحد منه اذا راح هناك هي ان كل زياره لك راح تدخلين على دكتور غير الاول
اي دكتور فاضي راح يدخلونك عليه يمكن خلال علاجك كله تشوفين كل يوم دكتور وهالشي مو حلو لنفسيه المريض وتضطر تعيد كلامك كل مره تروحلهم
غير كذا كل تخليص امورنا بالمستشفى هو اجتهاد شخصي منا يعني لازم الواحد يروح يسجل بياناته ويجيب اوراقه ويوديهم لفوق عشان يطبعونهم واذا خلصت كشفيه لازم تروح للجنه الطبيه الي هي بنتين جالسات ويقولونك وش صار بالعمليه وش صار بالكشف
عكس المستشفيات المعروفه الي تجي وتفتح ملف ويعطونك رقم وتدخل على الدكتور ويعلمك وش فيك وتطلع خلاص
يخلونك تشيل هم فوق الهم الي انت جاي عشانه
والله اشوف ناس كبار بالسن تايهين مايدون وين يروحون خاصه اخوانا اليمنين كثار بالمستشفى وواضح جدا انهم تايهين والله يلوم الي يلومهم



. نجي للعمده حقهم الدكتور مدحت عامر اللي سفرتنا كله عشان عيونه
دخلنا عليه مرتين انسان محترم
قبل سبوعين سمعنا انه بيسافر ورحنا له وقلنا احنا جايين من السعوديه عشان حضرتك تعمل العمليه لزوجي قال : اه ماانا عارف
قلت بس انت بتسافر ونخاف يجي موعد سفرك واحنا ماخلصنا تنشيط
ضحك وقال : مايصلحش اسافر من غير مااعملكو العمليه
وهكتبلكو بالسستم دلوئتي اني انا الي هملكو العمليه
قال تطمنو خالص مش هاسافر واخليكو



وقعد يشرح لنا طريقه المسح المجهري وان انا الوحيد الي اسويها بطريقه غير الناس وانا الوحيد الي نتائجي بالنجاح كبيره وهايط علينا لين شبع

حنا طلعنا وحنا متطمنين على كلامه

بعد سبوع خلصت تنشيط الي هو يوم الاثنين وطلبو مني اخذ ابره تفجيريه الساعه ٢ ونص صباحا
وسوينا الي قالوه ورحنا نعبي بياناتنا عند وحده تسجل معلومات العمليات وهنا الصدمه دكتور مدحت عامر بيسافر بكره بنفس يوم عمليتنا
انا بصراحه تعبت شهرين كاملات وحنا معهم والدكتور مدحت شهرين كاملات عنده خبر عنا وبالاخير يسافر ويتركنا !!!!!!!

كلمته اللي بالاستقبال وقال اعتذريلهم مااقدر انا مسافر لجده انا جلست وبكيت غصب عني
قلت وش بيفيدنا اعتذاره تعبنا كله راح

وكلمنا المسؤول الطبي وقال الدكتور مدحت وصاني عليكم وبجي بكره الصباح اوقف مع زوجك ! قلت مايفيد وقوفك او جلوسك قول للدكتور مدحت حسبي الله ونعم الوكيل فيك

اضطرينا نسوي عمليه زوجي عشان مايروح كل تعبنا على الفاضي وتوكلنا على الله

سواها زوجي امس عند الدكتور احمد عبدالهادي وهذا دكتور مصري كان موجود بمستشفى عيد كلينك بجده وصديق مدحت
بعد ماخلص زوجي عمليته حطونا بغرفه مع واحد ليبي وطبعا انا صايمه من امس الساعه ١٢ الليل لانهم طلبو مني اصوم عشان لو لقو حيوانات منويه اسوي عمليه شفط البويضات
قالولنا تعالو الساعه ٨ الصباح ولادخلو زوجي عمليات الا الساعه ١٠ ونص ويقول جلست فوق حول ساعه بالغرفه قبل لايبدون
يعني دخل عمليته حول ١١ ونص بعد ماطلع رحت له وانتطرنا الدكتور يجي يقولنا وش صار بالعمليه مااحد عبرنا قعدنا اكثر من ساعتين ننتظر جت الساعه٢ الظهر ولااحد جانا الاالممرض الي يتهرب من الاجابه بس شاطر يجينا معه فواتير وادفعو
قلتله ليت اهتمامكم بالمريض مثل اهتمامكم بتجميع الفلوس

الليبي الي بجنبنا كان يهاوش وطفش من الانتظار وراحلهم برا ويهاوشهم يقول ليه مااحد يجي يقولنا وش صار على العمليه كلنا مؤمنين بقضاء الله ارحمو الحريم الي صايمات من امس ولااحد عبرهم

وجت المديره تهدي فيه وتقول الدكتور راح يتعاقب لانه طول عليكم وتحاول تهديه
بصراحه لو الليبي الله يجزاه خير ماسوا كذا كان ماجانا الدكتور

اعجبني تصرفه كان شايل هم زوجته ويقول انها تعبانه من الصيام انا مو مهم المهم هي تفطر او لا

بصراحه كان الصيام متعب جدا لدرجه ادوخ من الجوع وارجف وكان زوجي يقولي كولي شي بس كان عندي امل ان عمليته تنجح


جانا الكتور وقال مالقينا شي بالعمليه واخذنا خزعه ونتيجتها بعد ١٠ ايام
حمدت الله على نعمه ولبست زوجي وطلعنا
وخلصت رحلتنا مع مستشفى ادم اللي مااتمناها والله لعدو يمر باللي مرينا فيه خلال هالشهرين






بالاخير كل كلامي الي كتبته تجربه شخصيه لي ويشهد الله مازدت كلام من عندي
بالعكس فيه تفاصيل كثيره بس مابغيت اكتبها عشان مااحد يحس اني متحامله علي المستشفى

المستشفى مسوي لنفسه دعايه كبيره بالمنتديات خاصه منتدى طبيبي هو صح الاطباء فيه شاطرين بس مااشوف فيهم زود عن الي عندنا بالعكس عندنا اهتمام بالمريض والنظافه
عندهم معدوم الاهتمام




اللي يبي يروحلهم يستخير كثييير قبل لايروح
وربي ييسر اموركم على خير