حكايا وقصص عنوانها " ماضاقت الا لتفرج "

السلام عليكم ورحمة الله وبركاته


كيفكم اخواتي حبايبي
والله من جد اعتبر هالقسم بيت اهل وفيه الاخوات المحبات لاخواتهم
يوم اشكيلكم ويوم تشكون لي وكل وحدة تعتبرنا متنفس لها فينا اللي مابيدها حيلة
وفينا اللي ماتقدر تبوح بهمومها لاحد ولاتكدر خاطر امها وفينا وفينا وفينا ....


المهم اننا كلنا نفتح لبعضنا باب الأمل ونساعد بعضنا نجتاز هالحياة بهمومها ومشاكلها ..


هالأمل محتاج مننا ثقة كبيرررررررة برب العالمين سبحانه اللي قال (( أنا عند ظن عبدي بي فليظن بي مايشاء ))

ماتضيق وفي قلوبنا فسحة أمل برب العالمين وثقة به سبحانة وتعالى ...
ماتضيق الا وتفرج لو من تحت سابع أرض ..
لأن أمورنا كلها بيد رب العالمين اللي قدرته وسعت كل شي وهو على كل شي قدير ..

ولفتح باب الأمل .. لأني اشوف مواضيع هالقسم اغلبها صارت عن مشاكل وهموم يمرون بها اخواتنا وحبايبنا اخترت هالمكان زاوية للجميع
نتشارك فيها كلنا ونفتح باب التفاؤل والأمل والثقة واليقين برب العالمين
نحكي فيها قصص واقعية صارت لنا بحياتنا او حياة ناس مقربين لنا
حكايات عنوانها (( ماضاقت الا لتفرج ))
اي حكاية شدة وكرب وعسر عشتيها وانفرجت بعد ضيق وألم ..
تعالي احكيها لنا وافتحي لنا باب الأمل ..
،
،
،

الزاوية للجميع حياكم الله