حكاية معلمة (والدي يرفض تزويجي بسبب الراتب)

السلام عليكم ورحمة الله وبركاته

اشلونكم خواتي عساكم بخير ؟؟

تردد كثير قبل ما اكتب مشكلتي لكني بالنهاية تجرأت وقلت لنفسي كلنا بالمنتدى أخوات في الله وكل اللي بيقرأ كلامي أخواتي بالمنتدى وكلامي ليس من باب الشكوى لا والله الشكوى لله لا أشكو حالي لغيره ولكنها من باب الفضفضه وتبادل النصائح ومن باب (لا يؤمن أحدكم حتى يحب لأخيه ما يحب لنفسه)فأنا بحكم طبعي إنسانه كتومه نادراً ما أتحدث بما يضايقني حتى لأقرب الناس الي لكن يا اخواتي ماسطرت كلماتي الا من هول ما وقع علي من ظلم فكيف أشكو والدي؟؟وهل يعقل أن تشكو فتاة أباها؟؟والدي الله يهديه يحب الفلوس بشكل غريب حتى مكافآتي من الكليه ماكان يعطيني منها شي وكنت اصبر عشان خاطر امي واخواتي اقول بكره اتخرج واتوظف واعوضهم عن الحرمان اللي معيشنا فيه والدي لكني للأسف تخرجت وتوظفت وصار ياخذ راتبي كله ومايعطيني منه الا أجرة السيارة اللي تنقلني للمدرسه وكنت صابره اقول لنفسي بكره اتزوج واتخلص من هذا العيشه ولكن المصيبه اللي ما خطرت على بالي كل ما دق بابي عريس رفضه والسبب بحسب مايقول انه ما يضمنني اذا تزوجت اني ما اغير رقم بطاقتي السري وماعاد اعطيه الراتب تخيلوا يا اخواتي راتبي الان 7300 وما يعطيني منه الا 300 اجرة السياره وفوق هذا كله يقول ما يضمنني ولا بيزوجني وقلي بالحرف الواحد ماراح ازوجك وانتي معك راتب وفعلا صدق بكلامه قام زوج اختي اللي اصغر مني متخرجه من الثانويه وما انقبلت بالكليه لان مجموعها ما كان يأهلها لدخول الكليه وبعد زوج اختي اللي اصغر منها تركت الدراسه من ثاني ثانوي ومابقي احد بالبيت الا انا وامي ورابطني انا بالراتب واخر مره جو ناس يخطبوني من برا المدينه اللي انا عايشه فيها وبعد ما دخلوا الناس البيت وضيفهم وهو ما يدري وش يبون يوم قالو نبي نخطب بنتك تخيلوا وس سوا مع الناس الاغراب قام عصب عليهم وقلهم ماعندي بنات للزواج وطردهم شر طرده من البيت

انا الحين ما ادري فيه ناس في مثل حالي او بالاصح فيه أباء واولياء امور مثل ابوي والا انا اعيش قصه خياليه مالها مثيل في العالم الواقعي يا جماعة الخير انا مصدومه ليش يسوي معاي كذا وانا مو مقصره معاه بعد كل فتره يوديني البنك اوقعله على سلفات بمئات الالوف عمري ماقلت له لا او ليش او ما بسوي ذا الشي

انا الحين ابي وحده بس تقلي ان ابوها مثل ابوي وان حالها وحال امها مثل حالي انا وامي تخيلوا انا وامي عايشين على الفلوس اللي يرسلها لنا اخوي الموظف وهو متزوج وعنده عيال وشايل همنا بعد مالنا بعد الله الا هو والا كان متنا من الجوع وما ابي اقولكم عاد عن المعامله اللي نلقاها من الوالد انواع واشكال الحمدلله

يعني معقوله ياناس من 7300 ريال ما اشوف الا 300 ريال وبعد ماهي لي للسياره اللي تنقلني المدرسه معقووووووله؟؟

اللهم لا اعتراض على حكمك ،،اللهم حلمك وعطفك علي وعلى أمي ،،

والله يابنات انا ماعلي من نفسي ولا فكرت في نفسي انا شايله هم المسكينه امي ما اقول غير الصبر يارب

هذه قصتي وانتم احكموا!!!!