اخواتى العزيزات الاخت سهام مجاهد والاخت ام عزيزان والاخت الفاضلة الراجية وكل عضوة اشتركت بمجهوداتها فى المنتدى الرائع دة انا اتعلمت منكم ولازم اوريكم اد اية الانسان لازم يكون عندة صبر وحب للشئ ويقدر يتطور فية
انا كان عندى مبادئ كروشية بس استفدت كتير اوى اوى منكم كل الاخوات الكريمات والنهاردة جايبالكم جزء من اشغال كتير اوى موجودة عندى كروشية ربنا يديكم الصحة والعافية
دى البداية كانت اول شنطة اعملها ومكنتش اعرف ان الاكسسوار بيتلضم فى الخيط قبل الشغل فخيطة بعد مخلصت الشنطة
وبعدها فكرت اعمل شنطة لبنوتى فعملت الشنطة المربعات دى لونها بنى فى سيمونى
وبعدين العملية كبرت فى دماغى ولقيت شنطة مع الجماعة الصينين بخمسة وسبعين جنية ففكرت ان ممكن اعملها طبعا طلع فيها اخطاء كتير بس مش مشكلة عملتها وكلفتها حوالى خمسة وعشرين جنية وطبع كنت عرفت من ام عزيزان ان الخرز بيتلضم فى الخيط قبل الشغل
وفى النهاية الشتاء الماضى كانت دى اخر شنطة عملتها والحمد لله نالت اعجاب ناس كتير ويارب تعجبكم انتم كمان
ودة طبعا غير الشنط ال عملتها هدايا لاصحابى وقرايبى وان شاء الله اى جديد ليا فى الشنط هاعرضوا لكم
وطبعا لو فى اى حد من الاخوة العزيزات عايزة الباترون انا تحت امرها فى اى شئ لان دة فضل ناس كتير ولازم نحاول نرد جزء من تعبهم معانا
معلش طولت عليكم ومستنية ردودكم ان شاء الله
