اكبروتكبرمسؤلياتي @akbrotkbrmsolyaty
عضوة فعالة
حكايتي مع الحرمه ووقفه مع الاجل
بسم الله الرحمن الرحيم
السلام عليكم حبيباتي, حبيت اشارككم في موضوعي
حتى تاخذون العبره منه,وتعرفون ان عمر الانسان قصير,ويختم له اما خير او شر اعاذنا الله اياكم من الخاتمه السيئه ورزقنا الخاتمه الحسنه.
المهم في رمضان الماضي
وبعد الافطار وقت اذان العشاء رن جوال زوجي وكان في دورة المياه ,فاخذت الجوال ناظرت فيه وكان رقم غير محفوظ في الجهاز ,فاستغربت من هذا الي يدق وقت الصلاة ,اكيد احد مضطراويمكن يكونون غلطانين او انها حرمه يعني من خواته ولا قريباته,وبعدها جت رساله مباشره ,وطلع زوجي من دورة المياه وكان مستعجل يبغى يلحق على الصلاة, وعلمته عن الاتصال وناظر الرقم بس ماعرفه ,وفتح الرساله بس مالحق يقراها وقالي اقريها واذا جيت قوليلي وش فيها,قريتها وكانت من وحده تقول انها زوجة فلان بن فلان واني ابغاه في امر بالغ الاهميه طبعا انا ماعرفتها لاني ماقد شفتها مع اني لي ثمان سنوات مع زوجي بس علاقتهم شبه مقطوعه يعني بعيدين عنا كثير ,فاستغربت وش الي ممكن تغباه وشكلها مضطره,بعد كذا خاصوا من الصلاة بس زوجي تاخر شوي ورجعت تدق وعرفت انها مهتمه,فقلت لولدي رد وقل بابا ماهو فيه ,وكلمها وطلبت تكلمني ,طبعا انا ما كنت مستعده لها لاني ماكنت اعرفها,فكلمنا بعض وعرفتني عليها وقالت لي انها تبغى زوجي عشان يعطيها رقم اخوه يعني حماي انا(ومع العلم ان اخو زوجي في الهيئه وبعد يقرى على الناس )وقلت يمكن انها تكون تبغاه يقرى على احد ولا تستشيره في حاجه من هالامور,وقلت لها ابشري بعطيه خبر واحرصه اذا جاء ,والله يابنات قعدت تدعي لي دعا كوش شعر جلدي منه وتاثرت تاثر لدرجة ان دموعي نزلت من غير رايي,حتى صوتها حسيت فيه الم وعور قلبي ,وسكرت منها وانا مستغربه من اسلوبها الي وضحي لي انها فعلا في شي هامها.
جاء زوجي من الصلاة وقلت له خبرها ,استغرب مثلي من اتصالها,قلت له يمكن عندهم احد مريض وتبغى زيت ,قال لا اظن الموضوع اكبر من كذا,طلب مني زوجي اني ادق من جوالي انا واعطيها الرقم خوفا من المشاكل مع زوجها,وفعلا كلمتها واعطيتها الرقم وانا كلي سعاده اني لبيت لها طلبها على الدعاء الي قالته لي,بس قعد بالي مشغول فيها وش يكون الموضوع .
على العموم مرت الايام واحنا في صيام وافطار وصلاة وقراءة قران,بس اني ماشلتها من بالي,وبعد اسبوع جاني زوجي وقالي ترى الحرمه كلمت اخوي,عاد انا ماصدقت خبر رحت على طول سائلته وش كانت تبي؟قال ان الموضوع كبير وغريب,قلت ليه؟قال انها تقول
(ان زوجي يجي للبيت الظهر ومعاه اخوه واخوياهم ويجيبون الاكل والشراب والمكسرات ويقعدون ياكلون والناس صايمه وانا مليت من وضعه وابغى اتطلق منه بس المشكله ان البيت بانيته من فلوسي بس قدر الله وكتبته باسمهوالحين ابغى اطرده بس مافي شي يثبت ان البيت بيتي)طبعا انا انصدمت معقوله في احد مسلم يسوي هالاشياء يجاهر بالمعاصي عيني عينك ومافيه خوف ووجل من الله , الله يعافيهم ولا يبلانا الحمد لله على نعمة العقل والثبات,المهم اخو زوجي اعطاها ارقام الهيئه حتى تكلمهم ويتصرفون معه .وبعدها انالحد الان ماادري عن الحرمه ووش صار معها في موضوعها.
على العموم الاكبر من هذا كله والي هو المغزى من الحكايه كلها ان اخوزوج الحرمه هذي ليلة العيد والناس تجهز ملابسها ,وهم يجيبون خبره انه توفى !!!يعني نتعيد ونصلي عليه,ويقولون انهم لقوه في بيته ميت من ثلاث ايام محد درى عنه ,وريحته طالعه وصاير جثه منتفخه.
والسؤال ماذا ختم له؟هل كان يتوقع هذا الشخص ان اجله قبل مايتعيد مع الناس ؟.او هل جهز نفسه للموت؟
طبعا كلنا ماندري الله هو العالم بخلقه ,الله يرحمه ويغفر له ويمحو عنه الزلات اللهم امين.
شفتو كيف ان احنا نروح ونجي وناكل ونشرب ,ونحب نشتري الجديد والماركه ونبغى نصير احسن الناس ,بس اجالنا عند الله مكتوبه ماندري اليوم او بكره اوبعد شهر او بعد سنه ,الله يحسن خواتمنا جميعا .
بس انصحكم وانصح نفسي !رمضان جاي اوصيكم انكم تغتنمون كل فرصه فيه ولاتضيعونه من يديكم ,واجلوا كل شي دنيوي الى مابعد رمضان.لاننا ماندري نكمله او لا؟
حتى دخلات السوق خففوها ولا تضيعون اوقاتكم فيها,اكيد كلنا نحب نلبس الزين بس لا يكون على حساب العمل الصالح في رمضان.
ارجوكم ,ارجوكم,ارجوكم(فنحن لا نعلم متى نوت)
(اللهم اختم لنا بالخاتمه الحسنه وجميع المسلمين والمسلمات اللهم امين )
تقبلوا نصيحتي.واتمنى ان اكون قد افدتكم من قصتي هذه
وقولوا لي رايكم في الموقف الي كتبته لكم
واعذروني على الاطاله
15
1K
يلزم عليك تسجيل الدخول أولًا لكتابة تعليق.
رورو11
•
شي يضيق الصدر الله يحسن خواتمنا يارب ويثبت قلوبنا على طاعته
جزاج الله خير وبارك الله فيك
والله يشغلنا بطاعته ويعينا على ذكره وشكره وحسن عبادته
وبحسن خاتمتنا ويجعل خير ايامنا وأطيبها يوم نلقاه وهو راض عنا
اللهم آمبن
والله يشغلنا بطاعته ويعينا على ذكره وشكره وحسن عبادته
وبحسن خاتمتنا ويجعل خير ايامنا وأطيبها يوم نلقاه وهو راض عنا
اللهم آمبن
الصفحة الأخيرة