بسمة وعبده :

السلام عليكم ورحمه الله وبركاته اختى في الله الولد الغالي .... الله يعينك ويثبتك من جد هادي المواقف جهاد وامتحان. الله يساعدك تشرحي لها الصورة الصحيحة للاسلام وحرية المرأة المسلمة. بالنسبة لي انا برضه طالبة وجاتني في الفصل طالبة مسيحية من الباهاماز وسألتني ليش المسلمين مختلفين ناس تتحجب وناس لا وناس تغطي وناس تتلثم , تقول لخبطتونا.... انا قلت لها الحجاب واجب كل كل مرأة مسلمة والفكرة الاساسية فيه انه تغطيه الشعر والجسم من الرجال ما عدا المحارم وانه اختلف العلماء في امور تغطية الوجه وكل وحده تشوفي حجابها مختلف يكون تبعا لرأي العالم اللي اختارته فالاسلام يسر يحافظ على حرية المرأة من حجابها لانها بالحجاب ما رح تلفت الرجال اللي حواليها وبالتالي تكون مصونه من الاغتصابات والمضايقات.... قلت لها انه الاسلام طالب المرأة بالحجاب لانها كالجوهرة " قلت يعني لو انتي عندك قطعة الماس ثمينة راح تعلقيها على الباب والا تحطيها في علبه مقفولة عشان ما احد يسرقها" قالت لا اخبيها . قلت نفس الشئ احنا نتغطى من الرجال لنصون انفسنا لواحد رجل في حياتي " انا ما استحق اكون سلعة لكل واحد يشتهيني" وبعدين الاسلام حافظنا شوفي احنا ماكان عندنا الايدز والزهري واولاد بالحرام نتعذب معاهم..... الاوانه الاخيرة شوي ظهرت بسبب الناس اللي اللي اتخلوا عن مبادئ الاسلام وجريوا وراء شهواتهم. حسيت انها انبسطت شوي وبعدين سألت هل النساء لهم الحق في اختيار الزوج لاني سمعت من كثير انه لا الاهل هم اللي يحددوا, وكيف الرجال يزوج الحرمة تكون متغطية ما يعرف شكلها اصلا: قمت قلت لها طبعا الحرمة هي اللي توافق والاسلام شرط على الاباء باعطاء الحق لبناتهم الزوج اللي تبغاه , ومين قال انو الرجال ما يقدر يشوف قلت لها: الرجال اذا عزم يتزوج وحده يكون عن طريق سمعتها يقدر يجي ويشوفها ويتكلم معاها وبعدين هم الاثنين لهم القرار . " طبعا هي رفعت عيونها مو مصدقة" وشرحت لها كمان انو في السعودية في ناس يتحكموا في اختيار الزوج لبناتهم بس هذا عادات قبلية الاسلام نهى عنها بس بعض الناس تخلط بين الاسلام والعادات ولانهم خالفوا الاسلام سببوا لنفسهم وبناتهم مشاكل. بعد كذا هي قالت لي شرحك هذا وضح لي اشياء كثيييييرة لاني كنت فاهمة انو بعض العادات هي اصلا تعاليم الاسلام. بعدين قالت لي تعرفي انا دوبني اتعرفت على وحدة مسلمة بس ما تححجب برأيك انك احسن منها او هي ما تعتبر مسلمة ؟ قلت لها انا ما اقدر اقول من احسن من الثاني لان الله يحاسب الناس بقلوبهم وممكن هي سوت شئ احسن مني بس انا اشوف انو الحجاب جدا ضروري. وقلت المسلم او المسلمة شرط دخولهم الجنة نطق الشهادتين والقيام بالاركان الخمسة وشرحت لها. الخلاصة انها صارت دايما تشوفني وتسلم عليا وانا دوبني اشتريت كتاب بالانجليزي عن حجاب المرأة وحريتها في الاسلام بس قلت اقرأه كويس قبل ما اعطيها عشان اتأكد من المعلومات صحيحة والله يكتب اللي فيه الخير. لا ودحين هدا الاسبوع عزمتني مع مجموعة في الفصل في بار وتقول لي بليييز تعالي انا عارفة انك ما تشربي خمر وانا كمان ما اشرب لاني اؤمن انه ضار وراح نطلب انا وانتي كولا. قمت انا ضحكت وقلت على حسب الظروووف اشوف " بس طبعا ما رحت" واعتذرت لها. ما ادري ان شاء الله يكون موقفي افادك بس من جد الدراسة في الغربة معاناه الله يثبتك. وعلى سيرة انك تعزمي زميلاتك في البيت انصحك باللبس المحتشم وعدم المبالغة في التزين اولا: لانهم ما يسموا بالله وثانيا: راح يوصفوكي برا عند الرجال وهذا ما حصل لي لمن كنت ادرس لغة كانوا معايا كوريات راح يموتوا عشان يشوفوا شكلي قمت قلت لهم انا راح اعزمكم بس بشرط ما توصفوا شكلي قدام الرجال لانو ايش الفايدة من حجابي وقالوا ابشري. والحمد لله جوا وكنت لابسه طويل بس احسن شئ عندي وما ركه وزبطت شعري واتمكيجت وطبخت لهم عشاء ما يحلموا فيه .... ولمن جوا البيت بس فتحت الباب صاروا يزععععععقوا ويقولوا او ماي قاد ما هم مصدقين انو شكلي كذا وكانوا يعتذروا منى انو ملابسهم مو قد المقام واني احسن منهم " وطبعا ذكرتهم انه ما يطلعوا سيرتي عند احد" كوريين ماعليهم شرهه ........ ما سابوا احد في الفصل الا قالوا له كيف انا كنت حلوه وانهم مو مصدقين انه هادي اللي معانا شكلها كذا وحتى بعد كم شهر قابلني واحد مدرس في المعهد يقول لي اني فلانه قلت ايوه قال سمعت من زميلاتك انك جميلة وهو يضحك قلت له آسفة المفروض هما ما يقولوا وانت المفروض ما تقول لي كذا لاني انا اتغطى من الرجال ولا احب احد يوصفني " قام اعتذر" بس انا ندمت على العزومة هاديك والله يجازينا على قد النية وعلى سيرة المسلمات واختلافهم لوحده معاناه لو تشكي لي ابكي لك بس خليها على الله ان شاء الله في رد تاني اقول كيف شوهت وحده طالبه مسلمه صورتنا قدام الفصل بس الحمد لله على كل حال. الله يوفقك ويساعدك اختي

السلام عليكم ورحمه الله وبركاته اختى في الله الولد الغالي .... الله يعينك ويثبتك من جد هادي...