رحت ذاك اليوم دار الايتام واسلم على البنات ونجلس نسولف واخر وناسه
وفي نهايه الجلسه مرت علينا بنت ماشاء الله كبيره
الا اقولها مو انت فلانه قالت ايه
قلتلها ماشاء الله تغيرت
ضحكت وكأنها فهمت ما اقصد
ضحكت بخجل كبير
(البنت هذي ياخواتي شفتها يمكن قبل سنتين والله ياخواتي كأنها رئيسة عصابه .شعرها بوي منتش.عيونها طايره .صوتها خشن.اتذكر شفتها تتضارب مع البنات في الاسياب .يعني باين من شكلها ماحد قادر يسيطر عليها
في ذاك اليوم سألت البنات الحبيبات اللى دايم اجلس معهم من هذي وليش هي كذا
قالولي هذي مرام
بنت شرانيه ماحد يقدر عليها حتى الاخصائيات تصرخ عليهم
ولاتسمع كلام احد)
اليوم اشوف بنت تبارك الرحمن جسم انثى وقصة بنت وملامح رايقه وطريقة سلام غير غير غير
كل شي غير
وقمت اضحك وقول لها مرام شي اللى صاير
قامت تضحك بدلع
ماصار شي
المهم تركت البنات مع بنتي ورحت اتمشى انا وياها
وحكتلي كيف انها كانت قريبه من الضياع
وكيف ان احدى الاخصائيات احتضنتها (نفسياً ) وتقربت منها وضلت تنصحها الى ان بدل الله حالها
ولم تتركها حتى تأكدت من هدايتها وانها وضعت قدمها على الطريق الصحيح
البنت اليوم اخلاقها عاليه
تعاملها راقي ولا كانها هذيك البنت ولا حتى تقربلها
والله كل شي فيها تغير
والله يخيل لي ان ملامحها تغيرت
ببساطه اصبحت طيبه بعد ان كانت شريره
لا وابشركم اصبحت هي من يقدم الحفلات (المتحدث الرسمي )
وتقوم على تدريب البنات على الرقصات والعروض
والاداره مستفيدين منها كثير
كل هذا عرفته قبل كم شهر وما كتب لكم عنها شي
لكن اللى خلاني اكتب عنها الخبر الاخير اللى سمعته وشفته بعيوني عنها
سحر شاعره
نعم شاعره مبتدئه
لها محاولات شعريه واول قصيده كتبتها في الاخصائيه اماني اللى كانت سبب في دلالتها على الطريق الصحيح
بس الغريب ان مرام كتبت قصيده عن الام
المهم سمعت منها القصيده وهي تلقيها بصوت جهوري جداً
وبطريقه مؤثره كأي شاعر متمكن
طلبت منها القصيده وقلتلها عادي انشرها في النت
قالت اي عادي تفضلي
قلت لازم خواتي في المجلس العام يشوفون ايش كتبت مرام يمكن يحبون يقولولها شي
ويدعون لها
تقول
--------------------------------
امي
يايمه ياحضن ما أتوبن انا عنه
يايمه يا أكثر انسان أفرح بشمه
يامن تنسيني احزاني
لما أكون يمه
خديت منك الحنان والحب والهمه
بس كافي يايمه ارتاحي يمه
لك بداخلي قدر محدن يطوله
وحب وصى به الله ورسوله
ولك قدر يوسع الكون فصوله
انتي امي وما أبي غير الشجون
انت امي وأنا بغيرك من اكون
لو تطلبين مني العيون والله تهون
من اجل دفى حضنك ياحنون
واليوم أبي البشر يدرون
قومي يمه وارفعي راسك
قولي لاهلك وناسك
قولي ربيت وتعبت وشقيت
أنا منك ودمي هو دمك
واهني للي عنده بشر مثلك
جميلك لك برده
مع اني عجزت اعده
جعل يومي قبل يومك
جعل عيني ماتبكيك
والله لسعدك دوم
دامت الجنه تحت رجليك
--------------------------------------------------------مرام
ترددت كثيراً
اريد اسألها امك !!!!!!!
هل تقصدين امك التى انجبتك
ام التى ربتك
او اي ام في الدنيا
بس خفت يكون السؤال مو في مكانه او اجرحها من دون ان اقصد
اذا اي وحده عندها رساله او كلمه لمرام تكتبها في ردها
وانا راح اخليها تقراه
مع السلامه
بروره2 @brorh2
محررة فضية
يلزم عليك تسجيل الدخول أولًا لكتابة تعليق.
يافديتها والله حبيتها احب البنات اللي كذا اقصد كانوا على غلط ورجعوا لاني كنت كذا بالمدرسه كل يوم اداره واتصال بولي الامر بس سبحان الله تزوجت في الصيفيه ورجعت اكمل دراستي لكن بعقل اخر ........ سلميلي عليها وقولي لها الله اراد لها الخير وهي كم عمرها ؟ وش قصتها ليه في دار الايتام
الصفحة الأخيرة
ولاسلام من بعيد
اتحدى وحده قرتها ومالحنتها
هههههههههههههههههههه