حكي ..... من فوق الاساطيح...!

هذا الصباح رن جرس الباب في وقت أبكر من المعتاد ..
فتحت لأجد امرأة لا أعرفها ..
- صباح الخير
- صباح الخيرات .. تفضلي
- إن شاء الله عامر .. دخيل عينك ، بتعرفي وين بيت راتب شرباتي ؟
- شرباتي ؟ لا و الله ، وين دلوكي ؟
- قالوا لي بهالبناية ..
- و الله يا عيني صار لي عشر سنين بهالبناية ما سمعت عن بيت الشرباتي ..

خرجت جارتي الساكنة في البيت المواجه سمعت آخر كلماتي بينما كانت تقفل بالمفتاح باب بيتها فقالت :
- عن بيت الشرباتي عمتسأل الأخت و عمتقولي ما سمعتي ؟
- إي و الله يا خالة أم حسان .. بتعرفي وين ؟
زمت ابتسامة ساخرة لاحت على شفتيها و قالت :



- في الطابق الرابع .. فوقك تمام ..

شكرتنا المرأة و صعدت الدرج ..

- سألتني أم حسان :

- كيف ما بتعرفي بيت الشرباتي ؟! سامية .. ما عرفتيها ؟؟

- (بدهشة ) : سامية ؟؟!!.. آآآآه .. إي عرفتها ..

أليست هي العروس التي تعثرت بذيل الفستان و كسرت رجلها ليلة عرسها ؟

- أيييييوه .. هي بذاتها ..

- و العريس من بيت الشرباتي ؟

- ( متنهدة ) : إي لكن .. ( و استدركت باستنكار ) ما شفتي أوراق النعوة على كل حيطان البناية لما مات عمها أبو جوزها ؟

- هااااااااا .. إي و الله .. من عندهم كان صوت القرآن لكن ؟؟ قلت لحالي أكيد في عزاء بالبناية ..

- ( السخرية تطل من عينيها ) إي لكن .. معقول ما لك دريانة ؟

- و الله مالي خبر .. مسكينة يا نادية ..

- ساااااامية ســـــــــــــــــــــــــــــااامية ..

- إي إي ... مسكينة يا سامية .. عروس و رجلها مكسورة و فوقها مات عمها أبو زوجها .. قليل العزاء شو بده شغل و تعب ؟

- ( بدهشة ) : لك أي عروس و أي عريس و أي رجل مكسورة ؟؟ إي المخلوقة صار لها متجوزة سنة كاملة .. رجلها طابت .. و حبلت و جابت توم صبيان .. و جوزها مات أبوه من أربع شهور و حماتها رحتخلص العدة .. وأنت عمتقولي عروس ؟؟

- ( أسقط في يدي ، تلعثمت ) : شايفة شايفة ؟!!.. يا لطيف السنة كيف عمتمر بسرعة ، متل المنام ..و الله كأنه امبارح ..

- ( بلهجة غريبة ) خاطرك حبيبتي ..

- ( بحفاوة أغطي بها حرجي ) وين خالة ؟ خلينا نكسبك على فنجان قهوة .

- ( بامتعاض شديد لا يخفى على امرأة ) لا .. مرة ثانية .. ان شاء الله دايما عامر ..

أدركت أنني " عكيت " .. أمعنت النظر .. يا ساتر .. السيدة في مثل عمري تقريبا .. لكنها بحجابها و لباسها الغامق تعطي انطباعا بعمر أكبر .. أحببت أن أصلح الموقف ..

- أكيد هه .. شي يوم هاتي الصبايا و تعالوا لعندي .. الله يخليلك ياهم .. حبيباتي شو مذوقين و مربايين .. بشوفهم بالمصعد دائما .. كلهم أدب ..

وقفت المرأة للحظة و كأنها تفكر .. ثم رجعت إلي و وقفت في مواجهتي و قالت :

- عن أي صبايا عمتسألي يا عيووون خاااااالة أم حسان.. إي صار لك عشر سنين جارتنا .. ما حلك تعرفي أن اسمي هدى و أني بنت ماني متجوزة و ساكنة لوحدي بهالبيت من يوم ما أمي عطتك عمرها قبل خمس سنين ؟

- ( بذهول ) كمان أمك ماتت ؟؟!!



بعد الظهر .. حزمت أمري و ذهبت لزيارة عمتي أم نصوح في بيت جدي القديم في الميدان ..

حول البحرة و مع فنجان القهوة أحسست بالألم لحال سيدة مسنة تعيش وحدها في بيت كبير كهذا .. ابنها الوحيد هاجر إلى كندا . تزوج و استقر هناك وبقيت وحيدة في عمرها هذا ..

أحببت أن أسليها فحكيت لها ما جرى معي صباحا .. ضحكت بصوت مرتفع و هزت رأسها ..

قلت لها :

- عمة ؟.. ما بيضيق خلقك لحالك بهالبيت الطويل العريض ، و الله هي مو عيشة ؟؟

قالت مبتسمة :

- قومي الله يرضى عليكي .. هاتي صحن البذر من النملية و جيبي صحن للقشر .. و تعي نطلع أنا و إياكي على السطح ، هنيك الهويات ظراف كتير ..

أحضرت ما طلبت مني إحضاره من أشياء و أنا أفكر في هذا البيت الذي عشت فيه طفولتي حتى استقل أبي و أمي ببيت مع أولادهما .. بعدها انتهت طفولتي و وئدت في تلك الشقة السكنية المنعزلة عن العالم المحيط بها .

جلسنا على كرسيين منخفضين من قش و خشب .. و لا صوت سوى صوت طقطقة البذر بين أسناننا و هديل الحمام الذي يكشه ابن الجيران كعادته كل مساء ..

- إي عمة .. شو أخبار أهل الحارة ؟؟

- كلهم مناح وبيسلموا عليكي ، على طول بيسألوني عنك و عن أولادك ..

- مين عمتشوفي من هالجيران ؟؟

- عمشوفهم كلهم ، و اللي ما بشوفهم بتوصلني أخبارهم أول بأول ..الصبح بنشرب القهوة سوا... كل يوم ببيت .. و المساء .. حسب التساهيل ..لو اتأخرتي شوي كنت رايحة لعند خجو .. عمتعمل بسملة لأبنها مشان ينجح بالبكالوريا و بدنا نساعدها فيها .. و بكرة في مولد ببيت عمك أبو سعيد ...نذر عليه لما يجي الصبي لابنه سعيد ، بدنا نروح من الصبح نساعدهم بلف صرر الملبس ..

- (ضحكت من قلبي ضحكة بدت غريبة على أذني ) ..طيب ، هي فهمناها .. و اللي ما بتشوفيهم كيف بتوصلك أخبارهم ؟؟ شو ؟؟ بتقريها بالفنجان ؟؟؟

- ( بضحكة ماكرة ) : لا .. الستيتية بتحكي لي .. ثم .. أشارت بعينيها إلى أسطحة الجيران و قالت :

- شوفي عمة .. شايفة هالأساطيح كلها على مد عينك و النظر ؟؟ هي كلها حكايات منشورة على حبال الغسيل ..

ضحكت ثانية حين رأت الدهشة تطل من عيني .. - شوفي يا ستي .. السطح اللي معرشة عليه دالية العنب هذا هو أسطوح خالتك أم بكري ، بتتذكريها ؟؟ شوفي الغسيل على الحبال بتعرفي أنه كنتها ولدت و جابت صبي ، الحبال مليانة بقطع صغيرة و كلها لونها يا أبيض يا سماوي ..

- ( بدهشة ) إي ؟؟!

- و السطح اللي بعده لحليمة زوجة الحلاق .. باينتها لسه زعلانة ببيت أهلها ..الغسيل اللي على الحبل كله رجالي و نشره مبهدل و ملعوص ، هالنشر نشر رجال مو نشر ست بيت بنوب .

- !!!!.........

و السطح يللي عليه الغسيل المأمأم المجأجأ ، هذا سطح بيت الحجي أبو عمر .. و هذا نشر كنته .. شوفي أديشها شرنة و شرمة ، بدها تكسير إيدين على هالغسيل و هالنشر .. و فوق كل هذا ، شوفي .. لسه ما خبت شي !! سلفتها اللي تجوزت بعدها بست شهور رحتسبقها ..

- !!...........

شايفة هديك الصبية يللي عمتحرك مربى المشمش بالصواني ؟؟ هي بنت ابنها للخياطة باهية .. شايفة شو كبرانة و حليانة ، تتذكريها شو كانت مدهرنة هالفصعونة ؟ بس طلعت رشقة و فالحة لأمها .. عليها نشر غسيل بيمزع العقل .. و الظاهر و الله أعلم أن جابر ابن أبو عبده الوسطاني حاطط عينه عليها ، كل يوم بلاقيه بالليل عميطلع عالأسطوح و يسهر لوش الصبح ، و عند على بكرة بلاقي ملاقط غسيل شي فيها وردة شي فيها أسوارة ياسمين واقعة بالغلط على مشرقتي ..

- !!..............................

- بقى عرفتي الستيتية اللي بتجيب لي كل الأخبار ؟؟

عدت إلى بيتي مساء .. و أنا أفكر في ما جرى معي من أحداث في يومي هذا ..

قررت أن أفعل شيئا مختلفا من الغد ..

أن أتعرف على جاراتي أكثر ، أن أقيم معهن علاقات تشبه علاقة عمتي مع جيرانها ..

علاقات فيها الكثير من الحميمية و من الإنسانية علاقات دافئة تختلف عن تلك التي نقيمها مع الأغراب و زملاء العمل..

أن أجعلهم جزءا من حياتي و أصبح جزءا من حياتهم ..

و سأبدأ أولا بخالة أم حسان ....

لا لا لا لا لا .. شو خالة و شو أم حسان .. !!!

لكن ...... شو كان اسمها ؟؟!!



تحياتي:
:o:o