حلـــول لزوجـــي المدخّــــن..

السلام عليكم
يسعد مساكم..
واضح من العنوان زوجي مدخن بشكل ادمان..
له 17 سنه تقريبا وهو يستخدمه..
الشي الوحيد اللي قدرت عليه ومستمر الى الان هو انه مايدخن في الشقه نهائي..
متى ماجاء في باله يطلع برا..منها أن فيني ربو ماأقدر ريحته..
ومن ناحيه ثانيه ودي أعجزه ويتعب لكن طلع ماعنده مشكله أهم شي يدخن..
الحقيقه ماأحب أكرر عليه عشان مايحصل خلاف بيننا..
خاصه أني عصبيه وهو من النوع الساكت واللي يطنش..
قلت له عن قصه الأخت اللي أستخدمت مع زوجها طريقه بحيث كل ماأشترى بكت يحط نفس المبلغ عندها وبعد ماجمعت مبلغ محترم قامت وأحرقته قدامه قام يهاوش ليه سويتي كذا..قالت أنت تحرق فلوسك بالدخان..
المهم في رمضان ومن شعار أترك له بصمه بترك التدخين قلت له وتقبل..
أشترى أقراص من الصيدليه تساعد على ترك الدخان بحيث لاتجعل للتدخين طعم..
يآخذها بعد الفطور مباشره وقبل السحور..
يوم حس أن الدخان ماله طعم قام يتحايل يدخن بعدين يآخذ الحبه..
الزبده أنتهى رمضان من غير مايتركه..
واللي يقهر أنه حريص على صحته,,مايصبحه صداع ولا زكمه بسيطه أو حرقان ألا طار على الصيدليه عشان يآخذ علاج ماني فاهمه كيف يستخدمه وهو مكتوب عليه تحذير انه سبب رئيسي في الاصابه بالسرطان..
في ليله أقلقت منامه قلت تخيل لو جاء المرض بعيد الشر والله أن تندم..فالافضل تركه قبل مايفوت الفوت...
رغم اني أقول بين فتره واخرى وأذكر بآيات وأحاديث وأنبهه لصحته..ومافيه نتيجه..
تكفون اذا عندكم حلول ممكن تساعدني عشان نتخلص من هذا الوباء..