حلمي سبق كلامه!

السلام عليكم كيفكم ياحوائيات اعذروني ما أجي الا بشكاوي واستفسارات وهموم..لكن حصل شي ماكنت متوقعته يابنات تعرفون من مواضيعي الي سبق وقلتها ان ماعندي اخوات كبار الا من ابوي وما بيننا ميانه ولا أقدر اسألهم او اي شي وانا احتاج احد يرشدني يفهمني شعوري وليش احس كذا ما ابي أطول عليكم بدخل بالموضوع مباشره حياتي ما كانت ب ذاك الجمال بس مع ذلك كنت احلم دايم وعندي اماني بالرغم من سوء الظروف وابسط الأشياء اهلي حرموني منها ومنعوها عني بالرغم من انهم يقدروا عليها عالعموم قلت هذا الكلام عشان توضح لكم الصوره كامله..
خواتي من ابوي لمن تزوجوا ماشاءالله دايم نسمع ان أزواجهم مدلعينهم يعلم الله ما غرت ولا حسدتهم واعرف ان الي نشوفه محدود وفيه أشياء مانعرفها تصير ولا راح احكم من الظاهر فقط وبالعكس والله اني اقول رزق والله يبارك لهم ويرزقني ويرضيني بالرغم من انهم ضروا امي وضرونا يعلم الله لكن من بعد اخر مشكله حصلت معنا حسيت ماعاد لي حيله لجأت لربي وصرت ادعي تحديداً بهذه الدعوه( ربي ارزقني الزوج الصالح الي يحبني ويصب علي الحب صباً صباً ويكون عابد لك) يعلم الله انها دعوتي ف كل رمضان ،عيد، عرفه حتى إذا صحيت من نومي فجأه قلتها لان تعبت مرره من اهلي بس حصل شي ماتوقعته دعيت هذه الدعوه بعرفه والحقتها ب (عاجلاً غير آجل) كنت تتتتعبانه ومكسووره من ابوي مره
فجأه معلمه سبق وقد درستني ايام المدرسه زمان تتصل ع امي وتقول نبي بنتك لولدي.. ردت امي بنتي حالياً تدرس ولا هي موافقه للأمانه قالت امه عادي يعقدون وتدرس وكل شي بعدين الملكه والزواج الخ بس امي قالت ما راح توافق وهي تدرس و لكن ما اعرف اذا بينتظر لين تخلص قالت امه والله مدري اذا بينتظر بسأله وارد منك ان شاءالله،، أنا أول ما دريت قلت فوراً لا لا وانفعلت ما اعرف ليش وخفت وزعلت ع امي وقلت ليش تقولين اذا ينتظرها انا ما ابي لا الان ولا بعدين ما ابيها ولا ابي ولدها!!! ما كأني كنت ادعي ربي بس للآن ما تذكرت دعوتي ولا جت ببالي وامي قالت لي فكري لاتردين بسرعه ولا تحكمين من خلال علاقتي انا وابوك لاتقطعين نصيبك فكري وعادي إذا ماتبين بقولها لا ..انا زعلت مره من امي لانها فتحت باب الانتظار، عشان تفهمون وجهة نظري المهم حلمت حلم غريب مع اني ماكنت افكر بالموضوع وخلاص رافضه بقناعه تامه ولا حتى استخرت ولا فكرت اصلاً ولا شي لاني رافضه ١٠٠% وقفلت ع الموضوع بالنسبه لي فجأه شفت حلم بس ماراح اذكره لكن الخلاصه اني اصحى وتفكيري متغير ١٨٠ درجه! قلت بنفسي لا تحكمين من حلم يمكن من الشيطان وو الخ
هي جلست تقريباً اسبوعين لدرجه قلت شكلها كلمت ولدها ورفض واستحت تتصل وتردنا ف شكلها بتنسحب فجأه ببدايه الاسبوع الثالث اتصلت مره ثانيه وقالت كلمت ولدي وقال موافق ينتظرها.. وقالت انه قال حتى لو تحتاج وقت زياده ماعندي مشكله تاخذ راحتها بنتظرها!!مع اني قلت لامي تقول لامه ترا الانتظار مايعني الموافقه مع ذلك قال بنتظر ..انا يوم سمعت امه قالت كذا خطرت ببالي دعوتي قلت بيني وبين نفسي طيب لو ربي استجاب دعوتي عشان كذا 
وجلست الكوره ف ملعبي وانا افكر طول الوقت وبالي مشغول ولو ماكان هو الشخص المناسب؟ يابنات يمكن تقولون باقي معك وقت فكري استخيري واستشيري او حتى ارفضي اذا متردده ليش من الحين تفكرين بس والله خايفه لان اعرف السنين بتمر بسرعه وبنحط تحت الأمر الواقع ولازم اقرر واقول كلمه مع اني كنت رااااافضه بس مدري وش غيرني بيوم وليله وصرت محتاره بين نعم ولا واحس وكأن قلبي بدأ يميل ويوافق بس والله متردده كثيير اتخذ قرار معين
وقلت بنفسي هو ماراح ينتظرني حباً فيني هو لان خلص دورته وبعدها تجي الوظيفه غالباً مباشره يعني بإذن من الله ف قلت يمكن انه ضرب عصفورين بحجر
قولوا لي انصحوني او حتى ادعوا لي اكيد كلكم مريتوا بنفس الشي ف يوم لاتبخلوا علي الله يفرج همومكم انتوا افضل ناس اقدر اقولهم لا صحبات ولا أهل انتوا ما اعرفكم بس الي اعرفه انكم بتنصحوني من قلبكم بدون حقد او حسد🥺
انا متنرفزه لأنها جايه تخطب وتعرف لسى ما خلصت وكمان ولدها لسى ماجاه قرار التعيين بمنطقه معينه
ابي نصايحكم وراضيه ب اختيارات ربي بس خايفه يكون نفس ابوي والله مرعوبه لو قلت موافقه مابعدها رجعه قلبي مايتحمل صدمه غير ابوي والله.