حلولنا للخيانة " مرجع ".

السلام عليكم ورحمة الله وبركاته


كيفكم بنات 

إن شاء الله بخير

بصراحة كل مادخلت هالقسم إلا ألاقي مشكلة

زوجي يناظر مقاطع رقص
زوجي يناظر أفلام إباحية
زوجي يكلم بنات
زوجي 24 ع البلاك والواتز أب مع بنات
زوجي كله ع الفيس ..

بصراحة يعني أحسها مشاكل دايم تتكرر وكل وحدة تجي وتفتح لها موضوع خاص وتحط فيه مشكلتها وصار هالقسم كل كئيييييب من هالسوالف
عشان كذا قلت أحط هالموضوع وكل وحدة تجي تحط حلول للمشاكل الي صارت وتصير فوق ويصير مرجع لكل وحدة مرت بهالمشكلة
بلاش تفتح موضوع وتقص حياتها وتطلع أسرارها تجي هنا وتشوف الحلول وتستفيد منها.

وش رأيكم ؟؟؟؟؟؟؟؟؟؟


طبعاً بما إني صاحبة الموضوع أبحط لكم بعض الحلول إن شاء الله تساعدكم وتريحكم ..

قبل أي شيء لازم يكون غضبك لله يعني أستغرب وشلون وحدة تجي مهمومة وكئيبة زوجي يكلم بنات ومع سياق المشكلة تقول هو أصلا ما يصلي !!!!!!!!!!!!!!!!
يعني بالله عليك مايصلي وش ترجين منه كان الأولى جيتي طايررررة بنات زوجي مايصلي يعني المغازل عندك أشد من ترك الصلاة ؟؟؟
وهي الي بعض العلماء يحرم بقاء المرأة مع زوجها وهو مايصلي وبعضهم يقول يستتاب وإن ما صلى يقام عليه الحد ..
يعني هنا أنتي زعلتي لنفسك ليه يخوني وصدقيني في هالحالة لو تجربين كل الحلول ماراح تنجحين لأنك همك نفسك بس ماهمك الحلال والحرام.

الي زوجها مايصلي تحل هالمشكلة قبل أي شيء ثاني.


بالنسبة للي تشتكي من المقاطع والأفلام والرقص وكذا
ترى حل هالموضوع مايجي بالعناد والهواش لأنه بقناعته هذا شيء بينه وبين ربه ماضرك فيه ولا خانك
وإذا جيتيه بالعناد بيحسه تحدي وتدخل بشيء مايخصك أصلا
أنتي بالحالة ذكريه بالله وحاولي تربطينه وتقوين علاقته مع ربه وتنصحينه
بيني له إنها بتوديه لشيء أكبر من كذا بتفقده طعم الحلال وبتخليه يستسيغ الحرام.

وإذا كان الموضوع أكبر من كذا يعني متطور شوي علاقات ومكالمات وكذا مع إني بقناعتي إن أكثر شيء يخلي الشباب يقيم علاقات محرمة بسبب هالأفلام والمقاطع الي خربطت الشباب وفسدتهم وهي الطريق لكل شر.

في حال تأكدتي من إنه يكلم صارحيه وقوليه يرضيك هالشيء ولا لا وقولي له ترى أي شيء بتسويه مع بنات الناس يبي يصير لك بكرى بتشوفه في بناتك ولا خواتك أنت تعديت على محارم الناس بيجيك من يتعدى على محارمك حتى لو كانت هي الي متبليته بكرى بيجي من يتبلى بناتك

إن ترك هالشيء الحمدلله وإذا مازال مصر كوني حذرة منه جدا بس لاتتجسسسن عليه أبدااااا التجسس أكبر غلط خليه إن شفتي شيء قدامك ولا الي ماتدرين عنه لا تدورين عليه والله بتتعبين وبيجيك هم وضيق وكآبة وماراح تستفيدين شي

أهم حاجة لا تذكرينه بخيانته إذا تركها لا تذلينه وتخلينه يرجع لحركاته بسبتك.

نجي للمهم والي هي زوجها يزني والعياذ بالله
الصراحة هذي
لازم يتدخل فيها شخص مختص وخصوصا الي مصر على هالمعصية ولا إذا بتسكت لاتجي بكرى تقول فيني إيدز ولا إلتهاب ومدري وشو
لا تسكت أبدا موضوع ماينسكت عليه أبدااااااااااااااااااا
حتى لو توصلت للطلاق

لا تجي وحدة تقول مملكتك لا تتركينها بالله عليكم أي مملكة هذي الي تهدر فيها كرامتك وتنذلين فيها
ولا تجي وحدة بعد تقول زوجك لا تتركينه لهم أنتي أولى فيه أي ما أتركه إلا أتركه وأترك الي جابه تعرفووون وش معنى خاين زاني كيف تتمسكين فيه
إتركيه وربي يعوضك
والله ما خلا الرجال يتمادون ألا خنوع الحريم الي الوحدة تلزق بزوجها لو يخليها وشو مافيه أمل تتركه مستعدة تضحي بحياتها وكرامتها وصحتها عشانه
وحتى لو عندك أبناء أكون مطلقة أربي عيالي لحالي أحسن من يتربون تحت زاني بالله عليك وش تبين عيالك يصيرون وهذا أبوهم

ولاتجي الوحدة وهاتك من هالدعاوي على هالبنت الي يكلمها زوجها وفيها ومافيها
والله البلاء كله بزوجك ولا لو فيه خير ما عطاها فرصة هن صح حقيررات وخراب بيوت بس حتى زوجك مثلها وأشد إذا بتدعين إدعي على زوجك قبل
ونصهم أصلا مايعلمها أنه متزوج.

آخر شيء لا تنسوون الدعاء والإستغفار
وخلو عنكم التجسس
وخلي بيتك عامر بالدين والخير حاولي قد ما تقدرين طلعي القنوات الفاسدة من بيتك وشغلي قرآن.

وتحياتي ودعواتي لكم من كل قلبي بالسعادة والتوفيق بالدنيا والآخرة
والي عندها حلول تنورنا وتحتسب ممكن تكون سبب براحة أخت مسلمة لها

وأحب أقولهم الموضوع مجهود شخصي مني أنا
ي رب يعجبكم
أتقبل آرائكم بصدر رجب
حبي العميق لكم.
أختكم أسماء.