كل عام وانتم بخير
والله يعيد علينا رمضان أعوام عديده وأزمنة مديده
موضوعي جا متأخر شوي ،،بس ان شالله اني اللحق على اللي بقى من رمضان
وتستفيدون منها لبعد رمضان ان شالله
طبعا كلنا نفرزن قبل رمضان ،،وثلاجاتنا ماشالله مزحومه
وانا صورت لكم كم طريقه استخدمها في المطبخ سهلت علي عملية الطبخ كثييييير واختصرت وقت كبير كبيررررررر وجهد اكبر
نبدأ بالعجينه وهي اكثر شي يتعبني لاني اعجن كثير
جمعت جميع المقادير الجافه وحطيتها مع الدقيق في أكياس وصنفت العجائن
خلطة معجنات وخلطة لقيمات ،، احطهم بالثلاجه او بالدرج وماعلي الا اني اكب الخلطه بالقدر واضيف الزيت وافركه لين يتجانس مع بقية المقادير وبعدين اضيف الماء واعجن وبسسسسسسسسس
نفس الشي سويته مع الكاسترد ( التطلي ) كيسته في اكياس صغيره ،،وطريقتي فيه افتح الكيس في الخلاط واصب عليه كاس ماء حار واخلطه بالخلاط لين تذوب المقادير بعدين احطه عالنار واضيف بقية اكواب الماء وشوي روح الموز واول مايغلي ارفعه واوزعه في الصحون ،، والكيس تكفي 15 صحن.
واختصرت ثلاثة ارباع الوقت والجهد ،، لاني يوميا اسويه
نفس الشي سويته لحشوة البيتزا ،، الزيتون والفطر
ولعجينة الكبه وحشوتها
للفلافل
حشوات السمبوسه والفطاير
كشنه
الشغاله يوميا تحط الاشياء اللي مفرزنينها ومكيسينها عالطاوله واول مادخل المطبخ الظهر كل شي قدامي
والماء مغي وجاهز ،، وصحون الكاسترد مصفوفه جنب بعض
والحمدلله ارتحت كثير
وهذي الصور توضح
طبعا صورت من كل كيس حبه ،، والا بالاساس مفرزنه ومكيسه كميات كبيره
هذي كيس دجاج مفروم مكشن وجاهز للحشو ،،وحشوة لحم + الكيس الثالث كشنه جاهزه بدون ملح
زيتون وفطر للبيتزا ،، كل يوم ناخذ كيس
وهذا الكاسترد
وهنا عجينة الكبه مع حشوتها
وهنا صوره جماعيه للاشياء اللي استخدمها بشكل يومي
عباره عن كيس سمبوسه +كيس لحم للشوربه +كيستين عجينة معجنات +كيس عجينة لقيمات +كيس خلطة الكاسترد
وهذي صينية المنتو ،، نلفها من الليل ونحطها في صينية وبالفريزر وفي اليوم الثاني نطلعها تذوب ونسوي لها خلطة الوجه ،، القشطه والجبنه والمايونيز
خلطة المعمول بأكياس ،، كل مايخطر في بالي اسويه ،، اضيف للكيس زبده وشوي ماء واعجن وتطلع جنان
يوميا نسوي تانج عالفطور ،، عشان كذا عرفت المقدار الصحيح لكل جيك وكيلته وكيسته في اكياس صغير
عبارده عن مسحوق بودره من التانج + سكر
فقط افك المحتوى في الجيك واضيف ماء بارد وعالثلاجه
جميع خلطات الاعشاب اللي نشربها خلطت مقاديرها في اكياس صغيره وكل يوم احط في الترمس او الزمزميه ،، محتوى الكيس واضيف الماء المغلي
خلطة السينبون
قرفه ناعمه مره + سكر محطون ناااااعم + شوكلاته بودره او نسكويك
مخلوطين مع بعض في علبه كبيره وكل ماسوي سينبون اطلعها
أممممممممممم خلوني اتذكر ،،، ههههههههههههههههه تصدقون اني فرزنت اكياس ماء وهاوشوني خواتي يقولون مليتي الفريزر بالماء ،، لان قوالب الثلج صغيره ،، وثلجت ماء في اكياس اللحم الصغيره رقم 6 او 4 واحطها في الجيكات قبل الاذان وتجلس بارده وقت طويييييييل
سلقت عدس وخلطه بالخلاط وكيسته عشان شوربة العدس
سويت خلطة الثوم والكزبره والشبت وفرمتهم مع بعض بالفرامه وعبيتهم في علب وكل فتره نطلع علبه عشان نستخدمها مع الحشوات
اشياء كثيره نكيسها ونفرزنها بس عشان مانضيع وقتنا في رمضان بالمطبخ
اتمنى تكون افكاري فعلا عمليه وسهله وتستفيدون منها
ودعواتكم لي