حلوى فرنسيه لمحبي القهوه والنسكافيه والكاكاو

اخواتي العزيزات
هذا صنف حلو جربته عند واحده من صديقاتي وعجبني جدا واول شي لفت نظري فيه اسمه
(التراماسو)
منغير ما اطول هذي هي المقادير والطريقه:
المقادير:بسكويت طويل اسمه _اسبونج فينجرز_يعني الاصابع الاسفنجيه تلاقيه
بركن البسكويتات في اي سوبر ماركت كبير تحتاجي منه علبه واحده كبيره
يعني على الاقل يكون فيها20 اصبع
2/جبنه باسكاربوني ولو ما لقيتيها استخدمي اي نوع جبنه عندك بس ما تكون مالحه يعني جبنه ماليها طعم قوي وتكون طريه
3/علبة قشطه من اي نوع
4/علبة كاستر جاهز او انتي سوي مقدار 250 جرام كاسترد لو انتي تحبي تجهزيه بنفسك
5/شوكلاه مبشوره من اي نوع
6/معلقتين قهوه أو كاكاو أو نسكافيه زي ما تفضلي

الطريقه:
1/اولا تجيبي كوب حليب كبير وتذوبي فيه القهوه او النسكافيه او الكاكاو ومعاه3 معالق سكر كبار
يعني لازم يكون محلى
2/في صينية بايركس او الصينيه اللي حتقدمي فيها تبتدي تغمسي البسكويت في محلول القهوه اللي سويتيه
بس للحظه ما تغمسيه مره علشان هوا مره هش وترصي الدور الاول من البسكويت
3/تخلطي الجبنه والقشطه والكاستر مع بعض وتحطيهم طبقه تانيه فوق البسكويت الطري
4/ترشي الشوكلاته المبشوره وبمصفاة الشاي ترشي قليل من الكاكاو على الشوكلاته
5/تكرري طبقة بسكويت مغموس في القهوه وكذلك تكرري ال3 طبقات
يعني اخر طبقه تصير الشوكلاته المبشوره والكاكاو المرشوش
وحطيها في الثلاجه مو اقل من4 ساعات
وبالف هنا وعافيه
واللي تجربها يا بنات تقولي ايش رايها وانا مستعده لاي استفسار
انا منتظره ردكم علشان احظ اطباق اخرى