دا حلى البروفت روول روووعه ولو عندك عزيمه
الكل هينهبل عليه خصوصا لو اتقدم بطريقه شيك
انا كنت دايما اعمله وكل ما حماتي تيجلي اقدمه لها
وطبعا تكوني حطاه في كاسه فخمه يطلع روعه بس دا ايام لما كنت في مصر والبال رايق
يارب ارجعلها النهارده قبل بكره........ الظاهر جايه اشكيلكم حالي
خلاص هقولكم الطريقه بدل ما تسيبوا الموضوع وتهربوا هي الطريقه سهله بس طويله شويه
فركزوا يا حلوين بس عايزه ردود في الاخر ودوه حلوه بالذريه الصالحه السليمه من كل شر لاني تعبت في الموضوع وانتوا تستاهلوا كل خير
اول حاجه هنجهز حشوة البروفت روول عشان نسيبهاعلى جنب
المقادير:
لبن
3 م ك سكر
بيضه
1ونص م ك دقيق
قليل من الفانيليا
الطريقه:
اغلى 2 كوب لبن على النار لحد ما يغلي
ويضاف عليهم 3 معالق سكر ونقلب
وبعدين نجيب كوب فارغ ونحط فيه معلقة دقيق وبيضه كبيره وشوية فانيليا
وبعدين نكمل باقي الكوب لبن لحد ال 3/4 ونضرب الخليط بالشوكه
ونضيف الخليط للبن على النار
ونضرب بمضرب سلك الى ان يغلظ ونرفعه من على النار
وخلاص نخليه على الجنب
تاني حاجه عجينة الشو واللي هي عجينة البروفت روول
المقادير:
2 م ك زبده في حجم البيضه
1 كوب ماء
1 كوب دقيق
ذرة ملح
4 بيض كبير احمر او 5 صغير
قليل من الفانيليا
الطريقه:
تسيح الزبده على النار الهادئه
ثما يضاف لها الماء والملح وبعدين نعلي النار عليه لحد ما يغلي
بعدين نرفعه بعيد عن النار ونضيف الدقيق بس يكون منخول يعني نضيفه عن طريق المصفاه
يتـــــبع
بعدين نضيف العجيبنه تاني على النار مع التقليب المستمر لحد ما العجينه تكون ناعمه
ويرفع من على النار ويترك الى ان يبرد قليلا
وبعدين نضيف البيض المخفوق وكل بيضه نضيفها مخفوقه لواحدها عدا اخر بيضه نضيفها مخفوقه بعد اضافة الفانيليا عليها
ونقلب جيدا
نحضر الصينيه وتدهن سمن خفيف وبعدين نحضر معلقه صغيره وناخد من العجينه مقدار المعلقه الصغيره ونضيفه للصينيه
ونخلي كل معلقه بعيده عن التانيه بمسافه بسيطه الى ان تنتهي العجينه انا خدت مني 3 صواني
بس انتوا حاولوا تخلوا شكل العجينه ملمومه شويه عشان يطلعلكوا شكل كوره لان عجينتي طلعت مفروده شويه
ونكون مسخنين الفرن من قبل ونحط الصينيه ونسيبها في الفرن من 20 الى 25 دقيقه على درجة 180واوعوا تفتحوا الفرن قبل 20 دقيقه ودي بعد ما خرجت من الفرن
بعد ما نطلع الصينيه هتحسوا العجينه اتشكلت على شكل كور وناشفه من القاع نشيل كل واحده ونفتحها بالسكينه من تحت قبل القاع بشويه زي جيب
ونحشيها بكريمة الحشوه اللي كنا مجهزنها يعني برضه بمعلقه صغيره ناخد من الحشوه ونحط في الكوره لحد ما ننتهي من كل الكور
بعد ما نخلص ممكن تحطيها في كاسه كبيره كل كم حبه مع بعض او ترصي كل الكور مع بعض في طبق
التقديم على شكل هرم كل واحده وطريقتها
يتبـــــــع