و الصلاة و السلام على أشرف الأنبياء و المرسلين
هذا الله يسلمكم القصه و ما فيها إني أدرس بمعهد حاسب :27:و كل يوم قهاوي و فطور و شغل عدل مدل بس كله جاهز من برى أو من ايدين الشغالات الله يسلمهن بس احيانا تخم بعض البنات و يحبن يتميلحن عشان نمدحهن يقومن يسوون شغلهن باعمارهن (يقهرون يفتحون لنا باب حنى في غنى عنه )يخلوني اطنقر ودي اسطرهن :06:
عاد الله يسلمكم انا من ضد هالفئه جاء يوم و استفزوني يقولون اني موب حرمه و ما اعرف اطبخ ( هنا خلاص ترى ممكن ياصل الدم للركب ) قلت اوريكم و اصلح لهم ذاك الحلى اللي لاراح و لا جاء:mad:
و وديته لهم :cook:سطلوا يوم شافوة و قامن يتأسفن كل وحده تبي تخطبني لأخواها عاد انا قلت بالطابور وحده وحده الزحمة ممنوعه و بصمتهم كلهم على ورق انهم ماعاد يتحرشون فيني و اني حرمه عن عشر حريم و استسلموا :39:للامر الواقع
عاد قلت لازم اوريكم الحلى ذا
كل وحده تتولم يالله بأمليكم
المقادير >>>>
2 علبة بسكويت اوريو مطحون( يوضع بصحن )
علبه بسكويت شاي اولكر علبه صغيرة مطحون( يوضع بصحن )
علبة بسكويت جوزاء مطحون( يوضع بصحن )
3 حبات جالكسي أبوريالين و نص هذا اللي ساده ( موب فاضيه اروح اقرأ اسمه )
1 قشطه التاج
3 علبة بسكويت جوزاء غير مطحون
علبة حليب سائل الصافي
( ترى اي وحده ما تجيب نفس المقادير ابدن ماراح يزبط معها الحلى و قد اعذر من انذر )
الطريقه >>>>
كل بسكويت مطحون يوضع بصحن لوحده و يؤخذ ربع بسكويت الاوريو و ربع بسكويت الشاي و تخلط في صحن لوحدها
(يعني صار عندنا اربع بساكيت مطحنه كل واحد لون ) بعديننجيب بسكويت الجوزاء الغير مطحن و نغمسه في الحليب و نصفه في صحن 4 بساكيت عرض و 6 طول و يوم نخلص الطبقه الاولى نكون مسيحين الجالكسي بحمام مائي و خالطين معه القشطه ( نصب نصف الخلطه هذي فوق البسكويت ) و بعدين نسوي طبقه ثانيه بسكويت و نصب باقي كمية الشوكلاته عليها
اللحين يجي دور الوجه و تزيينه نقوم ناخذ كل بسكويت مطحون لوحده و نسوي خطوط مستقيمه او مائله او دائريه كل وحده و موهبتها ( انا كنت عجله سويتها مايله ) لون ورى لون لا تحطون لونين زي بعض جنب بعض
اتمنى فهمتوني و هذي هي صورته عشان تفهمون اكثر
وهذي صورة بسكويت الجوزاء للي ما تعرفو
و اي استفسار انا بالخدمه مصدقه عمري
والسلام مسك الختام