هاذي اول مشاركه لي (من صنع ايدي ) حلى الكيك الجاهز الكل حيسألك عنه لأن
شكله يفتح النفس
سريع التحضير
بسيط التكلفه بالنسبه لأنواع الحلى الاخرى
والاهم طعمه جناااااااااااااااااااااان
نبدأ
المقادير
كيك جاهزشكولاته بالحليب
ظرف دريم ويب
علبة قشطه
ثلاث ارباع كأس سكر
الطريقه
نقوم بعمل الكيك حسب تعليمات التحضير وتصبيه في الصينيه وتدخليه الفرن وبعد ما يستوي بس يبرد تقلبيه في صحن واسع
(ملاحظه)
زي ماانتي عارفه الكيك الجاهز بينفش مره وهذا الحلى المطلوب فيه انه تكون طبقة الكيك نحيفه شوي علشان كذا اعمليه في صينيه كبيره أو اذا كانت الصينيه صغيره بعد ما يستوي وتقلبيه اقسميه طبقتين بواسطة سكين او خيط
وهنا بعد قلبه في الصحن
بعد كذا تحضري الدريم ويب
طبعا طريقته نفرغ ظرف الدريم ويب ونصب عليه فنجان ماء بااااااااااااااارد جدا ونخفق سريع الين يثقل
ونقوم بفرد طبقه خفيفه على الكيك وندخله الثلاجه وقت تحضير التوفي
االآن نحضر التوفي
نحط السكر في قدر ونسيحه على النار بس الين يذوب يصير لونه عسلي فاتح مو ينحرق لانه حيسبب مرار في التوفي
بعد ما يسيح السكر تجي اهم خطوه في عمل التوفي وهي وضع القشطه على السكرلازم تكوني راجه القشطه تمام او تفرغيها في زبديه وتخفقيها المهم ما تكون ثقيله (تجهيز القشطه تعمليه قبل ما تسيحي السكر )
وهنا لازم احد يساعدك اول ما يسيح السكر ترفعيه عن النار وفورا تخلي احد يصب القشطه وانتي تخفقي بسرعه بالخفاق السلك اليدوي ....في البدايه توضع القشطه ملعقه ملعقه ورا بعض مع الاستمرار في الخفق واستمري حتى تنتهي القشطه
(تنبيه)
اثناء عمل التوفي لازم تكوني ماسكه خفاق طويل يعني ما تكون ايدك قريبه من القدر لان اول ما توضع القشطه يطلع بخار حار بس ضروري ما توقفي الخفق حتى ما يتكلكع معاك التوفي
عموما اذا كان لك طريقه معينه في عمل التوفي مافي مانع من استخدامها المهم توفي انا هاذي طريقتي ويطلع معاي ممتاز
بعد الانتهاء من عمل التوفي تستمري في تقليبه الين يبرد شوي بعدين تشكليه على شكل خطوط فوق طبقة الدريم ويب
تقطعيه وتقدميه مع القهوه وهذي الصوره عند التقديم
وبالهناء والعافيه واتمنى يعجبكم
:26::27:
شكله مرتب ويفتح النفس