حل مشاكل الشعر عن تجربه ....

الحمدلله انا عندي شعر الكل حاسدني عليه
وخاصه اني متزوجه

وانتم تدرون المتزوجه .. لما تروح لبيت الزوجيه حتى شعرها يودعها مع امها وابوها وخواتها

مالكم بالطويله يحبي للهذره



اولا :

اللي تعاني من الشعر الدهني وانه مايمدي يومين الا يدهن :
الحل : الحنــــاء
بتقول وع حنا ما حنا ... بس فعلا الحناء هي اللي تحل الافرازات الدهنيه من الشعر
ولا تنسون الحنا كانت علاج في الماضي ..
وكذلك حل للقشره




ثانيا :

اللي تعاني من تساقط الشعر ...
الشعر ما يتساقط كذا من الباب للطاقه ..
اكبر سبب للتساقط هو القشــــــره
قبل ماتدورين علاج للتساقط .. دوري علاج للقشره
وبالفعل راح تشوفين شعرك وقف عن التساقط
اما سالفه خلطات تكثير وما تكثير .... هذي يبيلك سنه لين تبين نتيجتها
يعني الحين حافظي على القله القليله من شعيراتك
وبعدين دوري على حاجه تكثر الشعر

ونقطه مهمه لتساقط الشعر ... هو اكل البروتينات بكثره او التركيز عليها
والبروتينات مو بس يحوس الشعر حتى البشره يطلع فيها كل بلى وجلى



ثالثا :

تبين لمعه بشعرك .. ولمعه مثل القزاز ؟
عندك طريقتين واختاري احدهم :
- لما تتحممين وقبل ماتطلعين اشطفي شعرك بخل اسود محلى بماء
- او مرري شعرك على مويه بارده <<<--- احب هالطريقه اكثر لانه يخلي الشعر روعه



رابعا :

التقصف ......... اذا كنتي من محابات الشعر الطويل سوي هالطريقه لانه ماراح تضره بالعكس له نتيجه ايجابيه لطول الشعر
قصي شعرك كل اسبوعين اقل من بوصه ... ربع بوصه .. شي بس يحمي الشعر من التقصف



خامسا :

لهوات تطويل الشعر .. ( انا ما انفضحت ان شعري يطول بسرعه الا بعد ماصبغت شعري وصارت الصبغه تنزل )
كل اسبوع .. وانا اقول كل اسبوع .. تسلي على شعرك
شلون يعني ؟؟
امسكيه وقصقصي نهايات اطرافه
بس مو بشكل كبير .... بس عشان تعطين الشعر رده فعل يخليه يعوض اللي انقص

واكبر مثال عندكم ( الغره , القصه ) لو قصتيها اقل من شعرك الين جبهتك
كلها اربع شهور وتلحق طول شعرك
على ان شعرك ماطال بس غرتك اللي طالت